Deuteronómio 11 - La'aqtaqa Ñim Lo'onatac 'Enauacna 2013

Da la'amaqchec Ñim Lo'onatac 'Enauacna

¹ Qauauochec qome Ñim Nataxala' maye Qanatamnaxala'ai, qataq qauo'oche nam 'eetega da qaỹo'ot, lqataxacpi, na lapaxañi lataxacpi, qataq na lamaxasoxonaxacpi.

² Qataq qantooñita'ac da nache qami', maye qauauañiichigui co'ollaxa da la'añaxac, qataq da la'amaqchec Ñim Nataxala' maye Qanatamnaxala'ai, qaq saishet da nachena na qaỹa'alquipi na nmate' da 'eetec da qaỹaỹamaxaañi ca nsomaxac,

³ qataq saishet da ỹauangui so na'anecpi, qataq so lta'araic ỹo'otpi maye ỹo'otec co'ollaxa so faraón, qataq 'enauac so netaña ye Egipto,

⁴ qataq da ỹo'otec so nalleppi so Egipto le'ecpi, qataq so lalo caipi qataq aso laigonapi maye nalaataxaquipi, co'ollaq iyiiñi naqa'en somayepi, huangui aso Auaxai Togaxarai, souaxat da qami' icaata'ape. Nache Ñim Nataxala' 'enauac da nlaxatchiguiñi somayepi, choche ivitta'a nagui.

⁵ Qataq qantooñita'ac 'enauac na qami' ỹo'oteque Ñimaye co'ollaq huaña ye toolec 'alhua, nache ivitta'a da qanviyiỹa ne'ena,

⁶ qataq da ỹo'oteque Ñimaye soua Datán qataq so Abirán, som llalqa so Eliab, maye chegoxoguet so Rubén, qataq da 'eetec co'ollaq dacagueñi naqa'en ana 'alhua, nache imatchiguiñi da ỹapolec somayepi, l-llañe' so llalaqpi, lpe'lpi qataq so logoxoshetpi qataq 'enauac so lalopi somayepi, nache ỹauaachigui 'enauac na Israel le'ecpi.

⁷ Nache qami' ỹataqta qauauañiichigui co'ollaxa 'enauac so lta'araic llo'oxoyec maye ỹo'ot Ñim Nataxala'.

Da lyacỹaxac ye 'alhua maye qaỹachaxanapec

⁸ Qaq ỹoqo'oye ỹataqta qaupaquiitelec qome 'enauac na namaxasoxonaxacpi maye qami' sanema nagui, yaqto' huo'o da qara'añaxaqui da qaua'axasoxoñiilec ye tala Jordán, da yaqto' qoñiỹalec yi'iye 'alhua,

⁹ qataq yaqto' qaỹoqtec da qanachaalataxaqui da qoñiitalec yi'iye 'alhua, maye Ñim Nataxala' ỹachaxanapecot co'ollaxa so hua'au qarta'ailpi qataq na chegoxoguetpi somayepi, yem 'alhua maye huaña da sa qoue na huaca lche' qataq te'esaq lli'i.

¹⁰ Qaq yi'iye 'alhua maye qoñiỹalec qome, yemaye saishet da 'eeta'am ye Egipto maye qauachegoqoichiguiña; maye huaña co'ollaxa da qaỹa'añiiñi na qorañiguishequi, nache maiche qaucoyiitalec na 'etaxat, 'eeta'am catai' nañiguishe lma',

¹¹ qaq yi'iye 'alhua maye qoñiỹalec qome, yemaye huo'o ana qasoxonaxapi qataq ca'amapega't 'alhua, nache na auot maye chegoqo'ot na piguem, namaye maiche icottalec yemaye.

¹² Qataq Ñim Nataxala' nacheñi Ñim ilotague' yemaye, qataq ỹalletalec 'enauaque naua na'axa'te ivitta'a da inoxonec ye vi'i.

¹³ Ỹoqo'oye da qaupaquiichiguilo naua namaxasoxonaxaco maye qami' sanema nagui, qataq da qauauochec Ñim Nataxala' maye Qanatamnaxala'ai, qataq ỹataqta qaumachiỹo'ot da qarquiyaqteỹaxaqui qataq da qanachaalataxaqui,

¹⁴ nache Ñimaye ỹataqta ipacchiguilo naqa'en naua laloxoqui' na auot, ye cotap qataq ye nauoxo, yaqto' ishet da qanqache aca ala ca trigo, qataq huo'o na lataxa qataq na aceite.

¹⁵ Nataqa'en Ñimaye ỹo'ot qome da ñaxat na 'auaqpi naua no'onaxaye da yaqto' huo'o na aloq na qareloipi, qataq qauqui'iitac nache ỹataqta qami' comaraxaiqa.

