Éxodo 19 - La'aqtaqa Ñim Lo'onatac 'Enauacna 2013

So Israel le'ecpi ivita aso Sinaí

¹ So Israel le'ecpi ivita ye toolec 'alhua Sinaí, co'ollaq mashe ivi' soua tres ca'agoxoiqa da ca'ai ye Egipto.

² Chegoqchiguiña ye Refidim, qaq co'ollaq ivita ye toolec 'alhua ye Sinaí nache hua'a, qaq yemaye sa qaỹapeque añi qasoxonaxa.

³ Huaña yemaye, nache so Moisés tasheguemec aso qasoxonaxa da nauane' Ñim Lo'onatac 'Enauacna. Nache Ñim Nataxala' iỹaxana somaye co'ollaq huetalec asomaye, 'eeta': «'Aua'aqtaxanem qome de'era ỹa'aqtac na Israel le'ecpi maye chegoxoguet so Jacob, qoneta':

⁴ Qami' qauauañiichigui co'ollaxa da so'otec so Egipto le'ecpi, qataq da 'eetec da qami' ñauegalo na soota'a. De'era qoyecỹaxaqui 'eeta'am da qoñeetalguete naua laua't so vi'ic.

⁵ Qaq ỹoqo'oye nagui, da qami' ỹataqta aỹem qaualaqaiguet qataq qaupaquiitelec da ñaỹamaxataxac co'ollaq qami' ñaỹamaxateto, nache ỹataqta qami' ỹauotaqa'ate, qataq saishet da qoñeeta'am qome na laỹepi shiỹaxauapi, cha'aye 'enauac ana 'alhua maiche ỹalamaqte.

⁶ Nache qami' ltaxaỹaxanaxanecpi ñaqa'en na ỹotta'a't shiỹaxauapi da Aỹem qaitaxaỹapegue', qataq qami' nhuo' le'ecpi maye seỹotauga da Aỹem do'onataxanot. Qaq 'era qome da 'aua'axatem na Israel le'ecpi».

⁷ Huaña nache ñe'eguelaxañi so Moisés, nache iỹaxaneuga so lqueroxonecpi so Israel le'ecpi, nache ỹa'axatem 'enauac da ỹamaxalec Ñim Nataxala'.

⁸ Nache so Israel le'ecpi 'oonolec da lasataxac, 'eeta': «So'otaq qome 'enauac da qomi' ỹamaxaleguete Ñim Nataxala'». Nache so Moisés ỹe'eguelaxasheguem da ỹa'axatem Ñim Nataxala' da lasataxac se'eso nhuo' le'ecpi.

⁹ Nache Ñim Nataxala' 'enapega so Moisés, 'eeta': «Aỹem, 'am ñachaxana qome, sootaigui ca sansattec lo'oc, yaqto' aỹem hua'aqchigui qome na shiỹaxauapi da 'am setaxaỹapegue', yaqto' namayepi nache 'eetai' qome da 'am ỹa'amaqten.» Nache so Moisés qaltaq ỹe'eguelaxalec da da'aqtaxanem Ñim Nataxala' da la'aqtac so shiỹaxauapi.

¹⁰ Nache Ñim Nataxala' 'enapeco' da la'aqtac: «'Aue, ña naỹamaxat 'anqa'en ye shiỹaxauapi, da yaqto' aỹem ỹo'oxoren nagui qataq qonte'. Qataq qonapega da iỹoi' naua alogo,

¹¹ qataq naỹamaxatta'aguet ca lỹa na'a'q, cha'aye nache huaigui da Aỹem Nataxala' senotec qome, sachiguiña añi qasoxonaxa Sinaí, qaq Nachaỹem ỹauaachigui qome 'enauac ye shiỹaxauapi.

¹² Qaq 'aua'an qome ca loga't naua loiguiye añi qasoxonaxa, yaqto' saishet da napacalec ye shiỹaxauapi. Qataq qonapega qome, qoneta': Saishet qome da huo'o ca huenotsheguemec añi qasoxonaxa qataq saishet da huo'o ca sa qaỹapeque naua loiguiye, cha'aye cam napacalec cam na'anec nache ileu.

