Daniel 8 - La'aqtaqa Ñim Lo'onatac 'Enauacna 2013

Da nauanaqchec co'ollaq qaila'a so qagueta lhuaraic qataq so quetaq lhuaraic

¹ Qaq co'ollaq mashe ivi' soua tres vi'iye da lo'onataxanaxac da nta'a so Belsasar, nache aỹem Daniel huo'o so lỹa ỹauanaqchec, qaq nache lỹa so hua'auñi co'ollaxa ỹauanaqchec.

² Qaq so sootaigui so ỹauanaqchec, nache 'eeta'am ñaqa'en da soota'a ye huaqta'a't nỹecpi ye Susa, maye huaigui ye 'alhua Elam, maye hueto'ot na loigue aso tala Ulay.

³ Qaq so ñamatasheguem nache sela'a so qagueta lhuaraic neto'ot na loigue aso tala. Qaq somaye dos soua lcoue logorail, qaq aso 'oonole soomaye nca'ataxanauo da ñaxat, qalaxaye ỹataqta logorai napacalec aso lỹa.

⁴ Nache sela'a so qaỹoqta qagueta lhuaraic iquetogoqtapeegue da nala' lliguisheguem, qataq da sheu', qataq da taguiñi, nache qaica ca lỹa shiguiỹac da ishet da dataỹa'aguet, huo'otaq da naneltaxaneguet da lquetogoqtaxanaxac somaye. Qaq maiche ỹoiqueetac cam ỹataxaateuga ca ỹo'ot, qaq nache nquictauec da la'añaxac.

⁵ Qaq so ñaq seuennataxaateguelec som sauaachigui, nache chegoqtegue da nala' lliguiñi so quetaq lhuaraic, nache ỹataqta chegaqañi eco' ichiỹaña na 'alhua souaxat da layaqchec. Qaq se'eso quetaq lhuaraic, huo'o aso 'oonole late'erai lcoue, ñichiguinguilo naua la'ai'te,

⁶ qaq so ivirot so qagueta lhuaraic maye dos soua lcoue, maye sela'a co'ollaxa da hueto'ot na loigue aso tala, nache ỹataqta imatalec da la'añaxac da iquetogoqot,

⁷ nache ỹacagaxa't soua dos lcoue, qaq som qagueta lhuaraic ỹataqta qaica ca la'añaxac da dataỹa'aguet somaye. Ỹoqo'oye so quetaq lhuaraic huetaiya' naqa'en so qagueta lhuaraic, nache petapigui, nache somaye qaica ca ishet da nca'alaxatec.

⁸ Qaq som quetaq lhuaraic, ỹataqta nquictauec da la'añaxac, qalaxaye so ivita da ỹataqta lta'araic da la'añaxac, nache aso late'erai lcoue huacaguec, qaq so lma' asomaye nache chegoqchiguiñalo soua cuatro lcoue maye ilotra'ague naua cuatro laỹel ana 'alhua.

⁹ Qaq aso 'oonole soomaye, nache chegoqtoigui da ñaxatec aso lỹa lcoue maye saq 'amaqtaq maye nquictauec da lañaxataxac, nache ivira'ague da sheu', qataq da nala' lliguisheguem, qataq dam pa'aigue ye ỹataqta 'onaxaic 'alhua.

¹⁰ Qaq asomaye ye ỹataqta nquictasheguem, nache iviro'ot so alleppi maye hueto'ot na piguem, nache huo'o aso naañi naqa'en ana huaqaañipi, nache petapigui,

¹¹ qaq nataqa'en ivira'a da npa'aguene' so lataxala' se'eso alleppi, qataq ỹa'axaneguet da nachetaqtaxanaxac maye qaỹo'ottac naxa ye na'a'q, qataq ishepaxanaqchet so lma' naxa da ño'oxonnataxanaxac.

¹² Qaq souaxat da qaica ca iren, nache ỹo'ot da so nalleppi, ỹo'ot na lanataqa'pi da hueta'a naqa'en som huaña naxa da qoỹaneuo na nachetaqtaxanaxatpi maye qaỹavigaxatta, qataq huetaiya' naqa'en da 'eesa lataxac. Qataq ỹo'ot 'enauac nam maiche 'eetapeguecpi, nache 'enauac nam ỹo'otpi nquictasheguem naqa'en somaye.

¹³ Qaq huaña nache sa'axaỹa so 'oonolec namaxashec piguem le'ec, da inattac so lỹa namaxashec piguem le'ec, 'eeta': «¿Chaq lagui qaq ime de'era semeenaqtac nachetaqtaxanaxac ye na'a'q maye qaỹachalec naxa añi nca'atoxonaxalate? ¿Chaq laỹe' qome qaq ime dam qauem nasouaxashet da qoỹaategueua'a añi atamnaxaqui maye lalamaqte Ñim Nataxala' qataq nam ỹa'amaqteetac Ñimaye da yaqto' qaỹapetapigui?»