¹⁶ Qalaxaye maxatchaxa qome, saishet da qanashiñi da qami' qaỹatenache't, qataq saishet da qoquiỹa'ai Ñim Nataxala' da yaqto' qaua'ayiỹoto naua qarllectelli' da qanatamñiỹot ca laỹepi atamnaxala'pi,

¹⁷ ten qom qami' dalemataỹalo Ñim Nataxala', nache saishet da namaq na auot; nache saishet da ñaxat ca nañiguishec, huaña nache qami' ỹalaua't ca nqouaxa yi'iye no'on 'alhua maye qami' ỹanema qome Ñim Nataxala'.

¹⁸ Qataq ỹataqta qauachiỹaiguilo naua qarquiyaqchilli', qataq da qantoonaxaqui naua ỹa'aqtaqa, qataq 'eeta'am qanqa'eñi ca la'anaxat da qaucoñiyiitaguilo naua qarhuaxayilli', qataq naua qarata'apilli'.

¹⁹ Qataq qauapaxaguiñic de'era ca qaỹa'alquipi, da qoñiitaña ca qarmaye, huo'otaq da qoquiitague' ca nqa'aic, qataq da qannañiiñi ye pe, qataq da qoñiisheguem ye nte'eta.

²⁰ Qataq qai'iyiilec ana lauoqtepi ca qarmaye qataq caua laso'omi,

²¹ yaqto' qaỹoqtec da qanachaalataxaqui qataq ca qaỹa'alquipi, 'eeta'am da 'eetec na piguem da qaica ca loga't da qoñiitalec yi'iye 'alhua, maye Ñim Nataxala' ỹachaxanapecot co'ollaxa da ỹanem so hua'au qarta'ailpi.

²² Qaq da ỹataqta qaualaqaiguet 'enauac ne'ena namaxasoxonaxacpi maye qami' sanema nagui, qataq qauauochec Ñim Nataxala' maye Qanatamnaxala'ai, qataq qoquiitegue da lataxac da llecỹaxac Ñimaye,

²³ nache qauauañiichigui qome da Ñim Nataxala' ỹo'orauec ye ỹotta'a't shiỹaxauapi, huaña nache qoroxoñiqui ye ỹotta'a't nhuo' le'ecpi maye ỹataqta qalota qataq 'añaxaicpi.

²⁴ Nache 'enauac da qaralamaxache qome ye 'alhuapi maye qauapiilec. Qaq naua loga'te ye qana'alhuai chegoqchiguiña qome ye toolec 'alhua nache ivitta'a ye Líbano, qataq chegoqchiguiña ye tala Éufrates, nache ivitta'a aso auaxai Mediterráneo.

²⁵ Nache qaica qome ca ishet da qami' dataỹa'agueta, cha'aye Ñim Nataxala' maye Qanatamnaxala'ai ỹo'ot da qami' qañi'iỹalo, qataq iviloxolaqchet naqa'en da lcolanaxa 'enauac na shiỹaxauapi, nache ipacchigui qome da la'aqtac Ñimaye.

²⁶ Qaq nagui qami' sanema da maiche qalca'aiua'a ca qauacoñiiguet: nchoxonnataxanaxa, huo'otaq da qauem.

²⁷ Da nchoxonnataxanaxa qauacoñiiguet qome da qaualaqaigueta naua lamaxasoxonaxaco Ñim Nataxala' maye Qanatamnaxala'ai, nam qami' samaxaleguete nagui da qaualaqaigueta.

²⁸ Qaq da qauem, qauacoñiiguet qom saishet da qaualaqaigueta naua lamaxasoxonaxaco Ñim Nataxala' maye Qanatamnaxala'ai, souaxat da qoquiỹa'ai da lataxac da ñecỹaxac maye qami' samaxaleguete nagui, nache qoquiigue ca ỹaqa'a atamnaxala'pi maye sa qauauattoñi.

²⁹ Qaq Ñim Nataxala' qom mashe qami' inoxonaqcheteua'alo yi'iye 'alhua maye qami' ỹanema da yaqto' qoñiỹalec, nache qauasaqailec qome da nchoxonnataxanaxa añi qasoxonaxa Guerizín, qataq qauasaqailec da qauem añi qasoxonaxa Ebal.

³⁰ Qaq ñi'iñiua qasoxonaxal ñiimaye nera'atague da le'ego ye tala Jordán, pa'aira'ague da avit ye na'alhua ye cananeopi, maye nalotta ye Gilgal qataq huaqta'ai' ye More.

³¹ Qaq mashe yaqta'a da qoqui da qaua'axasoxoñiilec ye tala Jordán, da yaqto' qoñiỹalec ye 'alhua maye qami' ỹanema Ñim Nataxala', qaq qom mashe qoñiỹalec yemaye,

³² nache ỹataqta qaualaqaiguet qome 'enauac na nqataxacpi, qataq na qalapaxañi lataxacpi maye qami' sanema nagui.