Éxodo 17 - La'aqtaqa Ñim Lo'onatac 'Enauacna 2013

So 'etaxat maye chegaqaigui so coma'

¹ Qaq 'enauac so Israel le'ecpi ca'ai ye toolec 'alhua Sin, nache nqocheeta, ipacchiguilo naua lamaxasoxonaxaco Ñim Nataxala'. Qaq co'ollaq qaỹata'ague, nache naña ye Refidim, qalaxaye qaica ca 'etaxat yemaye da huo'otaq nỹom somayepi.

² Huaña, nache qoỹenapega so Moisés, qoỹeeta': «¡Ña 'auauo'o ca qaraquip, yaqto' ñiỹomaq!» Nache so Moisés 'enapeco': «¿Ta'ainco' ye aỹem qauỹaxañiitacot? Qataq ¿ta'ainco' ye qavi'iguiñeetac Ñim Lo'onatac 'Enauacna?»

³ Qalaxaye se'eso nhuo' le'ecpi ỹataqta huo'o na laquip, ỹoqo'oye 'eetega so Moisés, 'eeta': «¿Che ta'ainco' da qomi' 'anqateeguesopa co'ollaxa ye Egipto? ¿Choche qomi' 'aualaateque na qaraquip, qataq na qoyalaqpi qataq na qana'atetpi?»

⁴ Nache so Moisés nqouagaxaunot Ñim Nataxala', 'eeta': «¿Cam sheeteco' ne'ena shiỹaxauapi? ¡Ye mashe yaqta'a da aỹem ỹalauat da aỹem irolec na coma'!»

⁵ Nache Ñim Nataxala' 'enapeco': «'Aua'au qome qataq 'auauo'oi caua 'arỹa't na lqueroxonecpi na Israel le'ecpi. Qataq 'auache ana 'arashelte anam 'aurolec co'ollaq 'auaxaangui aso auaxai. Ime, qaq qojec.

⁶ Qaq 'am seuatta'aguet yem Horeb, soota'a qome añi coma'. Qaq qom 'auaxangui añimaxa, nache naỹenec na 'etaxat, da yaqto' nỹom ne'ena shiỹaxauapi.» Qaq 'era da 'eetec so Moisés, ỹauaachigui so lqueroxonecpi na Israel le'ecpi.

⁷ Nache ỹamata'ac se'eso 'alhua da Meribá, cha'aye nache huaña co'ollaxa da so Israel le'ecpi huo'o da nachoxoc. Nataqa'en ỹamata'ac da Masah, cha'aye huaña co'ollaxa da ỹe'eguen Ñim Lo'onatac 'Enauacna, 'eeta': «¿Peta'a qomi' hueta'agueto'ca cam Nataxala', huo'otaq saishet da qomi' hueta'agueta?»

Co'ollaq qanalattague' so amaleciitapi

⁸ Nache so amaleciitapi naỹa ye Refidim da delogui' so Israel le'ecpi.

⁹ Nache so Moisés 'enapego' so Josué, 'eeta': «'Auauo'oi qome caua 'auaconeua'alo shiỹaxau'. Ime, qaq qojec 'aulogui' na amaleciitapi. Aỹem qalaq sootalec qonte' nte'eta añi qaỹoqotcheguemec 'alhua, llasoqta'a qome aye lashelte Ñim Lo'onatac 'Enauacna.»

¹⁰ Nache so Josué ỹo'ot da la'aqtac so Moisés, nache jec da delogui' so amaleciitapi. Qaq so Moisés, Aarón qataq so Hur, qalaq taresheguemec aso qaỹoqotcheguemec qasoxonaxa.

¹¹ Qaq so Moisés naxa da ỹachaxaayishegue'm naua lhua'q, nache doxonaxaatai' so Israel le'ecpi. Qalaxaye naxa da nauaxaỹaxaayiñi naua lhua'q, nache qaltaq doxonaxaatai' so amaleciitapi.

¹² Qalaxaye co'ollaq mashe imateguelo naua lhua'q so Moisés, nache qaỹacona so coma'. Ime, nache nso'oolec qanqa'en. Nache so Aarón qataq so Hur, nasoqtrañi naua lhua'q so Moisés, ñi 'oonolec soomaye nasoqta'a na 'oonolec lhuaq so Moisés. Huaña nache ishet da ỹachaxaatrashegue'm naua lhua'q so Moisés, choche ivitta'a da inoxooñi aso nala'.

¹³ Ỹoqo'oye so Josué ishet da loxonec so nalleppi so amaleciitapi, irota'a so ỹeelonec.

¹⁴ Nache Ñim Nataxala' 'enapega so Moisés, 'eeta': «'Erelec qome aca nere de'era, yaqto' saishet da qaicoua'ai. Ime, nache hua'aqchigui 'anqa'en ñi Josué, da aỹem imauec qome da sapalaxat da na'aqtaguec na amaleciitapi.»

¹⁵ Nache so Moisés nauaxaỹaxaasheguem aso lca'atoxonaxalate, nache ỹanagui da le'enaxat: «Ñim Nataxala' 'eeta'am aca ỹa'ana maye seca'attalec.»

¹⁶ Nache 'enapeco': «¡Ana la'ana Ñim Nataxala' ñasoqta'a! ¡Ñim Nataxala' nalattague' na amaleciitapi nache ivitta'a qome cam chegoxoguetpi namayepi!»