Éxodo 15 - La'aqtaqa Ñim Lo'onatac 'Enauacna 2013

So lo'onec so Moisés

¹ Nache so Moisés qataq so Israel le'ecpi, ỹo'on so no'onec da yaqto' qaỹo'oxoren Ñim Nataxala', 'eeta': «Aỹem so'onaxan, sho'oxoren Ñim Nataxala', cha'aye huo'o da llo'oxoyec souaxat da dauegaxan, cha'aye iyiiñi naqa'en so caipi qataq som netalecpi, huangui naqa'en aso auaxai.

² Qaq da ỹo'onec sanot Ñim Nataxala', cha'aye Ñimaye nacheñi ñi ỹa'añaxac qataq ica'alaxa. Ñimaye nacheñi Ñim Ñatamnaxala' maye Lo'onatac 'Enauacna, qaq ỹoqo'oye sho'oxoren, Ñimaye nacheñi Ñim Natamnaxala' so ita'a, qaq ỹoqo'oye lta'araic da ỹo'oxonnataxanaxac Ñimaye.

³ Ñim Lo'onatac 'Enauacna ỹataqta alaataxaic. Ñimaye le'enaxat da Nataxala'.

⁴ Ñim Nataxala' iyiiñi naqa'en aso naigonapi, qataq so nalleppi so faraón huangui aso auaxai, nataqa'en som ỹataqta no'on nalleppi 'ogaxaicpi naqa'en, huangui aso Auaxai Togaxarai

⁵ Co'ollaq iyiiñi somayepi, nache 'eeta'am ca coma' ỹataqta iviraña ca loga't na 'etaxat, nache ỹapolec aso auaxai somayepi.

⁶ 'Am Nataxala', na 'oiguishec 'arhuaq ỹataqta 'añaxaic, qataq qaica ca ỹaqalanapec, nachena na ilaxachigui so 'ampa'aguenaxauapi.

⁷ Da lta'araic 'ara'añaxac ipa'axaañi som 'am ipa'agueetacpi, qaq ỹataqta 'eroigui da 'arayeloxo nache somayepi ỹavic, 'eeta'am na 'auaqpi.

⁸ Co'ollaq 'auquetetec na 'ara'at, nache huo'oi naua laponaqa'ate na 'etaxat, na 'etaxat qalaq nachaañi, 'eeta'am ca npaqtaxanaxat, na laiñi asom qaỹoqchiguingui auaxai, qalaq da'añiỹa'a't so 'etaxat.

⁹ So depa'aguenataxan, qalaq 'eeta' da lhuennataxa: ‹Aỹem secaalec qome somayepi, sevira'a da sevi', ime, qaq ñaloqnec qome ca iuotaxanaxat, ivitta'a da ỹataqta samachiguiñi. Ñeqatsheguem qome na ỹainec nache na ihuaq nlaxaañi somayepi›.

¹⁰ Qalaxaye co'ollaq 'auquetetec na 'ara'at, nache aso auaxai qaltaq ỹe'eguelaxa't so 'etaxat. Nache iyiiñi somayepi 'eeta'am ca lcat quiguiñi huangui so qaica ca 'ena'am da la'auataxa.

¹¹ 'Am Nataxala', ¿negue'tom ca lỹa atamnaxala' maye ishet da 'Am qanaloqnaxaneguet? ¡Ỹataqta qaica ca lỹa qui'itta qataq 'amaqtaqaic da 'Am 'eeta'am! ¡'Aushet da 'auo'ot ca huo'o da na'aalaxa qataq ca huo'o da lchec! ¡Qaq 'itchiguiñi da 'Am qaỹo'oxoren!

¹² Co'ollaq 'auachaxan da 'ara'añaxac, nache ana 'alhua iuoxonañi somayepi.

¹³ Qaq nachera da 'arauotaxanaqtaic da huo'omshe 'auauecta'aguet ne'ena 'aralamaxatpi maye 'arca'alaqtacpi, qataq nachera da 'ara'añaxac da 'auo'onataxana, da 'auauectaua'a ye 'arma' maye qui'itta.

¹⁴ Na ỹotta'a't shiỹaxauapi qalaq ỹataqta iviloxol co'ollaq huo'o da la'axaỹaxac, ye filisteopi, qalaq nlaxagui da lcolanaxa,

¹⁵ na lataxala'pi ye edomiitapi, qalaq ỹataqta nlaxagui da lli'iỹaxa, qataq na lataxala'pi ye moabiitapi ỹataqta iviloxolaqchet da lcolanaxa, qataq daqat da la'añaxac 'enauac ye Canaán le'ecpi.

