Eclesiastés 6 - La'aqtaqa Ñim Lo'onatac 'Enauacna 2013

Da achaalataxac qaica ca naigui

¹ Qataq huo'o da lỹa sela'a qauem maye huetalec ana'ana 'alhua, qaq damaye nache huetaigui nam shiỹaxauapi:

² Da Ñim Lo'onatac 'Enauacna, huo'o na ỹanem da qalota lsallaxa qaltaq da llo'oxoyec, nache ỹataqta qaica ca iueetaique, qalaxaye Ñimaye saishet da ỹanem da nque'etaxaachigui 'enauac namayepi, nacherata da nque'etaxaachigui naqa'en namayepi ca lỹa shiỹaxaua. ¡Qaq damaye nataqa'en qaica ca naigui!

³ Ca ỹale ishet da ivi' cien ca llalaqpi, qataq qaỹoqtrec naua vi'iye da nachaalataxac, qaq na'aictoxo' da qaỹoqtec da nachaalataxac, qalaxaye da saishet da nque'etaxaachigui da no'on, qataq da saishet da qaỹaỹamaxatchiguiñi aca nhuachiqui, qaq aỹem shenapec da cam nogotolec maye nleuauec da ñeguiñi ỹactec ñaqa'en da ỹaỹamaqchiguiñi, qaq saq 'ena'am que'eca shiỹaxaua.

⁴ Cha'aye na'aictoxo' da que'eca nogotolec imauec da deqat, huaigui na napalaxa maye huaigui da qaicoua'ai da le'enaxat,

⁵ qataq na'aictaxa da sa ivira da ila'a añi nala', qataq da huo'o ca ỹaỹaten, qalaxaye camaye ỹactec da ỹaỹamaqchiguiñi da nmataxac, saq 'ena'am cam shiỹaxaua

⁶ maye ishet da ivi' caua dos mil vi'iye da nachaalataxac, qalaxaye saishet da nque'etaxaachigui na no'on logoxoshetpi. ¿Qaq peta'a saq 'oonoleco' yem taỹa'a 'enauac nam shiỹaxauapi?

⁷ Ca ỹale ỹataqta saishet da vi'iiguet da lo'onataxanaxac da yaqto' deque'etac, qalaxaye saishet da ivira'a da machiguiñi.

⁸ Cha'aye cam ỹaanaxanaxaic ¿peta'a napacalec cam qaica ca ỹaỹaanapec? Qataq ¿negue'to' cam laueguec cam choxoraq maye ỹaỹaten da dataỹa'aguet nam ivireguetpi da nachaalataxac?

⁹ Qaq ỹactec da huo'o da naigui cam mashe qailota'a, qaq saq 'ena'am cam choche qaipettega. Qalaxaye nataqa'en de'era qaica ca nagui, 'eeta'am da 'eetec da huotaique da qanllañi na la'at.

¹⁰ Nam mashe huo'o nagui, qalaq mashe salcoshe'egue da qaỹauo'o na le'enaxat, nache qaỹaỹaten da lataxac ca ỹale da saishet da dataỹa'aguet cam napacalec da la'añaxac camaye.

¹¹ Qaq huo'o da ỹataqta 'eesa maye, 'eeta': cam huaña da ỹaguec da ntaxaỹaxac, nache huaña nataqa'en da huo'o na na'aqtacpi maye qaica ca naigui, qaq damaye qaica ca qaỹachegoxotaigui.

¹² Qaq 'eesa da, ¿negue't ca ỹaỹaten cam ỹaỹamaxareeta ca ỹale da ñaq huo'o dam saqaỹauec qataq qaica ca naigui nachaalataxac maye 'eeta'am da lataxac ca paqal? Qataq ¿negue't cam ishet da da'aqtaxanem cam taỹa'a camaye qom mashe ileu?