Cantares 8 - La'aqtaqa Ñim Lo'onatac 'Enauacna 2013

¹ ¡Qaico' co'ollaxa da maiche 'am ỹaqaỹa, llaqtac naua lche' aso ỹate'e! Yaqto' da huo'o ca huaña da 'am ñatena'aguet na nqa'aic, nache ỹataqta 'am ñapigoxoi' qataq qaica ca aỹem ỹe'eetac.

² Qataq nache ishet da 'am sauegueua'a ye lma' aso ỹate'e, nache 'eco' taxa da 'am ñapaxaguenaxala'. Nache aỹem 'am sami' na lli'i ana ỹañiguishe granadapi qataq da 'am ñeỹomaxangui na 'onaxaic lataxa.

³ ¡Da iyoxo' da ña'axaatalec na lhuaq ne'emaq, qaq na lhuaq aloic nache aỹem nsoxouo!

⁴ Qami' 'alpi maye qarma'ai na Jerusalén: Aỹem qaỹa'añim ca qara'aqtaqui. Saishet qome da sa qaualemaxache da lo'ochaxa ye ỹauotaqte. ¡Qaua'aqaita'a da do'oche maicheye da nlouec!

Da pa'atec no'onec 'Enapec so laỹe 'alpi:

⁵ ¿Chaq negue't ana chegoqtelec na toolec 'alhua, hua'aqtalec na lallac na lauotaxat? Hua'asop aso nañiguishe manzano da sa salemaxat na 'aro'ochaxa, yem huaña caillaye da aso 'arate'e nanomteguet da naỹallaxa, nache huaña co'ollaxa da 'am ñiguiñi.

'Enapec so ỹale: 'Enapec aso 'alo:

⁶ Ỹataqta huetaigui qome 'anqa'en da 'arquiyaqteỹaxac da 'arhuennataxac da sheeta, qataq ỹataqta 'eeta'am da 'erelec na 'arhuaq. Da qarauotaxanaqtaic qaica ca npaxateguet, 'eeta'am da nleuaxa, da nqopitaxanaqtaic saishet da 'am ỹaxanec, 'eeta'am ca nleuqa'. ¡Da la'añaxac da nauotaxanaqtaic 'eeta'am ca chegaqasheguem saqcha'a norec!

⁷ Na 'etaxat maye huetangui 'enauac ana auaxai saishet da ỹalamat de'era nauotaxanaqtaic, qataq na talapi saishet da imeuo naqa'en damaye. Da huo'o ca nshetaique da ỹaneguet 'enauac da lsallaxa da nmeneguet naqa'en de'era nauotaxanaqtaic, camaye ndotec da ne'enaguec ỹaconeguet.

'Ena'ape soua nqaỹa't:

⁸ Aso qarqaỹole ñaq na'asole qataq ñaq saxanaqcaua caua ltetel. ¿Chaq shenaqtec qome asomaye da ivita da qanaroneua'a?

⁹ Qaq asomaye taxa da lpaqtaxat na huaqta'a't nỹecpi, nache ño'oxonaxasheguem taxa ca nma' lta'araic chegaqaigui na lcat plata, qaq taxa da lasom asomaye nache llapaxasoxoua'a na qo'oipaq cedro.

'Enapec aso 'alo:

¹⁰ Aỹem co'ollaxa sheeta'am ca mpaqtaxanaxat, qalaxaye nagui naua itetel qalaq 'eeta'ama caua nalloxolatel. Qaq so ỹauotaxat ỹo'ot da ỹataqta samachiguiñi.

¹¹ So Salomón huo'o co'ollaxa so maiche lañiguishe lma' naña ye Baal Gamón. Nache huo'oi soua ỹanema da iloregue se'eso nañiguishe lma', qaq naxa da ivita ye laloxoqui da qanqat ana ala somaye, nache qoỹami' ñi 'oonolec somayepi ana mil anom plata.

¹² Ana'ana mil anom plata 'am qoỹami' Salomón, qaq ana doscientos qalaq qoỹami' na ilotague' na nañiguishe lma', qalaxaye aỹem maiche selotague' ana maiche ỹañiguishe lma'.

'Enapec so ỹale:

¹³ ¡Ñaq aỹem 'aua'aqta'a da sa'aqtega da 'arvilỹaxac 'am maye qoneta'am na nañiguishe lma'! ¡Na ỹaỹepi iuatta'a da 'am na'axaỹaxana!

'Enapec aso 'alo:

¹⁴ ¡'Am ỹauotaxat, ñaq 'analoxo qome, qoneta'am ana ñi'imshe qataq na chegaxango llalec da nqalgoqtapeguelec ana qasoxonaxapi maye ỹoqta nlaqtelec na ama da laitaỹaxac!