Deuteronómio 14 - La'aqtaqa Ñim Lo'onatac 'Enauacna 2013

Nallecpi maye qui'itta qataq na saishet da qui'itta

¹ Ñim Nataxala' maye Qanatamnaxala'ai, Ñimaye qami' llalqa. Qaq ỹoqo'oye da huo'o ca ileu, nache saishet da huo'o ca ipelec na lo'oc, qataq saishet da huo'o ca namarec na lqaic souaxat ca lasouaxac.

² Cha'aye Ñim Nataxala' maye Qanatamnaxala'ai ỹataqta qami' iỹotaugalo, Ñimaye qami' lca'agui'she co'ollaq lca'agui na shiỹaxauapi ana 'alhua da yaqto' ỹataqta qami' lalamaqa'ate.

³ Saishet qome da qollequi ca shiguiỹac maye ỹataqta qaiqaiga.

⁴ Qaq 'ena na le'enaxatpi na shiguiỹacpi maye ishet qome da qollequi: Huaca, qagueta, quetaq,

⁵ chegaxango, ñi'imshe, quetaq, nauenec, quetaq no'onaxa lashe, caỹalo, búfalo, qataq na qagueta lhuaraic no'onaxa le'ec.

⁶ Nataqa'en ishet da qollequi camachaqca shiguiỹac maye ishet da ye'eguelaqtaxan, qataq colaxaguilo naua nna'ache,

⁷ qalaxaye saishet qome da qollequi ana nauanaxanaxa, lerma, soxona late'e, cha'aye namaye ishet da ye'eguelaqtaxan, qalaxaye saishet da colaxaguilo naua nna'ache, qaq nacherata qauqaiquiỹa qome namayepi.

⁸ Qataq ana cos na'aictaxa da colaxaguilo naua nna'ache, qalaxaye saishet da ye'eguelaqtaxan, nache saishet da qollequi qome anamaye, qataq saishet da qauashilligui da ileu, nacherata da qauqaiquiỹa.

⁹ Qataq 'enauac na huetangui na 'etaxat, ishet da qollequi na huo'oi naua laua'ttole qataq ana laso,

¹⁰ qalaxaye na qaicaua naua laua'ttole qataq ana laso, saishet da qollequi, nacherata da qauqaiquiỹa namayepi.

¹¹ Qaq na maỹopi, ishet da qollequi 'enauac na qui'itta,

¹² qalaxaye 'ena qome na saishet da qolliqui: Huole, qoỹo lo'o, qataq na nỹaq lo'o,

¹³ qoỹo lo'o lta'araic, vi'ic, qataq na laỹe qoỹo lo'opi,

¹⁴ qataq na ỹotta'a't teguesanpi,

¹⁵ mañec, chiyet, taqaqole, qataq na ỹotta'a't qoỹo lo'o'pi,

¹⁶ huoqo', dolole, huategra,

¹⁷ huauo', ỹanegralo, teguesan 'etaxaale'ec,

¹⁸ lamaxañi, 'alaxaraq, pichiñi, micai.

¹⁹ Qataq na ato' le'ecpiolec maye ishet da huaỹo, saishet da qollequi qome, nacherata da qauqaiquiỹa.

²⁰ Qaq na qoỹopi maye qui'itta nachena na ishet da qollequi.

²¹ Qalaxaye saishet qome da qollequi ca shiguiỹac leuaxaic, nacherata da qaỹa'añim da chec ca chegaqauec maye qami' netaiguilo, huo'otaq qaumiñiỹot ca lỹa chegaqauec maye chochaq queuoxoic, cha'aye Ñim Nataxala' maye Qanatamnaxala'ai, qami' iỹotaugalo da ỹataqta qami' lalamaqa'ate, ỹoqo'oye saishet da qauallicñiiguet na lche' aca late'e, ca quetaq llalec da qaỹa'añiiuaq.

Da lataxac da qaiỹotauga aca diezmo

²² Qaq ye 'oonolec vi'i nache huetoigui da qauỹochiỹauga qome aca diezmo maye chegaqaigui ana ala ca qorañiguishiqui.

²³ Qaq da qollequi aca diezmo maye chegaqaigui na ala ca trigo, lataxa, aceite, qataq ca la'auaxanec llalec ca qareloi: huaca qataq aca qagueta, nache ỹauaachigui qanqa'eñi Ñim Nataxala' maye Qanatamnaxala'ai, yaqto' nache 'eetai' qome da huo'o naq 'enec qanqa'eñi Ñimaye.

²⁴ Qaq qom mashe qami' ỹanema da lchoxonnataxanaxa Ñim Nataxala', qalaxaye da sa qauañoxochi da qaroiua'a aca qarachetaqtaxanaqche, souaxat da qaỹoqta que'eca lca'ateua'a da lanataqa' Ñimaye,

²⁵ nache qaumiñi camaye, qaq aca'aca lasheue, nache qaroiua'a cam lca'ateua'a da lanataqa' Ñim Nataxala'.

²⁶ Qaq aca lasheue que'eca qaumiñi nachetaqtaxanaxat, nachaca aca qaumiñi da qausheenaxañiỹa ca huaca, qagueta, lataxa, huo'otaq camachaqca lỹa lataxa da yaqto' qami', qataq ca qaỹa'alquipi qauo'oche ca nquia'axac da qavio'oxoyiñi Ñim Nataxala' maye Qanatamnaxala'ai.

²⁷ Qataq saishet da sa qautauañi na leviitapi maye qami' netaiguilo, cha'aye namayepi qaica ca lalamaxat na'alhua, saishet da 'eeta'ama qami'.

²⁸ Qaq da inoxoorec caua tres vi'iye, nache qalaỹoñiỹa't aca diezmo maye qaiỹotauga ye 'oonolec vi'i, nache qauaỹamaxache, qauachiỹaña ca naỹamaqtaxanaqa' maye naigui que'eca huaqta'a't nỹecpi maye qoñiitaigui,

²⁹ yaqto' da anac na leviitapi maye qaica ca lalamaxat na'alhua, qataq ca chegaqauecpi, saploqpi, qataq aca pa'aipi maye netaña que'eca huaqta'a't nỹecpi maye qoñiitaña, nache ishet nataqa'en da deque'e, ivitta'a da ỹataqta comaraxaicpi. Yaqto' qami' taleguete qome da lchoxonnataxanaxa Ñim Nataxala', nache 'onaxaic naqa'en 'enauac na qauo'oche.