Daniel 10 - La'aqtaqa Ñim Lo'onatac 'Enauacna 2013

Da lauanaqchec so Daniel maye huaña so loigue so tala Tigris

¹ Qaq co'ollaq mashe ivi' soua tres vi'iye da lo'onataxanaxac so Ciro da nta'a ye Persia, nache so Daniel maye nataqa'en le'enaxat Beltsasar, huo'o co'ollaxa so lauanaqchec, qalaxaye ỹataqta qalaqaic da qaỹaỹaten cam naigui somaye. Qalaxaye so Daniel ỹataqta deuennataxaalec co'ollaxa somaye, nache ishet da ỹaỹaten dam naigui se'eso lauanaqchec.

² Qaq se'esoua na'axa'te, aỹem Daniel ỹataqta saquico, ivittre'c soua tres semanas.

³ Nache saishet da sachec ca no'on nallec, qataq saishet da she'eguen ca lapat, qataq ca lataxa, qataq saishet da huo'o ca ñecoyigui coraxat, choche ivitta'a da inoxoore'c se'esoua tres semanas.

⁴ Qaq so na'a'q veinticuatro, so la'auaxanec ca'agoxoic se'eso vi'i, nache aỹem sooto'ot na loigue so lta'araic tala Tigris,

⁵ qaq so ñamatasheguem nache sela'a so ỹale, ỹaatrañi soua alogo maye chegaqaiguilo na lino, qataq so nsaataxaqui oro.

⁶ Qaq da lo'ocỹaxac somaye qalaq qashelecteguiñi, 'eeta'am na coma' topacio, qaq na lashec qalaq 'ettapogoigui 'eeta'am na nqashelgaxa, qaq naua la'ai'te qalaq 'eeta'am aca ncoỹaraxanaqte 'ettaigui, qaq naua lhuaxaye qataq naua lapia'ate qashelectrapiguiñi 'eeta'am na bronce, qaq da lavilỹaxac qalaq 'eeta'am ca qalota shiỹaxauapi.

⁷ Qaq nachaỹemta da sela'a se'eso ỹauanaqchec, cha'aye som ỹalleppi maye ñenaictague' na'aictaxa da saishet da huo'o ca ila'a, qalaxaye ñi'i, nache datauec da nqañoxooñi.

⁸ Qaq nache Aỹem 'oonolec da ño'onañi co'ollaq huo'o se'eso lta'araic ỹauanaqchec, nache aỹem ỹataqta ñapagaqtec, qataq ñanomteguet da qaica ca ỹa'añaxac.

⁹ Qaq co'ollaq sa'axaỹa somaye da detaqa, nache secopche nache souañi, nache sootaiya' soota'aguet na 'alhua.

¹⁰ Qalaxaye saqaỹaloq da huo'o so nhuaq da aỹem ỹacoosop, nache aỹem nauaxaỹaxaasheguem, nache iviraxata'a da ishet da sashelñi qataq sa'alyiñi naua illecte.

¹¹ Ime, nache aỹem 'enapega, 'eeta': «'Am Daniel maye 'am lauotaxat Ñim Lo'onatac 'Enauacna, ñaq 'ana'axaỹaxaachigui dam 'am sa'axatem: ñaq qoñisheguem, cha'aye aỹem qanamaq da 'am ñanaỹa.» Qaq so choche ime da nasaxauec se'eso la'aqtac, nache aỹem ñachaañi qalaxaye ñaq seviloxoltai'.

¹² Qaq huaña nache somaye aỹem 'enapega, 'eeta': «'Am Daniel saishet da 'añi'i, cha'aye chegoqchiguiña so hua'auchiguiñi na'a'q co'ollaq 'auennataxaalec da yaqto' 'auaỹaten som lataxac maye ỹataqta huo'o da lqalaic, nache 'auacona da qaica ca 'ara'amaqchec da 'auataỹot Ñim 'Anatamnaxala', nache Ñimaye hua'axaỹa co'ollaxa so 'anatamnaxac. Qaq ỹoqo'oye aỹem ñanac.

¹³ Qaq ñim namaxashec maye ilotague' da no'onataxanaxac ye Persia, aỹem dataỹa'aguet ivittre'c soua veintiun na'axa'te, qalaxaye so Miguel, som 'oonolec nam namaxashecpi maye ỹataqta 'amaqtaqaicpi, somaye anac da aỹem itauan, cha'aye aỹem 'oonolec da soota'aguet na nta'alpi ye Persia.

¹⁴ Qaq ỹoqo'oye ñanac nagui da 'am sa'aqtaxanem, dam 'eetec qome na 'arhuo' le'ecpi que'ecaua pa'atrec na'axa'te, cha'aye som 'arauanaqchec co'ollaxa, nache ỹa'axatta'alo que'ecaua na'axa'te.»

¹⁵ Qaq so ñaq aỹem da'aqtaxaateguem de'era, nache selotaña na 'alhua, qataq qaica ca ñasaxauec ỹa'aqtac.

¹⁶ Qalaxaye se'eso aỹem nachatto'ot maye 'eeta'am ca shiỹaxaua, ipoteua'a na aỹap qaq ỹoqo'oye seshet da setaqa, nache shenapega somaye sheeta': «'Am Nataxala', de'era ỹauanaqchec ỹataqta aỹem nlaxagui naqa'en da ỹaquicoxo, qataq ỹo'ot da qaica ca ỹa'añaxac.

¹⁷ ¿Ca 'eeteco' da ishet da 'am detaxaỹapegue' ne'ena 'aramaxashec, ye aỹem ỹataqta qaica ca ỹa'añaxac, qataq 'eco' huotaique da vi'iigueta naua ỹa'a'che?»

¹⁸ Qaq se'eso maye 'eeta'am ca shiỹaxaua, qaltaq ỹe'eguelaxalec da aỹem ipoteua'a, nache aỹem ỹanem da dalaxaic da ỹa'añaxac

¹⁹ nache aỹem 'enapega, 'eeta': «Saishet da 'añi'i, qataq saishet da ỹapac da 'arhuogoxo. Ñim Lo'onatac 'Enauacna 'am ỹauotec, ¡qaq ỹoqo'oye 'ana'añaxat, qataq 'aua'añaxachigui ye 'arhuel!» Qaq so ñaq aỹem detaqtacot nache ñanomteguet da huo'o da ỹa'añaxac, nache shenapega somaye sheeta': 'Am Nataxala' aỹem 'autaxaỹot nagui, cha'aye mashe aỹem 'avi'eguelaxatem da ỹa'añaxac.

²⁰ Nache somaye aỹem 'enapega, 'eeta': ¿'Auaỹaten peta'a da ta'ainco' da 'am ñanaỹa? Cha'aye nagui she'eguelaxa da qaltaq selogui' ñim namaxashec maye ilotague' da no'onataxanaxac ye Persia. Qaq qom ime da selogui' ñimaye, nache anac qome ñi namaxashec maye ilotague' da no'onataxanaxac ye Grecia.

²¹ Qaq nagui 'am sa'axatem dam nanettalec aso nere maye lmalate da 'eesa lataxac: Dam iloquiaxac da sataỹa'agueta yeemaye qalaq nachesota so Miguel da aỹem itauan, som namaxashec maye ilotague' da no'onataxanaxac ye Israel.