Efesios 1 - La'aqtaqa Ñim Lo'onatac 'Enauacna 2013

So Pablo ỹamaxa aso lere so 'amqaanataxanaxaicpi maye netaña ye nỹecpi ye Éfeso

¹ Qami' ñauochaxau' ỹaqaỹa't maye qoñiitaña na Éfeso: Qami' maye qami' lalamaqa'ate Ñim Lo'onatac 'Enauacna qataq qoquiito'ot da qaua'amaqchiñiitac So Jesucristo, cha'aye qana'ayeetaua'a Somaye, qami' samaxalo da iquinaxanaxac. Aỹem Pablo, maye aỹem lamaxashec So Jesucristo cha'aye Ñim Lo'onatac 'Enauacna, maiche lhuennataxac.

² Seỹaxaatacot Ñim Qarta'a maye Lo'onatac 'Enauacna qataq So Qarataxala' Jesucristo da ỹataqta qami' ỹauoteque qataq qami' ỹanema da nlagaxayec.

So Pablo ỹanot da na'achec Ñim Lo'onatac 'Enauacna

³ Sanqot da qana'achecỹaxac Ñim Lo'onatac 'Enauacna Ñim Lta'a So Qarataxala' Jesucristo, cha'aye nagui da ña'araqtaua'a So Cristo, nache Ñimaye qomi' ỹanema na ỹotta'a't lqouagaxanaqtaiguesat maye chegoqo'ot So Saqcha'a Na'añaxac Qui'itta.

⁴ Co'ollaq saxanaxa da ỹo'ot 'enauacna Ñim Lo'onatac 'Enauacna, qaq nale'ena da qomi' lca'agui'she ỹachegoxotchigui So Cristo da yaqto' qomi' lalamaqa'ate qataq da qaica ca qarasouaxashet da souaqto'ot Ñimaye. Ñim Lo'onatac 'Enauacna ỹataqta lta'araic da lauotaxanaqtaic da shenaqta,

⁵ ỹoqo'oye namaq So Jesucristo da yaqto' Ñimaye ỹauo'oi qomi' llalqa, cha'aye nachera da maiche 'eetapeguec.

⁶ Ñim Lo'onatac 'Enauacna ỹo'ot 'enauac de'era da yaqto' sho'oxorenaq dam lta'araic qataq ỹo'oxoraq lsoxoyec. Qaq ỹoqo'oye huo'o da qana'achecỹaxac souaxat da lta'araic lsoxoyec qataq qomi' ỹanema da qarca'alaxa, ỹachegoxotchigui so lauotaxat Llalec.

^7-8 Chegoqchigui da l-leuaxa So Cristo co'ollaq qaiuaxaneguet so npe'enaxaqui, da Ñim Lo'onatac 'Enauacna ỹapalaxat 'enauac nam qarasouaxashetpi qataq qomi' isoueeguesopa namayepi. Qaq de'era ỹo'ot souaxat da chochaq huañi lsoxoyec Ñimaye. Ỹachegoxotchigui dam lta'araic laỹaanec qataq lauattonaxanaxac,

⁹ da Ñim Lo'onatac 'Enauacna ỹo'ot da 'eetapeguec saqcha'a dam taỹa'a da ipaqueelec ỹachegoxotchigui So Cristo. Qaq nagui qomi' ỹaỹaanaxanaxaneque.

¹⁰ Qaq qom ivita ca laloqo' de'era, nache ỹataqta ipacchigui 'enauac dam 'eetapeguec Ñimaye. Huaña, nache nam hueto'ot na piguem qataq na huetalec ana 'alhua qoỹami' So Cristo da ilo'ogue 'enauac namayepi.

¹¹ Chegoqchigui So Cristo da Ñim Lo'onatac 'Enauacna nale'ena co'ollaxa da qomi' lca'agui'she da ỹauotaique da qomi' lalamaqa'ate, qataq da yaqto' saconaxaguet 'enauac nam ỹachaxanapecpi Ñimaye. Qaq damaye maiche lhuennataxac Ñim Lo'onatac 'Enauacna, Ñim ỹataqta ipacchigui 'enauac nam 'eetapeguecpi.

