Éxodo 18 - La'aqtaqa Ñim Lo'onatac 'Enauacna 2013

So Jetro namaqtega so Moisés

¹ Nache so Jetro maye lacho' so Moisés, som ltaxaỹaxanaxanec na netaña ye Madián, somaye la'axaỹaxac 'enauac na ỹo'otec Ñim Lo'onatac 'Enauacna so Moisés, qataq so lalamaxatpi Israel le'ecpi, nataqa'en la'axaỹaxac da 'eetec Ñim Nataxala' co'ollaq nqateeguesop somayepi ye Egipto.

² Cha'aye so Moisés co'ollaq ime da ỹe'eguelaxat aso lhua Séfora, nache asomaye qaltaq ipactegue da neto'ot so Jetro, som lacho' so Moisés,

³ qataq soua dos llalqa. So 'oonolec soomaye le'enaxat Gersón, cha'aye so Moisés 'enapeco' da la'aqtac: «Aỹem ỹaqa'a da sachegoqta'ague, qaq nagui ỹaqa'a na sootalec 'alhua,»

⁴ qaq so lỹa le'enaxat Eliezer, cha'aye 'enapeco': «Ñim Natamnaxala' so ita'a aỹem itauan qataq aỹem nca'alaxateeguesop so lainec so faraón».

⁵ Nache so Moisés nmataqa' co'ollaxa ye toolec 'alhua, maye sa qaỹapeque añi qasoxonaxa maye lma' Ñim Lo'onatac 'Enauacna. Qaq nacheye ye taỹa co'ollaxa so Jetro, nnaictague' aso llale maye lhua so Moisés, qataq soua llalqa somaye.

⁶ Nache somaye, 'enapeco': «Aỹem Jetro maye aỹem 'aracho', ñanac da sauotaique da 'am ñauane', ñenaictague' ara 'arhua qataq daua dos 'aỹa'alqa.»

⁷ Nache so Moisés jec da ca'atta'aguet so lacho'. Qaq co'ollaq ivireguet, nache ỹa'aldoto naua l-llecte somaye. Ime, nache napigoxoi'. Qaq co'ollaq ime da nquiitega't, nache tareua'a so npe'l.

⁸ Huaña, nache so Moisés da'aqtaxaatapeguem so lacho' 'enauac na ỹo'otec Ñim Nataxala' so faraón, qataq so Egipto le'ecpi co'ollaq iueelec so Israel le'ecpi, qataq da lqalaic da ñecỹaxac. Nataqa'en da'aqtaxaatapeguem somaye da 'eetec Ñim Nataxala' co'ollaq nca'alaxatec somayepi.

⁹ Nache so Jetro ỹataqta machiguiñi souaxat da lqouagaxanaqtaic Ñim Lo'onatac 'Enauacna maye ỹachaxana so Israel le'ecpi co'ollaq nca'alaxateeguesop da lamaxasoxonaxac so Egipto le'ecpi.

¹⁰ Nache 'enapeco' da la'aqtac: «Ỹataqta qaỹo'oxoren qome Ñim Nataxala', maye nca'alaxateeguesop na Israel le'ecpi, da la'añaxac ñi faraón qataq na Egipto le'ecpi maye qami' ipataqtrañi co'ollaxa,

¹¹ qataq da 'eetec da qami' sa iyacna'ape. Qaq nagui aỹem saỹateeta da Ñim Nataxala' ỹataqta 'amaqtaqaic, napacalec 'enauac na laỹepi atamnaxala'pi.»

¹² Ime, nache so Jetro ỹacona so shiguiỹac, nache ỹavigaxat, ỹauo'o lachetaqtaxanaqte da ỹanot Ñim Lo'onatac 'Enauacna, nataqa'en huo'o aso lỹa lachetaqtaxanaqte. Ime, nache anac so Aarón qataq 'enauac so lqueroxonecpi so Israel le'ecpi, anac da qanhuana'ai' so lacho' so Moisés da qaỹo'oxoren Ñim Lo'onatac 'Enauacna.

So Moisés ỹereuo so laỹepi maye ishet da nmit na nasouaxashet

¹³ Qaq so lỹa na'a'q, nache so Moisés nso'ooñi da yaqto' na'axaỹaxana so qanqalaata'ai, maye ỹa'axateua'a somaye so Israel le'ecpi da yaqto' ỹaỹamaxaañi, qaq somayepi nache nachattañi, chegoqchiguiña so nte'eta, nache choche ivitta'a so avit da nachattaua'a so Moisés.

