Deuteronómio 21 - La'aqtaqa Ñim Lo'onatac 'Enauacna 2013

Da huo'o ca ileu da sa qaỹaỹaten ca ỹalauat

¹ Qaq yi'iye 'alhua maye qami' ỹanema qome Ñim Nataxala' maye Qanatamnaxala'ai, da huo'otaq huo'o ca qailalec nalaatac da sa qaỹaỹaten negue't ca ỹalauat,

² nache ca nqueroxonecpi huo'otaq ca nmit na nasouaxashetpi, ca'ateuga da naloqten ca lshecteuga cam huaña que'eca nalaatac, qataq ca sa qaỹapeque cam huaqta'a't nỹecpi maye ỹotta'a't naua nañalo.

³ Qaq ca nqueroxonecpi ca huaqta'a't nỹecpi maye huaña ca sa qaỹapeque que'eca nalaatac, ỹaconeua'a qome aca huaca llale maye ñaq saxanaxa da qaỹauegaxaalec,

⁴ nache ỹauegaxaama ca la'auaxac maye saishet da 'emapec na le'ec, qataq ca ca'amapega't 'alhua maye saxanaxa da qoỹanaxaalec, nache huaña naqa'en da iuaxangui aca nqui'isshe acamaye.

⁵ Qaq huaña nache nachaateuo qome na ntaxaỹaxanaxanecpi leviitapi, cha'aye Ñim Nataxala' lca'aua'a co'ollaxa namayepi da ỹanem da ỹo'ot da ño'oxonnataxanaxac, qataq da ỹan ca no'on la'aqtac da talec naqa'en na shiỹaxauapi, qataq da ỹo'ot ca llec ca cotaxac, qaq cam 'enapec namayepi nacheca qaỹo'ot.

⁶ Qaq da ime, nache 'enauac que'eca nqueroxonecpi, iỹoi' naua lhua'q naloqteetelec aca'aca huaca llale leuaxai.

⁷ Nache 'eeta' qome da la'aqtac: Naua qarhua'q saishet da icoraxatrec naua ltago'q ne'ena shiỹaxaua, qataq saishet da sauanaxagui chaq negue't ca ỹalauat namaye.

⁸ Qaq 'Am Nataxala', 'auchoxoren qome na Israel le'ecpi maye 'aralamaxatpi, cha'aye mashe sogote co'ollaxa da 'ausouec, qataq saishet da lasouaxashet 'anqa'en da huecolde'c naua ltago'q ne'ena shiỹaxaua maye qaica ca ỹasouaxat. Qaq 'era qome da 'eetec da yaqto' saishet da qami' qanmaxaleguete da l-leuaxa que'eca shiỹaxaua,

⁹ qataq qauo'oche qome ca ỹaỹamaqchiguiñi da qami' ỹalletaguilo Ñim Nataxala', nache sa saishet da qami' taleguete que'eca nasouaxashet da qaicoraxatrec caua ltago'q ca qaica ca ỹasouaxat.

Da lataxac da qaỹaroneguet aca noxona

¹⁰ Qaq da ivita da qanalaache' ca qampa'aguenaxauaipi, nache Ñim Nataxala' maye Qanatamnaxala'ai da qami' ỹanema da qoroxoñiqui camayepi,

¹¹ qaq da qoñiita da huo'o aca ila'a aca 'alo maye ỹataqta 'onaxai, da ỹalectaigui ca qoroxoñiqui, nache da nqopita qataq 'auaroneguet acamaye,

¹² nache ỹauegueua'a ca lma', nache ỹamaxalec da nmatta na laue da ichec, qataq iche'c naua nna'ache,

¹³ qataq nqa't naqa'en caua alogo maye ỹaatrañi co'ollaq noxona. Qataq hua'aqta'a acamaye da choche netaña ca lma' da nỹeetapeguelec ca lta'a, qataq aca late'e, ca 'oonolec ca'agoxoic. Qaq da ime, nache huaroneguet acamaye, da yaqto' nache lhua.

¹⁴ Qalaxaye saiuena'a da sa nqopita acamaye, nache hua'aqta'a qome da jec, qalaxaye saishet da imen, huo'otaq da ỹauo'o l-lata cha'aye mashe ime da lhua acamaye.

Da 'enec ca na'auaxanec ñalec

¹⁵ Da huo'o ca ỹale da dos caua lhua't, nache da 'oonole aca ỹataqta ỹauotec, qaq aca lỹa saishet da ỹauotec. Qalaxaye da 'enauaque caua lhua't da deco'oi', nache ca la'auaxanec llalec caamaye nache llalec aca saishet da ỹauotec,

¹⁶ qaq da ivita cam na'a'q da que'eca shiỹaxaua icolaxachigui da lsallaxa, nache saishet qome da 'enapec da la'auaxanec llalec ca llalec aca lauotaqte lhua, cha'aye da nache 'eetec de'era, nache saishet da ipacchigui naqa'en da 'enec ca ỹataqta la'auaxanec llalec maye llalec aca lhua maye saishet da ỹauotec, cha'aye nacheca ca ỹataqta 'eesa la'auaxanec llalec.

¹⁷ Nache camaye huo'o naq 'enec naqa'en qome que'eca llalec maye ỹoqta 'eesa la'auaxanec llalec, qataq ỹactec qome ca ỹanem lsallaxa camaye, cha'aye 'itchiguiñi da ỹoqta 'eesa la'auaxanec llalec.

¹⁸ Qaq da huo'o ca ỹale da huo'o ca llalec da sa na'axaỹaxan, qataq saishet da ỹalaq, saishet da ỹalaxaguet ca 'enapec ca lta'a qataq aca late'e, na'aictaxa da qaiuaxaatac qalaq ñaqaiyeta sa ỹalaq,

¹⁹ nache ca lta'a qataq aca late'e camaye, ỹauegueua'alo ca nqueroxonecpi maye netaña ca ñegueuo ca huaqta'a't nỹecpi,

²⁰ nache caamaye da, 'eeta': Ne'ena qoyalec, namaye saishet da na'axaỹaxan qataq saishet da ỹalaq, ỹataqta saishet da qomi' ỹalaxagueta, namaye choche ỹe'en naxa ana alom souaxat da nỹomaxac na lataxa.

²¹ Nache 'enauac qome ca shiỹaxauapi maye netaña que'eca huaqta'a't nỹecpi, nache ỹalauat qome camaye ira'a ca coma' da ỹasaq. Qaq 'era da 'eetec qome da imeuo qanqa'eñi que'eca qauem maye qami' huetanguilo, yaqto' 'enauac na Israel le'ecpi da ỹaỹaten de'era, nache huo'o qome da lcolanaxa.

²² Qaq da huo'otaq huo'o ca dalaataxan, nache camaye da qaicoñerasheguemec aca qo'oipaq da qaỹalauat,

²³ nache saishet da iviraigui qanqa'eñi ca pe da naxattañi da netasheguemec aca qo'oipaq, nacherata da nache qaulayiiñi que'eca na'a'q. Cha'aye ca qaicoñerasheguem da qaỹalauat, camaye mashe talec da qauem la'aqtac Ñim Lo'onatac 'Enauacna. Qaq ỹoqo'oye saishet qome da qana'axache yi'iye 'alhua maye qami' ỹanema qome Ñim Nataxala' maye Qanatamnaxala'ai.