Ester 5 - La'aqtaqa Ñim Lo'onatac 'Enauacna 2013

Aso Ester nachaateua'a so nta'a

¹ Qaq co'ollaq inoxoore'c soua tres na'axa'te, nache aso Ester, ỹaayiñi soua alogo da nate'e, nache jec, taua'a so qasoxoc pa'aỹauo se'eso nma' lta'araic, qaq vi'iiguet co'ollaq ivita so nỹec maye hueta'a so nta'a nso'ootañi, nso'ootangui aso nso'onaxaqui maye datateuga so lasom.

² Qaq so nta'a co'ollaq choche ila'a aso Ester da hueta'a so qasoxoc, nache ỹachaxana da lauoche asomaye, nache ỹaneuga asomaye, aso lashelte oro maye nasoqta'a. Qaq aso Ester, nquigueuo nache ipoteua'a na lsheenec aso nashelte,

³ nache so nta'a, inat asomaye, 'eeta': ¿Ta'ainec 'am, nate'e Ester? ¿Negue't cam qonetapeguec? ¡Aỹem 'am sanem qome cam 'auỹaxanaique, na'aictaxa da tachiguingui na laiñi da ỹo'onataxanaxac! Nache aso Ester ỹasateguet somaye, 'eeta':

⁴ Da 'auaỹamaxareeta 'am nta'a, qaq 'am ñachoxonnot da 'aualegueua'a nagui ca nquia'axac maye saỹamaxattapiguiñi da 'am sho'oxoren, qataq 'annaictague' qome so Amán. Qaq huaña nache so nta'a damaxasoxon, 'eeta':

⁵ Sa qanaỹaloxoñi da qavi'iguiñiỹauga ca Amán, yaqto' ipacchigui dam 'eetapeguec ara nate'e Ester. Qaq 'era da 'eetec da so nta'a qataq so Amán, je'c da nqo'oora so nquia'axac maye ỹo'ot aso nate'e.

⁶ Qaq co'ollaq huaigui so nquia'axac, nache so nta'a 'enapega aso Ester, 'eeta': ¡Ñaq aỹem 'auỹaxanot, maicheye cam 'auỹaxanaique, qaq aỹem 'am sanem qome, na'aictaxa da tachiguingui na laiñi da ỹo'onataxanaxac!

⁷ Nache aso Ester ỹasat, 'eeta': Dam sheetapeguec, qataq dam seỹaxaatapegueua'a, 'eeta':

⁸ 'Am nta'a, da aỹem 'auauotec, qataq da 'auasateguet dam sheetapeguec, qataq da aỹem 'aỹa'anem cam seỹaxaategueua'a, nache 'auanaỹa qonte' cam nquia'axac maye so'ot da 'am sho'oxoren, 'annaictague' qome so Amán. Qaq huaña qome nache so'ot cam 'auỹaxaatapegueua'a 'am nta'a.

So Amán iqataxanai' aso logorai 'epaq

⁹ Qaq so Amán, co'ollaq ca'ai so nquia'axac, nache ỹataqta machiguiñi, qataq ỹaỹamaxareeta somaye, qalaxaye ỹataqta nlaxagui da layeloxo co'ollaq ilota'a so Mardoqueo, maye hueta'a so lasom som nma' lta'araic, cha'aye somaye saishet da ñesheguem, qataq saishet da choche deraỹapigui' co'ollaq ila'aguet somaye.

¹⁰ Qalaxaye se'eso na'a'q, so Amán saishet co'ollaxa da ỹachaxaata da layeloxo maye hueto'ot, qalaxaye co'ollaq ivireua'a so lma', nache damaxasoxoneuga so nauochaxauapi, qataq aso Zeres, maye lhua somaye,

¹¹ nache da'aqtaxaateguema soomaye da lta'araic lsallaxa, qataq so qalota llalaqpi, qataq da 'eetec da so nta'a ỹataqta huo'o naqa'en da la'amaqchec, qataq da llo'oxonnatac somaye, napacalec som laỹepi nta'alpi qataq som do'onataxaatacot so nta'a.

¹² Qaq nataqa'en, 'enapec: Nachaỹemta da aỹem icoyeguen aso nate'e Ester, da salegueua'a so nquia'axac maye ỹo'ot quiye, da ỹo'oxoren ñi nta'a, qataq da aỹem icoyeguen da qaltaq salegueua'a cam nquia'axac maye ỹo'ot qonte'.

¹³ Qalaxaye naxa da selota'a so Mardoqueo maye judío, da nso'ootañi hueta'a ñi lasom ñi lma' lta'araic ñi nta'a, nache 'enauac de'era ỹataqta qaica ca naigui ñaqa'en.

¹⁴ Qaq huaña nache aso lhua somaye, qataq 'enauac so nauochaxauapi, 'enapega somaye, 'eeta': 'Auamaxasoxoolec da qaỹa'ayiñi aca 'epaq maye ivi' veintidós metros ye lshequitcheguema, qaq qonte' nte'eta, nache 'auỹaxanot ñi nta'a da qaicoñerasheguemec acamaye so Mardoqueo, yaqto' qom 'anqo'ona ca nquia'axac da 'annaicapegue' ñi nta'a, nache qaica cam tatapigui 'arhuel. Qaq de'era nhuennataxac, ỹataqta ỹaỹamaxareeta so Amán, nache damaxasoxoolec da qaỹa'ayiñi aso 'epaq.