¹⁴ Nache so lacho' so Moisés, co'ollaq ỹauaachigui 'enauac de'era lo'onataxanaxac so laronaxanec, nache 'enapega, 'eeta': «¡Che ta'ainec da nache qonetec de'era ne'ena shiỹaxauapi! ¿Ta'ainco' ye nachaq 'amta da 'anso'ootañi, qaq ne'ena shiỹaxauapi 'enauac 'am nachattaua'a chegoqchiguiña so nte'eta choche ivitta'a so avit? ¿Ta'ainco' da 'andote' de'era no'onataxanaxac da 'aulotapeeguet namayepi?»

¹⁵ Nache so Moisés 'enapeco': «Qomye ne'ena shiỹaxauapi anac aỹem naua'a, cha'aye huotaique da nnate' Ñim Lo'onatac 'Enauacna.

¹⁶ Cha'aye da huo'otaq huo'o ca nqalaatagui namayepi, nache anac da aỹem naua'a, da yaqto' aỹem ishet da sa'aqtaxanem namayepi, da chaq negue't ca ỹoqta 'en ca ỹa'axat, ime, nache aỹem sa'axateguelo naua lqataxaco qataq naua lapaxaguenataxanaxaco Ñim Lo'onatac 'Enauacna.»

¹⁷ Qalaxaye so lacho' Jetro ỹauo'o da lqataxac, 'eeta': «Sa ỹaỹamaxañi da 'eetec de'era da 'aro'onataxanaxac.

¹⁸ Cha'aye damaye ỹataqta 'anasamiisop qome, qataq na shiỹaxauapi maye 'am datato'ot. Cha'aye de'era no'onataxanaxac ỹataqta qapa'atta, qaq saq taiguet da 'andote'.

¹⁹ Qaq ỹoqo'oye nagui 'ana'axaỹaxana da iqataxac maye 'am sami', qaq Ñim Lo'onatac 'Enauacna 'am itauan qome. Qaq 'am qome nache 'am ltaxaỹaxanaxanec na nalamaxat nhuo' le'ecpi da 'autaxaỹapegue' Ñim Lo'onatac 'Enauacna, qataq da 'aỹa'anot Ñimaye cam qanqalaata'ai'.

²⁰ Qaq namayepi nache 'auapaxaguenec qome na nqataxacpi qataq na napaxaguenataxanaxacpi, qataq 'auapaxaguenec da llecỹaxac da nachaalataxac, qataq cam ỹo'ot ñi 'oonolec.

²¹ Qaq 'am, 'alca'agui qome ne'ena nhuo' le'ecpi, 'alca'aua'a cam ỹalleppi maye ỹataqta nalauo, qataq ỹataqta huo'o naq 'enec naqa'en Ñim Lo'onatac 'Enauacna, qataq saq shepecaic, qataq saishet da choche nmitta'ai ca lashiichiỹaxac, qaq ca 'oonolec camayepi huo'o ca 'aupataxalec da ilo'ogue ca mil shiỹaxauapi, qataq huo'o ca 'aupataxalec da ilo'ogue ca cien, qataq huo'o ca 'aupataxalec da ilo'ogue ca cincuenta, qataq huo'o ca 'aupataxalec da ilo'oguelo caua diez.

²² Nache camayepi nacheca qome ca nmit ca lasouaxashet ñi 'oonolec nam nhuo' le'ecpi 'enauaque naua na'axa'tesa'ache. Qaq cam ỹapactec lta'araic nasouaxashet, nache 'am qandoua'a. Qaq ca saq 'amaqtaq nasouaxashet, qalaq maiche huapegue' qome camayepi. Yaqto' saqallegueme da 'ansallaxa, cha'aye camayepi 'am itauan qome.

²³ Qaq da 'aushet da qonetec de'era, qataq da 'am ỹamaxalec Ñim Lo'onatac 'Enauacna, nache huaña qome, qaq ishet da 'anala'aguet, qataq na shiỹaxauapi ishet da ỹataqta machiguiñi da taua'alo naua lma'ate.»

²⁴ Nache so Moisés ỹalaxaguet so lacho' qataq ipacchigui 'enauac nam la'aqtacpi somaye.

²⁵ Nache lca'aua'a som ỹalleppi Israel le'ecpi maye ỹataqta huo'o na ỹaỹaten. Ime, nache huo'o so ipataxalec da ilo'ogue so mil shiỹaxauapi, qataq so cien, qataq so cincuenta qataq soua diez.

²⁶ Qaq nacheso somayepi som ishet da nmit na lasouaxashetpi so nhuo' le'ecpi 'enauaque naua na'axa'te. Qaq nam nasouaxashetpi maye ỹataqta huo'o da lqalaic, nache qairoua'a so Moisés, qaq nam nasouaxashet maye saq 'amaqtaq, nache maiche ỹaỹamaxaañi somayepi.

²⁷ Qaq co'ollaq ime, nache so Moisés ncoyeguene' so lacho', nache somaye ỹe'eguelaxa ye na'alhua.