¹² Qaq 'eetec de'era Ñim Lo'onatac 'Enauacna yaqto' qomi' judío lashe' qomi' la'auaxanaqa da huo'o da qanaquitaxac So Cristo qataq sho'oxorenaqtac dam lta'araic la'añaxac.

¹³ Qataq nataqa'en da qoñiita co'ollaq choche qana'axaỹaxañiỹa da no'on na'axaỹaxac maye chegaqaigui da qarca'alaqai, huaña, nache qaua'amaqchiñi So Cristo, qataq chegoqchigui Somaye da qana'ayeeua'a nam lalamaxatpi Ñim Lo'onatac 'Enauacna, qataq qauacoñiiguet So Saqcha'a Na'añaxac Qui'itta maye qomi' ỹachaxanapeguema Ñimaye.

¹⁴ Qaq nacheso so ỹoqta 'eesa naqa'en da qomi' saconaxaguet ca ỹachaxanapec Ñim Lo'onatac 'Enauacna maye qomi' ỹanema qom ivita ca laloqo' da huesochiguiñi naqa'en na lalamaxatpi, da yaqto' Ñimaye qaỹo'oxoren souaxat da la'amaqchec.

So Pablo nqouagaxaueetapeguelec na 'amqaanataxanaxaicpi maye lma' ye Éfeso

¹⁵ Aỹem ỹa'axaỹaxac da qoñiita da lta'araic da qarpi'iỹaxaqui So Qarataxala' Jesucristo qataq da qarauotaxanaqtaiqui nam lalamaxatpi Ñim Lo'onatac 'Enauacna. Ỹoqo'oye dam hua'auchiguiñi ỹa'aqtac,

¹⁶ aỹem shectot da saatac da ña'achec naxa da ñeqouagaxaueetac, da tachigui ye iuel da qoñiita souaxat da qanaquitaxaqui Ñimaye.

¹⁷ Nache seỹaxaatacot Ñim Lo'onatac 'Enauacna maye Lta'a So Qarataxala' Jesucristo, Ñim Nta'a maye ỹo'oxoraic, da yaqto' qami' ỹanema So Saqcha'a La'añaxac da qami' ỹaanaxanaxaiqa naqa'en, qataq da yaqto' ỹataqta qauauattoñiita Ñimaye.

¹⁸ Qataq seỹaxaatacot Ñim Lo'onatac 'Enauacna, da yaqto' qami' ỹaỹaanaxanaxaateque de'era lta'araic naigui da nca'alaxa maye ỹami' nam lalamaxatpi. Yaqto' nataqa'en ỹataqta qauaỹaañita cam qanaquitaxaqui maye huo'omshe qami' iỹaxanalo Ñimaye.

¹⁹ Qataq yaqto' qauaỹaañi dam ỹataqta lta'araic la'añaxac maye qomi' itauaategueque. De'era na'añaxac qaica ca loga't, dam do'onataxana co'olloxocheye Ñim Lo'onatac 'Enauacna,

²⁰ co'ollaq nca'aleeguesop naqa'en da nleuaxa So Cristo. Nache taigue naqa'en da piguem, da yaqto' nso'onegue da aloic Ñimaye,

²¹ da yaqto' nataỹaña naqa'en 'enauac nam 'añaxaicpi, damaxasoxonapecpi, nta'alpi, nataxala'pi maye hueto'ot na piguem, qataq 'enauac nam ishet da huo'o ca qaỹamata'ac le'enaxat, nagui nam souaqtaiguilo na'axa'te, huo'otaq cam ñaq natauo.

²² Nache Ñim Lo'onatac 'Enauacna ipataxalec da ilo'ogue naqa'en 'enauacna So Cristo, qataq ỹanem da nachaqsota 'oonolec lataxala' naqa'en 'enauac na 'amqaanataxanaxaicpi.

²³ Cha'aye na 'amqaanataxanaxaicpi, nachena na 'eeta'am da lo'ocỹaxac So Cristo. Qaq namayepi ỹataqta imatta't da lataxac Somaye. Qaq Somaye ỹataqta naloqchiichiguiñi naqa'en na 'amqaanataxanaxaicpi.