¹³ Qalaxaye saishet qome da huo'o ca irolec na lhuaq camaye da ỹalauat, cha'aye camaye da qaỹalauat, nache qairolec ca coma' huo'otaq aca checna. Na'aictaxa da huo'otaq shiỹaxaua, huo'otaq shiguiỹac, camaye saishet da qanca'alaxattauec. Nato' qom qaỹa'aqchigui da l-lamaxa aca nasheere peenaq lcoue, nache ishet da qainotsheguemec añi qasoxonaxa.»

¹⁴ Nache so Moisés huenoteeguesop aso qasoxonaxa da naỹamaxat naqa'en so shiỹaxauapi, da yaqto' ỹo'oxoren Ñim Lo'onatac 'Enauacna, qaq so shiỹaxauapi nataqa'en ỹataqta iỹote' naua alogo.

¹⁵ Nache so Moisés 'enapeco': «Qanaỹamaxacheetai' qome, yaqto' qami' lhuotte' qonte', qataq ca lỹa na'a'q, qataq saishet qome da huo'o ca hue'eguet aca 'alo».

¹⁶ Qaq so yaqta'a da yo'oxoñi so na'a'q tres, nache huo'o so nqashelgaxa qataq nalataxa, qataq so sansattec lo'oc, imattalec aso qasoxonaxa. Qataq huo'o so lta'araic l-lamaxa aso nasheere, nache ỹo'ot da 'enauac so netaigui so npe'lpi ỹataqta iviloxolaqchet da lcolanaxa.

¹⁷ Nache so Moisés nqateeguesopa naua lpele'ete so Israel le'ecpi, da yaqto' nauane' Ñim Lo'onatac 'Enauacna. Nache ỹauega da hueto'ot naqa'en na loigue aso qasoxonaxa Sinaí.

¹⁸ Nache aso qasoxonaxa Sinaí nchisheguem co'ollaxa na lmala'q, cha'aye Ñim Nataxala' co'ollaq huenotec, nache nactaigui so norec. Qaq so lmala'q 'eeta'am na lmala'q ana nqatelaxanaxaqui, nache asa'aso qasoxonaxa ỹataqta 'enauac da cholaxan.

¹⁹ Nache na l-lamaxa aso nasheerepi nataqa'en nquictauec, nache so Moisés detaqtac. Qaq Ñim Lo'onatac 'Enauacna ỹasattapeeguet somaye, qaq naua la'aqtaqa Ñimaye da ỹasat qalaq 'eeta'ama na nalataxa.

²⁰ Nache Ñim Nataxala' huenotec taalec so ỹataqta pa'asheguem añi qasoxonaxa Sinaí. Ime, nache 'enapega so Moisés da huenotsheguemec se'eso 'alhua. Nache so Moisés huenotsheguem.

²¹ Nache Ñim Nataxala' 'enapega, 'eeta': «'aunotec qome, nache 'auqata ye Israel le'ecpi da saishet da napacalec na loga'tpi na na'anec, qataq qonapega da saishet da nshetaique da aỹem ỹauaachigui. ¡Ten qom qalota ca ileu yemayepi!

²² Nataqa'en ye ntaxaỹaxanaxanecpi da aỹem naua'a, qalaq ỹataqta nỹota. ¡Ten qom selaxachigui yemayepi!»

²³ Nache so Moisés 'enapeco': «Yi'iye shiỹaxauapi saishet da huenotsheguemec ana'ana qasoxonaxa, cha'aye mashe qomi' qonapegalo co'ollaxa da sauoqo'o ca qara'anec naua loiguiye, da yaqto' sa qaishetapec».

²⁴ Qalaxaye Ñim Nataxala' 'enapeco': «'Asoma, 'aunotec. Qaq qom ime, nache qaltaq 'annotsheguem, 'annaictague' qome ca Aarón. Qalaxaye ye ntaxaỹaxanaxanecpi qataq ye shiỹaxauapi qonapega da saishet da napacalec so na'anec da aỹem nnotsheguema. ¡Ten qom selaxachigui yemayepi!»

²⁵ Nache so Moisés huenotec, nache qaltaq ỹe'eguelaxalec da da'aqtaxanem de'era so Israel le'ecpi.