Cantares 6 - La'aqtaqa Ñim Lo'onatac 'Enauacna 2013

'Enapec so laỹe 'alpi:

¹ 'Am maye ỹataqta 'anapacalec da lyacỹaxac na laỹe 'alpi, ¿chaq taigo' cam 'arauotaxat? ¿Chaq hua'ague ca taigue camaye? ¡Qolaq, 'am ñenaigaqapegue' ñimitaqaique camaye!

'Enapec aso 'alo:

² So ỹauotaxat mashe huetaigui na lañiguishe lma', ana lañiguishe maye ỹataqta ama da laitaỹaxac ana lauoxo. Qataq nqopita da nqapaxaataigui nam nañiguishe lma' nache napoctac ana lauoxo anamaye.

³ Aỹem lalamaqte so ỹauotaxat, qataq somaye ỹalamaxat. Somaye nqopita da ỹalectaigui ana lauoxo ana nañiguishe.

Da nca'attauo no'onec 'Enapec so ỹale:

⁴ 'Am ỹoqopitaqte, 'am 'onaxaale qataq lta'araic da 'aryacỹaxac 'eeta'am ye huaqta'a't nỹecpi ye Jerusalén qataq ye Tirsa, qataq qoneta'am da llo'oxoyec ana huaqaañipi.

⁵ ¡Nache a'aye da aỹem 'aualleto'ot, cha'aye naua 'ara'ai'te mashe aỹem naue'c! Na 'araue 'eeta'am na laue ana quetaq lairaxai, maye parenaxaata'ague ana qasoxonaxapi ye Galaad.

⁶ Ana 'arhuepi ỹataqta ỹapagaq 'eeta'am ana nlo qagueta maye cheta'ague da qanachelaxaatac qataq mashe qanpetec, qataq anamayepi nalochiguiñi.

⁷ Naua 'aramelque tocaleguete 'eeta'ama ana ala ana granada, 'eco' nqañoxottaiguilo na lapoxot na 'arqaic.

⁸ Ivi' sesenta ana ỹoqta lhuapi so nta'a, qataq ochenta ana ỹaqauga lamoxouapi, qataq qalota na qa'ampi.

⁹ Qalaxaye aso ỹalamaqte qoto'ole maye nalochiguiñi ỹataqta 'oonole, asomaye 'oonole ñale maye ỹataqta nauotaqte lauotaqte aso 'alo maye deco'oic. Qaq ana lhuapi so nta'a da ila'a asomaye nache ỹo'oxoreetac, ivira'a ana ỹaqauga lamoxouapi ỹataqta huo'o da llo'oxonnataxanaxa.

'Enapec so laỹe 'alpi:

¹⁰ ¿Negue't ana'ana cha'aguet nnoxotcheguem maye 'eeta'am añi chi'ishe da nte'eta, qataq 'erangui 'eeta'am ñi ca'agoxoic, qataq da llo'oxoyec 'eeta'am ana huaqaañipi?

'Enapec aso 'alo:

¹¹ Saigui qome ye lma' ana nañiguishe nogalpi, semeten da mashe nsala ana lauepi ana qo'oipaqpi na no'onaxa ca'amapega't, qataq mashe huo'o ana llaxataxa ana nañiguishe uvapi qataq ana lauoxo ana granadapi.

¹² Qaỹoqtegue nache ñanom da 'eeta'am da ñeqotta'ai' so nta'a llalec.

'Enapec so laỹe 'alpi:

¹³ Ña 'añe'eguelaq qome Sulamita, ña 'auasot. Ña 'añe'eguelaq, sauoqtaique da 'am sauanaqchigui. ¿Negue't ca huo'omshe huotaique qauloỹa'a ana Sulamita? ¡Qomye da lasotaxac da ỹalectaigui na laỹe dasottega'tpi!