Cantares 7 - La'aqtaqa Ñim Lo'onatac 'Enauacna 2013

'Enapec so ỹale:

¹ 'Am, maye 'am nta'a llale ỹataqta 'onaxaiqa naua 'arapia'ate da 'aỹa'aatrañi naua 'arapela'ate. Naua laỹel naua 'eeguel ỹataqta ỹo'oxoraqte' 'eeta'ama na no'onatac lo'onatac na ỹoqta ỹaỹaten da ỹo'ot na 'otaxatpi.

² Ñi 'arcom 'eeta'am aca colliichigui ỹomaxaqui, qataq saq ỹet da huetangui na ỹoqta 'onaxaic lataxa. Ana 'ara'am 'eeta'am na qalapootasheguem ala na trigo qataq coleesop qanqoỹen ana lauoxo ana huoue.

³ Naua 'artetel 'eeta'ama caua dos ñi'imshe llalole huayaye.

⁴ Na 'arqosot 'eeta'am ana nalloxolate maye chegaqaigui na lpi'inec ana lhue ana qasoxonaxa. Naua 'ara'ai'te ỹataqta cherañi 'eeta'ama yeua lapelolel maye netraña ye Hesbón, huaqta'ai' ñi lasom ye Bat Rabín. Ñi 'armic 'eeta'am añi nalloxolate ye Líbano, maye ilotague' qataq datatta ye Damasco.

⁵ Na 'arqaic qalaq 'eeta'am ñaqa'en añi qasoxonaxa Carmelo. Na 'araue qashelec qataq tocalec da lo'oxoỹaxac, ana 'anamogue nache 'eeta'am da lcoñetegueshec ca nta'a.

⁶ 'Am 'onaxaale, qaica ca 'ena'am da 'aryacỹaxac ỹataqta qaica ca 'ena'am da 'arauotaxanaqtaic.

⁷ Qataq ye lcata da 'arataxac 'eeta'am da lataxac ana chaic, qataq naua 'artetel 'eeta'ama ana ltaxale ana ala ana chaic.

⁸ Qaq aỹem sauotaique da shiguisheguemec aca chaic, nache sacona 'enauac ana ala. Qaq naua 'artetel qalaq 'eeta'ama ñaqa'en ana ltaxale ana ala ana uva, qaq na 'ara'at nache 'eeta'am na laita ana manzana.

⁹ Da lamaic na 'ap 'eeta'am na lataxa, da quigui na qorap qataq naua qarhue.

'Enapeco' aso 'alo:

¹⁰ Ỹataqta aỹem lalamaqte som ỹauotaxat. Da lqopitaxanaqtaic da sheeta ỹataqta aỹem naueguela't.

¹¹ ¡'Aue, qolaq 'am ỹauotaxat, ñeqo'onaxauga na no'onaxa da qaro'ochaqa' sonaqtaigui ana lauoxo ana alheña!

¹² Qaq da nte'etom nache saxauga ye lma' ana nañiguishe uvapi, da yaqto' semetenaq da mashe huo'o ana llaxataxa, qataq da mashe dasovi ana lauoxo, qataq da mashe huo'o ana lauoxo ana granadapi. ¡Nache huaña qome da 'am sami' da ỹauotaxanaqtaic!

¹³ Ana lauoxo ana mandrágoras mashe huaỹoxon da laitaỹaxac. Qaq ñi qarma' huetaña ana ỹotta'a't ala ana qo'oipaq maye ishet da qanallec, huo'o ana hua'auñi ala qataq ana dalaxai, seỹotauga da yaqto' 'aralamaqte, 'am ỹauotaxat.