Ester 4 - La'aqtaqa Ñim Lo'onatac 'Enauacna 2013

Da laquicoxo so judiopi souaxat se'eso namaxasoxonaxac

¹ Qaq so Mardoqueo, co'ollaq ỹaỹaten 'enauac de'era qaỹo'ot, nache ncolaxata'aisalo soua alogo maye la'anaxat da nqui'ic, qataq ỹaayiñi soua sansatchiguilo alogo, qataq ichegoxolec na lqaic so alo, ime nache jec, coleetapigui so huaqta'a't nỹecpi, nache ỹa'alaqtague' souaxat da nlaqchigui da nqui'ic.

² Nache ivitta'a so ñegueuo so lma' lta'araic so nta'a, qaq huaña nache vi'iiguet, cha'aye saishet da qaỹasheneuo da pa'auo ca 'eeta'am somaye da no'otaxac.

³ Qaq nataqa'en 'enauac so laỹepi 'alhuapi maye ivira'a som lamaxasoxonaxac so nta'a, da ỹataqta huo'o da lta'araic laquicoxo so judiopi, qaq somayepi ỹataqta ỹachaxaata da laquicoxo, nache ỹo'ot da nqouaqchet, qataq nỹeetac, qataq daquicota, qataq somayepi qalota som nnangui so alo, qataq ỹaayiñi soua alogo maye sansatchiguilo.

Da ltaunaxanaxac aso Ester

⁴ Qaq som qa'ampiolec maye do'onataxaatacot aso Ester, qataq so ỹalleppi maye nauaatalec asomaye, ỹa'axateua'a co'ollaxa aso Ester dam qanayeuaigui. Qaq huaña nache aso nate'e ỹataqta nlaxagui da laquicoxo, nache ỹamaxauga so Mardoqueo soua anogo da yaqto' nqa't soua alogo maye ỹaatrañi, qalaxaye somaye saishet da ỹaconegueta soomaye.

⁵ Qaq huaña nache aso Ester iỹaxaneuga so Hatac, som lataxala' som lauanaxanaxanecpi so nta'a, nache ỹamaq da nqo'oneuga so Mardoqueo, da yaqto' inat negue't cam huo'o, qataq ca huo'omshe ỹo'ottac de'era.

⁶ Nache so Hatac, jec da detaxaỹapegue' so Mardoqueo, maye netauga so nlagaqa' se'eso huaqta'a't nỹecpi, qataq datateuga so lasom so lma' lta'araic so nta'a,

⁷ nache so Mardoqueo da'aqtaxanem 'enauac dam qanayeuaigui, qataq ye lcata aso plata maye ỹachaxanapec so Amán da ỹaneua'a aso alom laỹe' so nta'a, da nmeneguet naqa'en da qanmatchiguiñi da qaỹalauat so judiopi.

⁸ Nataqa'en ỹanem aso lmalate so nerec maye huetalec so namaxasoxonaxac da qanmatchiguiñi da qaỹalauat so judiopi, qataq mashe qaỹa'axatec huaña ye Susa, da yaqto' somaye ỹanem aso Ester, yaqto' asomaye nataqa'en ỹaỹaten 'enauac de'era. Qaq nataqa'en ỹamaxaua'a so la'aqtac aso Ester da nma'ai' da detaxaỹapegue' so nta'a, nache nachoxonnot da ỹauo'o ca lataxac da nca'alaxatec so lauo' le'ecpi asomaye.

⁹ Nache so Hatac ỹe'eguelaxauo, nache da'aqtaxanem aso Ester na la'aqtacpi so Mardoqueo.

¹⁰ Qaq huaña nache aso Ester qaltaq ỹamaq so Hatac, ỹache naqa'en so la'aqtac maye taỹauga so Mardoqueo, 'eeta':

¹¹ «'Enauac na do'onataxaatacot ñi nta'a, qataq nam shiỹaxauapi maye netalec na 'alhuapi maye ilotague' ñimaye, ỹaỹaten da huo'o dam nqataxac da qaỹalauat ca ỹale, huo'otaq aca 'alo da taua'a ye nqasoxoc pa'aỹauo ñi lma' lta'araic ñi nta'a, da yaqto' nauane' ñimaye, qataq da saishet da iỹaxaneuga ñimaye, nacherata da ñi nta'a ỹaneuga aso lashelte oro que'eca shiỹaxaua, maye la'anaxat da ichoxoren, qataq nca'alaxatec. Qaq aỹem ye mashe ivittre'c soua treinta na'axa'te, da saishet da aỹem nỹaxaneuga ñi nta'a.»

¹² Qaq so Mardoqueo co'ollaq ỹaỹaten da lasataxac aso Ester,

¹³ nache somaye ỹamaxaua'a nataqa'en de'era la'aqtac maye, 'eeta': «'Am saishet qome da 'aupettega da souaxat da qonetaigui na lma' lta'araic ñi nta'a, qaq nache 'amta maye 'am judío lashe da ishet da 'anca'alec.

¹⁴ Qaq nagui da 'añe'emaxat, qataq da qaica ca 'ara'aqtac, nache ca lca'alaxa na judiopi huo'o qome ca lỹa chegaqa'ague, qalaxaye 'am qataq na llalaqpi so 'arta'a, qaullivi qome. ¡Qaq souaxai' nachera da huo'omshe 'aviraua'a da 'am nate'e, da yaqto' qomi' 'autauan de'era souaqaigui!»

¹⁵ Qaq huaña, nache aso Ester ỹamaxauga so Mardoqueo da lasataxac maye, 'eeta':

¹⁶ «'Am qojec qome, nache 'alaỹona't 'enauac na judiopi maye hueta'a na Susa, da yaqto' nqouaqchet da aỹem itauan. Nache saishet qome da deque'e qataq saishet da nỹom, ivittre'c caua tres na'axa'te, qataq caua tres pe'. Qaq ana ỹamaxashepi qataq aỹem nataqa'en ñeqouaqchetaq qome, qaq qom ime, nache aỹem ñeqo'oneua'a ñi nta'a, na'aictoxo' damaye da dataỹa'aguet dam qalapaqtañi nqataxac. Qaq da aỹem qaỹalauat, qalaq na'aictaxa aỹem qaỹalauat.»

¹⁷ Qaq huaña nache so Mardoqueo jec, nache ipacchigui da ỹo'ot 'enauac nam ỹamaxalecpi aso Ester.