¹⁴ Nache so lỹa namaxashec piguem le'ec ỹasat, 'eeta': «Qomye qom ivittrec caua dos mil trescientos avit, qataq nte'eta, nache qaiqui'itaxat qome añi atamnaxaqui.»

¹⁵ Qaq aỹem Daniel so ñaq semeteetac se'eso ỹauanaqchec qataq sauotaique da saỹaten cam naigui, nache nque'elaxatta da nachattot aỹem so 'eeta'am na shiỹaxaua,

¹⁶ nache sa'axaỹa so lavilỹaxac na shiỹaxaua chemaqteuga aso tala Ulay maye, 'eeta': «Gabriel, 'aua'aqtaxanem de'era shiỹaxaua dam naigui so lauanaqchec.»

¹⁷ Qaq huaña, nache somaye aỹem nquigueua'a. Qaq aỹem ỹataqta she'e, nache sa'alyiñi naua illecte, seviraxata'aguet na ỹatap na 'alhua, qalaxaye somaye aỹem 'enapega, 'eeta': «'Am shiỹaxaua llalec, iuen da 'auaỹateeta de'era 'arauanaqchec da ỹa'axatta'alo caua pa'atrec na'axa'te.»

¹⁸ Qaq so ñaq aỹem da'aqtaxaateguem somaye, nache aỹem secopche, nache sootaiya', qalaxaye somaye aỹem ỹacoosop, nache aỹem nachalataxaañi,

¹⁹ nache aỹem 'enapega, 'eeta': «Aỹem 'am sa'aqtaxanem cam qanayeuaigui qom inoxonec cam huaigui da layeloxo Ñim Lo'onatac 'Enauacna, cha'aye so 'arauanaqchec ỹa'axatta'a cam loga't 'enauacna.

²⁰ So qagueta lhuaraic maye dos soua lcoue, somaye naigui nam nta'alpi ye Media qataq ye Persia.

²¹ Qaq so quetaq lhuaraic, qalaq naigui ñi nta'a ye Grecia, qaq aso late'erai lcoue somaye, maye ñichiguinguilo soua la'ai'te, qalaq nacheca qome ca la'auaxanec nta'a.

²² Qaq soua cuatro lcoue maye nnoxooyishegue'm co'ollaq huacaguec aso hua'auñi lcoue, qalaq naigui da ne'ena 'alhua huo'oi qome caua cuatro lỹa't nta'al, qalaxaye saishet da 'eeta'am da la'añaxac som hua'auchiguiñi.

²³ Qaq qom ivita ca loga't da la'añaxac que'ecaua nta'al, qataq qom mashe ỹapacauec da qauem, nache nachaañi qome ca 'oonolec nta'a maye qaica ca iren, qataq ño'oxonnaxaic nache talec qome da no'onataxanaxac.

²⁴ Qaq camaye ivira'a qome da ỹataqta 'añaxaic, qalaxaye saishet da nachera da maiche la'añaxac, camaye ỹataqta ilaxachigui qome 'enauacna, qataq da huo'o ye ỹo'ot qalaq dauegaxaatai'. Ilaxachigui qome 'enauac nam shiỹaxauapi maye 'añaxaicpi qataq cam qalota na nhuo' le'ecpi maye lalamaxat Ñim Lo'onatac 'Enauacna.

²⁵ Qaq souaxat da sanqalat, nache da latenataxanaxac dauegaxaatai'. Qataq nlaxagui qome da ño'oxonnaxac, nache ique'elaxat qome da ỹalauat ca qalota shiỹaxauapi maye pe'etega camaye. Qataq dataỹa'aguet qome ca lta'a na nta'alpi, qalaxaye camaye qailaxachigui qome.

²⁶ Qaq som 'arauanaqchec co'ollaq 'am qaỹachaxana so avit qataq nte'eta, somaye ỹataqta 'eesa, qalaxaye 'am saishet qome da 'aua'axattac, cha'aye somaye ipacchigui qome da yo'oq qom qaỹoqteguelo naua vi'iye.

²⁷ Qaq Aỹem Daniel, ñanomteguet co'ollaxa da qaica ca ỹa'añaxac, nache huo'oi soua na'axa'te da aỹem sa no'on. Qaq so huo'o da ỹa'añaxac nache soosheguem da qaltaq souapegue' nam no'onatacpi maye aỹem ỹamaxalec so nta'a. Qalaxaye ỹataqta saishet da samaguiñi, souaxat se'eso ỹauanaqchec co'ollaxa, cha'aye aỹem saishet da saỹateeteguet somaye.