¹⁶ 'Am Nataxala', no'on da ñi'i 'anqa'en yemayepi, ñaq 'auauo'o qome da lcolanaxa, 'eeta'am qome ca coma' da saq deraỹapigui', souaxat da la'añaxac na 'arhuaq, nato' qom mashe ỹapacauec nam nhuo' le'ecpi maye maiche 'aralamaxat!

¹⁷ 'Am Nataxala', ña qomi' 'aunoxonaqchetreuo qome, ña qomi' 'aỹa'analeguete yem qaỹoqotcheguemec 'alhua maye 'aralamaxat, yem 'alhua maye 'arca'aguishec da 'arma', yem atamnaqa' maye maiche 'aua'ayiñi.

¹⁸ ¡Ñim Nataxala' chochaq tatec da ilotague' 'enauacna!»

So lo'onec aso María

¹⁹ Qaq so faraón co'ollaq mashe tangui aso auaxai, netangui aso naigonapi qataq so nalleppi maye netalec so caipi, nache Ñim Nataxala' ỹe'eguelaxa't naqa'en so 'etaxat aso auaxai, nache ipa'axaañi somayepi, qalaxaye so Israel le'ecpi co'ollaq ỹa'axasoxoolec aso auaxai, qalaq deqaqtegue so llegueta.

²⁰ Nache aso María maye la'aqtaxanaxana Ñim Lo'onatac 'Enauacna, maye lqaỹa so Aarón, asomaye qataq aso laỹepi 'alpi, ỹacona aso lasaquiaxanatapi, nache qaica'attaueegue asomaye, nache do'onaxaatac qataq dasottac.

²¹ Nache aso María do'onaxan, 'eeta': «Qauo'onaxañi, qavio'oxoyiñi Ñim Nataxala', Ñim ỹo'oxoraic maye dauegaxan, Ñim iyiiñi naqa'en aso naigonapi qataq so caipi qataq som netalecpi somayepi».

So chemaxaraic 'etaxat

²² Nache so Moisés ca'ai naqa'en so Israel le'ecpi aso Auaxai Togaxarai, nache somayepi nqo'ona ye toolec 'alhua Shur, nache ivi' soua tres na'axa'te da quetalec so toolec 'alhua, qalaq saishet da ỹanata ca 'etaxat.

²³ Qaq co'ollaq ivita ye Mará, nache saishet da nỹomigui so 'etaxat maye huaña ye Mará, cha'aye ỹataqta chem. Qaq ỹoqo'oye yemaye qoỹanagui da Mará.

²⁴ Huaña nache se'eso shiỹaxauapi ỹasaxaleguete naua qauema ltaxaỹaxaco so Moisés, qataq inattac, 'eeta': «¿Negue't ca ñiỹomaxagui nagui?»

²⁵ Nache so Moisés nqouagaxaunot Ñim Nataxala', nache Ñimaye ỹachaxana aso qo'oipaqole, nache so Moisés ỹasaxangui so 'etaxat aso lcoue asa'aso qo'oipaqole, nache se'eso 'etaxat ama. Qaq huaña, nache Ñim Nataxala' ỹe'eguen da lpi'iỹaxac somayepi, qataq ỹanem da lqataxac qataq da llec naqa'en da nachaalataxac ñi 'oonolec shiỹaxaua.

²⁶ Nache 'enapeco' da la'aqtac: «Aỹem Nachaỹem Nataxala' maye Qanatamnaxala'ai, qami' qom ỹataqta qauloitelec da ỹa'aqtac, qataq qom qauo'oche cam saỹamaxareeta, qataq qaualaqailec da ỹamaxasoxonaxac, qataq da qaupaquiiteleguete naua iqataxaco, nache aỹem saishet qome da ñamaq na nalolaxapi maye ñamaxa co'ollaxa ye Egipto le'ecpi, cha'aye aỹem Nachaỹem Nataxala' maye ishet da qami' ñatare'n».

²⁷ Qaq co'ollaq ime de'era, nache so Israel le'ecpi qaltaq ivita ye Elim yem naña aso doce latogotepi, qataq aso setenta chaicpi. Huaña, nache naña da lanataqa' so loigue se'eso 'etaxat.