Eclesiastés 10 - La'aqtaqa Ñim Lo'onatac 'Enauacna 2013

Da la'amaqchec da naỹaanec

¹ Aca lotaxañi leuaxai, na'aqchet cam no'on coraxat maye lo'onatac cam coraxat lo'o, qaq nache 'eetec ca saq 'amaqtaq no'oopashec cam nauotaxat, maye qoỹeetega ỹaanaxanaxaic, qataq huo'o naq 'enec.

² Da lquiyaqteỹaxac ca ỹaanaxanaxaic nmitta'a da ỹo'ot ca no'on, qaq cam qaica ca ỹaỹaanapec qalaq nmitta'a da ỹo'ot ca qauem.

³ Cam qaica ca ỹaỹaanapec, qalaq 'enauac nam ỹo'otpi ỹachaxan da lachoxoye'c naua lhuennataxaco, qaq na'aictaxa da 'eetega nachena nam laỹepi nam qaica ca ỹaỹaten.

⁴ Qaq ca nta'a da huo'otaq 'am dalemataỹa, nache saishet qome da qoca'ai ca 'aro'onataxanaxac, cha'aye dam nhualaxavic, nachera da lata' naua lta'al nsomaxaco.

⁵ Qataq huo'o da lỹa sela'a qauem maye huetalec ana'ana 'alhua, qaq de'era maiche chegoqtoigui nam nta'alpi damaye, 'eeta':

⁶ nam qaica ca ỹaỹaanapec, qalaq qoỹanem nam huo'o da la'amaqchec no'onataxanaqa'pi, qaq nam sa nqalatpi qalaq qoỹanem nam qaica ca la'amaqchec no'onataxanaqa'pi.

⁷ Qataq sauaachigui na nlatacpi da netasheguem netalec na caipi, qaq nam 'amaqtaqaicpi qalaq petañi 'eeta'am da nlatacpi.

⁸ Cam ỹo'ot aca lshere, qalaq maiche tangui acamaye, qaq cam itagoxotec ca npaqtaxanaxat, nache ca na'araxanaq inac camaye.

⁹ Cam nchecteguiñi na coma'pi qalaq que'emaxam namayepi. Ca nchecteguiñi ca qo'oipaq, qalaq ishet da que'emaxam camaye.

¹⁰ Aca qachepe da qaica ca llaxa, qaq da sa qaỹe'eguelaxalec da qaiqueuoc acamaye, nache iuen da qana'axannec da qaiquesoxoñi acamaye. Qaq ỹactec da no'on da qaỹaỹamaxatchiguiñi cam qaỹo'ot qairolec da naỹaanec.

¹¹ Ca na'araxanaq da denagaxan da ñaq saxanaxa da qaỹo'oxoỹaqchet, nache qaica ca lauegaxanaxac ca ỹo'oxoỹaqchet camaye.

¹² Naua la'aqtaqa ca ỹaanaxanaxaic ỹataqta nlaqchiguilo da 'achecỹaxac, qaq cam qaica ca ỹaỹaanapec qalaq maiche que'emaxama naua la'aqtaqa.

¹³ Cha'aye da da'aqtaxan, qalaq nda'a't da ỹa'axattac da 'oopashec, qaq nache ivitta'a da ỹataqta qaica ca naiguilo naua la'aqtaqa.

¹⁴ Cam qaica ca ỹaỹaanapec qalaq saiuena'a cam ỹa'axat. Qaq da qaica ca ỹaỹaten cam ñaq taỹa'a da yo'oq, qaq ¿negue't cam ishet da da'aqtaxanem camaye cam ñaq natauo, qom mashe imeuo camaye?

¹⁵ Da ỹapacauec naqa'en da lo'onataxanaxac cam qaica ca ỹaỹaanapec, nache ivitta'a da saỹauatton ca nqa'aic maye taỹaua'a cam huaqta'a't nỹecpi.

¹⁶ ¡Choxoraxaso' cam 'alhua maye ilotague' ca nta'a maye ñaq nogotolec, qataq ya'aqalec naxa da hueta'a na na'ashaxac nam ltauapi camaye!

¹⁷ ¡Qalaxaye ỹataqta machiguiñi cam 'alhua, maye ilotague' ca nta'a maye huo'o naq 'enec qanqa'en, qataq nam ltauapi ipacchigui ye laloqo' da deque'e, da yaqto' qaltaq huo'o da la'añaxac, qalaxaye saishet da yaqto' taxaicpi!

¹⁸ Qaq souaxat da nhualaxa, nache ivira'a da nmetapiguiñi ca nhuo' lapo', qataq souaxat da qansoqtrauo naua nhua'q nache ivira'a da ỹataqta nlaguiñi ca nỹec.

¹⁹ Qaq cam nallec ỹo'ot da namaicỹaxac, qaq nam lataxa qalaq ỹo'ot da tonaxac. Qalaxaye 'enauac de'era iuen aca anom.

²⁰ Saishet qome da qoquetapeguelec ca nta'a, ivira'a ye 'arhuennataxa saishet da 'aurolec camaye, qataq saishet da 'auasaxalec ca qauem 'ara'aqtac ca sallaxanec, na'aictaxa da 'am 'oonolec ca qoueta'a, cha'aye nam qoỹopi huaỹotac ishet da taỹa da da'aqtaxanem camaye.