Cantares 3 - La'aqtaqa Ñim Lo'onatac 'Enauacna 2013

¹ Da ñenaatalec ye imala' da pe qalaq ñepi'itaxaataique so lauotaxat da ñachaalataxac. Ñimittaique qalaq saishet da sanata.

² Huaña, nache soosheguem, nache semitaxaatac ñimittaique so lauotaxat da ñachaalataxac, shectague' na nqa'aicpi qataq na naponqa'pi. Ñimittaique somaye qalaq saishet da sanata.

³ Qalaxaye aỹem ilalec so nauaatalec na huaqta'a't nỹecpi, nache senattac, sheeta': «¿Meca da qauloỹa'ague cam lauotaxat da ñachaalataxac?»

⁴ Qaq can choche sheca'ai somayepi, nache sanata som lauotaxat da ñachaalataxac. Nache sacona na lhuaq somaye, nache saishet da saxanec, nache sauegueua'a ye lma' aso ỹate'e, yem lo'ochaqa' asomaye, nache huaña da ỹataqta ỹalamaxat.

'Enapec so ỹale:

⁵ Qami' 'alpi, maye qarma'ai na Jerusalén, qami' ñachoxoreetoiguilo souaxat ana ñi'imshepi qataq ana chegaxangopi maye huetauga na no'onaxa, da saishet da sa qaualemaxache da do'ocheta aye ỹauotaqte. ¡Qauaqaita'a da do'ocheta yaqto' maicheye da nlouec!

Da lỹa ỹaqa'aguet no'onec 'Enapec so laỹe 'alpi:

⁶ ¿Chaq negue't na chegoqtalec na toolec 'alhua qataq naỹa'acna 'eeta'am na nchisheguem lmala'q, qataq naỹoxoosheguem na laita ana mirra, qataq na 'onaxaic nchenaxanaxat, qataq 'enauac na ỹotta'a't coraxatpi maye ỹoqta no'on?

⁷ ¡Nachena na nta'a Salomón netangui ana nso'onaxaqui maye qanallaguisheeta! Coleesop na sesenta nalleppi ndotec na ỹataqta la'añaxanec na Israel le'ecpi.

⁸ 'Enauac namayepi ỹaỹaten na ỹeelonec da do'ogoxona qataq ỹaỹaten da nalaataxac, ñi 'oonolec nshettañi na lainec nache lhuotta'a da huo'o ca lchec ye pe.

⁹ So nta'a Salomón damaxasoxoolec da qaỹo'ot aso nso'onaxaqui ỹachegoxotaigui na ỹoqta no'on qo'oipaq ye Líbano.

¹⁰ Naua lauoqtel nache ỹo'oxoolec na lcat plata, qaq so la'axasoxola' ỹo'oxoolec na oro, qaq so nso'onaxala' qaq ỹo'oxoolec na qagueta laue togaxaraic qataq 'enauac na pa'auo qalapaxalec na lo'oc na 'atet, lo'onatac na 'alpi maye lma' ye Jerusalén.

¹¹ Qami' 'alpi maye qarma'ai na Sión, ¡ña qampa'aiuec qome qaualliguet na nta'a Salomón! ¡Ten mashe qoỹanaxanaxangui ana naro'o da nta'a, maye lo'onata aso late'e co'ollaq ivita so na'a'q da huaron, so na'a'q maye ỹataqta machiguiñi da lquiyaqteỹaxac.