Daniel 12 - La'aqtaqa Ñim Lo'onatac 'Enauacna 2013

Qom ivita ca laloqo'

¹ Qaq qom ivita ca laloqo' nache nachaxan so Miguel, som 'amaqtaqaic namaxashec piguem le'ec maye mpaxattalec nam 'arhuo' le'ecpi. Qaq que'eca na'a'q huo'o qome ca lta'araic naquicoxo, qaq camaye saỹauanego' da huo'o ca 'eeta'am, chegoqta'a co'ollaq cheta'ague da huo'o 'enauac na ỹotta'a't shiỹaxauapi. Qom ivita que'eca laloqo', nache nca'alec qome 'enauac cam 'arhuo' le'ecpi maye nanettalec ca le'enaxat aca nere.

² Qalota qome cam do'ochetapi maye huetangui aca nhuachiqui, qalaq nlouec qome: qaq huo'o qome ca chochaq tatec da nca'altauec qataq huo'o qome ca nca'alec qalaxaye nque'etaxangui ca chochaq tatec la'agaxa qataq ca qauem.

³ Cam shiỹaxauapi maye ỹaanaxanaxaicpi, cam qalota co'ollaxa ca quegue naqa'en ca no'on nqa'aic, camayepi qashelectapiguiñi qome 'eeta'am na piguem, chochaq tatec qome da qashelectapiguiñi 'eeta'am ana huaqaañipi.

⁴ Qalaxaye 'am Daniel, saishet qome da 'aua'axattac de'era, qataq 'aunana't ana'ana nere, nache 'autoqoolec aca 'ara'anaxanaqte da 'auapogui, choche ivitta'a qome da ivita cam loga't. Qalota qome ca shiỹaxauapi maye coleetega't, nmittaique da nquigaxatec da lauattonaxanaxac.

⁵ Qaq aỹem Daniel, sela'alo soua lỹa't dos ỹale't nachattrañi, so 'oonolec neto'ot na loigue so tala, qaq so lỹa qalaq neto'ot so lỹa loigue.

⁶ Qaq so 'oonolec soomaye, inat so ỹale maye ỹaatrañi soua alogo maye chegaqaigui na lino, som nachattañi petalec so 'etaxat se'eso tala, 'eeta': ¿chaq lagui qaq ime de'era maye saqaỹauanapega?

⁷ Qaq so shiỹaxaua maye ỹaatrañi soua alogo maye chegaqaiguilo na lino, ỹaayeshigue'm naua lhuaxaye ỹachaxanoto na piguem, nache ỹan so la'aqtac ỹachegoxotchigui da le'enaxat Ñim Lo'onatac 'Enauacna maye Nca'altauec, nache, 'eeta': Qom inoxoore'c caua tres y medio vi'iye, qom mashe vi'iiguet da nlaqtaguec da la'añaxac nam nhuo' le'ecpi, huaña qome nache ime de'era.

⁸ Qaq aỹem sa'aqchigui co'ollaxa se'eso ỹa'axattac, qalaxaye saishet da saỹaaneguet. Qaq huaña nache senat somaye, sheeta': 'Am Nataxala', ¿chaq negue't cam huo'o qom ime 'enauac de'era?

⁹ Nache somaye aỹem ỹasateguet, 'eeta': 'Am Daniel, qoquetegue qome da 'anqa'aicỹaxac, cha'aye de'era iuen da saishet da qaỹa'axattac, choche ivitta'a cam loga't.

¹⁰ Qalota cam huetaigui qome que'eca que'eenaxac maye qaỹa'axatta'a, qalaxaye nache chegoqtoigui qome camaye da qui'itta, qataq no'on da lataxac. Qaq cam qauemaicpi qalaq queto'ot qome da ỹo'ottac nam qauemsat, qaq saishet qome da ỹaỹaten que'eca qanayeuaigui, qalaxaye cam ỹaanaxanaxaicpi, qalaq ỹaỹaten qome 'enauac camaye.

¹¹ Qaq mil doscientos noventa na'axa'te caua inoxoore'c qome, chegoqchiguiña cam huaigui da qaỹa'axaneguet cam nachetaqtaxanaxatpi maye qoỹaategueuo naxa ye na'a'q, nache nmeneguet qanqa'en cam nachetaqtaxanaxat maye ỹataqta qauem da qoỹaneua'a aca atamnaxaqui maye lalamaqte Ñim Nataxala'.

¹² Qaq ỹataqta machiguiñi qome cam huo'o da lpi'iỹaxac, choche inoxootre'c naqa'en caua mil trescientos treinta y cinco na'axa'te.

¹³ Qalaxaye 'am Daniel, nache qoqueta qome, choche 'avitta'a cam 'oga't nache 'anmatec, cha'aye caua pa'atrec na'axa'te nache 'anachaañi qome da yaqto' 'auaconeguet ca 'ansheetenaguec.