Deuteronómio 13 - La'aqtaqa Ñim Lo'onatac 'Enauacna 2013

¹ Qaq da huo'otaq huo'o ca qami' nvireua'alo da 'eetega na'aqtaxanaxanec, huo'otaq choxonaxaic, qataq da ỹa'axat ca na'anec, huo'otaq ca ỹo'ot da na'aalaxa.

² Qaq da huo'otaq ipacchigui que'eca na'anec, huo'otaq que'eca ỹo'ot da na'aalaxa maye ỹa'axat camaye, nache da huo'otaq qami' 'enapegalo, 'eeta': Qolaq, ñeqo'onaxa ye ỹaqa'a atamnaxala'pi maye sa qauauañiỹapega yaqto' ñatamnaqot.

³ Nache saishet qome da qaualaqaiguet que'eca 'eetega na'aqtaxanaxanec huo'otaq choxonaxaic. Cha'aye Ñim Nataxala' maye Qanatamnaxala'ai choche qami' ỹe'egueeta'ape da 'eesa da ỹataqta qauauochec, qataq qaumachiỹot da qarquiyaqteỹaxaqui qataq da qanachaalataxaqui.

⁴ Qaq nacheñita Ñim Nataxala' maye Qanatamnaxala'ai da qoquiigue qome, qataq qavio'oxoyiñi qaupaquiichiguilo naua lamaxasoxonaxaco qataq qaualaqaigueta, ỹataqta qauo'oche' naua 'ena'ape, qataq saishet da qoquiỹa'ai Ñimaye.

⁵ Qaq que'eca na'aqtaxanaxanec, huo'otaq choxonaxaic, camaye iuen da qaỹalauat souaxat da huotaique da sa qaualaqaiguet naqa'en Ñim Nataxala' maye Qanatamnaxala'ai, Ñim qami' nqateeguesopa co'ollaxa da qanlataguiiqui ye Egipto. Qaq 'era qome da 'eetec da imeuo qanqa'eñi 'enauac ca qauem maye qami' huetanguilo. Cha'aye que'eca na'aqtaxanaxanec huotaique da qoquiỹa'ai da lataxac da ñecỹaxac maye qami' ỹamaxaleguete Ñimaye.

⁶ Qaq da huo'otaq anac ca qaralamaxache qarqaỹai, qaỹa'alliqui, qaỹa'alli, qarhuai, huo'otaq ca ỹoqta qanauochaxauai, da nshetaique da qami' ỹatenache't, 'eeta': Qolaq, ñeqo'onaxa ye laỹepi atamnaxala'pi, atamnaxala'pi maye qami' qataq so hua'au qarta'ailpi sa ỹauauanapega,

⁷ yem natamnaxala'pi ye shiỹaxauapi maye netañalo naua sa qaỹapigui 'aleu', qataq naua qaỹoqtalo loga'te na 'alhua,

⁸ nache saishet qome da qaualaqaiguet, qataq saishet da qana'axañiỹa. Saishet da qauchoxoreñiitac, huo'otaq da qo'oxocheettapiguiñi,

⁹ nacherata da qaualauache camaye. Qaq 'oonolec qome ca hua'aulec camaye da ỹalauat, ime, qataq nca'ataxanauo ca laỹepi shiỹaxauapi.

¹⁰ Qalaxaye qauroilec ca coma' da qauasaqai ivitta'a da ileu. Cha'aye huotaique da qoquiỹa'ai Ñim Nataxala' maye Qanatamnaxala'ai maye qami' nqateeguesopa ye Egipto yem huaña co'ollaxa da qami' nlataqa.

¹¹ Yaqto' qom 'enauac na Israel le'ecpi da ỹauaachigui de'era, nache huo'o qome da lli'iỹaxa, huaña nache saishet da huo'o ca ỹe'eguelaxalec da ỹo'ot ca qauem.

¹² Qaq da huo'o ca qaua'aqaitapeguelec yi'iye shiỹaxauapi maye netaigui ye huaqta'a't nỹecpi maye qami' ỹanema qome Ñim Nataxala' maye Qanatamnaxala'ai,

¹³ da huo'otaq sa ỹalaxaguet Ñim Lo'onatac 'Enauacna, nache 'enapega ca laỹepi, 'eeta': Qolaq ñeqo'onaxa da ñatamnaqot ye laỹepi atamnaxala'pi, maye sa qauauañiỹapega,

¹⁴ qaq nache qauchemaxachiỹaique qome camaye. Qanmichiỹaique nache qaunache, qaq da ỹoqta 'eesa da ỹo'ottac cam qaiqaiga maye qami' huetanguilo,

¹⁵ nache qairolec ca ỹeelonec da qaỹalauat 'enauac que'eca shiỹaxauapi maye netaigui que'eca huaqta'a't nỹecpi, qataq ỹataqta qailaxachigui 'enauac cam huo'o, qataq qaỹalauat nataqa'en ca na'atetpi.

¹⁶ Ime, nache qalaỹoñiỹa't ca logoxoshetpi camayepi nache qauroỹa ca naponqa'. Nache 'enauac que'eca huaqta'a't nỹecpi, qataq que'eca nogoxoshetpi qauavigaxache. Qaq camaye nache nachetaqtaxanaxat qaỹavigaxatta da qoỹanot Ñim Nataxala'. Qaq que'eca huaqta'a't nỹecpi nache 'eetai' qome da lapootasheguem, nache saishet da qaỹe'eguelaxalec da qano'oxoosheguem.

¹⁷ Qataq saishet qome da huo'o ca qauacoñiỹa ca mashe qoỹan da qanlaxaañi. Yaqto' Ñim Nataxala' saishet da qami' taleguete da layeloxo, nacherata da qami' ichoxore'n, nache qalota naqa'en ca qaỹa'alquipi, cha'aye nachera co'ollaxa da la'aqtac Ñimaye, maye ỹanem co'ollaxa so hua'au qarta'ailpi.

¹⁸ Qaq 'era da 'eetec qome da ỹataqta qauo'oche' naua ỹaỹamaqchiyiñi qataq qaualaqaigueta naua lamaxasoxonaxaco Ñim Nataxala' maye qami' samaxaleguete nagui.