Cantares 2 - La'aqtaqa Ñim Lo'onatac 'Enauacna 2013

'Enapec aso 'alo

¹ Aỹem sheeta'am aca lauoxo maye hualec ye nalochiguiñi 'alhua ye Sarón, aỹem lauoxo maye huauga na no'onaxa ca'amapega't.

'Enapec so ỹale:

² Aso ỹoqopitaqte da ỹalectaigui na laỹepi 'alpi, nache 'eeta'am ana lauoxo da ỹalectaigui ana huo'o ana lepi.

'Enapec aso 'alo:

³ So ỹauotaxat da ỹalectaigui na laỹe ỹalleppi, nache 'eeta'am ana qo'oipaq da huo'o ana ala da ỹalectaigui ana laỹe huauec qo'oipaqpi. Ỹataqta 'onaxaic ñaqa'en da ñeso'oto'ot na lpaqal, qataq ỹataqta ñaman ana ala.

⁴ So ỹauotaxat aỹem ỹauegueua'a so huaña da nquia'axac, da aỹem ỹalleto'ot qalaq yo'oqta da lqopiche aỹem.

⁵ ¡Ñaq aỹem qaua'añaqchichi, aỹem qaỹa'añim qome ana deqaqta ala ana uvapi, qataq aỹem qauquia'axañec ana manzana, cha'aye huotaique selem da lamaic da ỹoqopitaxanaqtaic!

⁶ ¡Da iyoxo' da ña'axaatalec na lhuaq ne'emaq, qaq na lhuaq aloic nache aỹem nsoxouo!

⁷ Qami' 'alpi, maye qarma'ai na Jerusalén, qami' ñachoxoreetoiguilo souaxat ana ñi'imshepi qataq ana chegaxangopi maye huetauga na no'onaxa, da saishet da sa qaualemaxache da do'ocheta aye ỹauotaqte. ¡Qauaqaita'a da do'ocheta yaqto' maicheye da nlouec!

Da lỹa no'onec 'Enapec aso 'alo:

⁸ ¡Na ỹauotaxat mashe anacta! Namaye anactalec ana qasoxonaxapi, nparenaxaata'ague ana comarelecpi.

⁹ Na ỹauotaxat 'eeta'am ana ñi'imshe, qataq na chegaxango llalec. ¡'Ena mashe hueta'a na pa'aueegue da laỹe' na qarma'. Nalletauoigui na nalloxoqui, choche nalletapegueuo!

¹⁰ So ỹauotaxat aỹem 'eetega, 'eeta': «¡'Am ỹoqopitaqtole, qoñisheguem, qolaq!

¹¹ ¡Ña 'aumeten! Mashe inoxoorec soua no'omaxaye, nataqa'en soua auo'oche.

¹² Mashe nnoxoneuo na nauoxo, mashe ivita ye laloqo' da no'onaxanaxac, na coiguenec mashe qaỹa'axaỹa da nnoinaxac na pa'aiguelo na 'alhua.

¹³ Mashe ỹe ana ala ana higo, qataq ana nañiguishe uva mashe huaỹoxon da laitaỹaxac ana lauoxo. ¡'Am ỹoqopitaqtole, qoñisheguem, qolaq!»

'Enapec so ỹale:

¹⁴ «'Am ỹalamaqte qoto'ole, ¡saishet da 'anqañoxottaigui na qaỹoqotcheguemec 'anqañoxotaqa'! Aỹem ñeshetaique da sela'a da 'arashiguiỹaxac, sauotaique sa'axaỹa da 'arvilỹaxac. ¡Ỹataqta samachiguiñi da 'am ñauane'! ¡Ỹataqta huo'o da lamaic da sa'aqtega da 'arvilỹaxac!»

'Enapec aso 'alo:

¹⁵ Ña qauacoñiiua'a ana huaxaỹaxapiole, cha'aye huotaique nlaxaañi ana qorañiguishi uvapi maye mashe dasovitac.

¹⁶ So ỹauotaxat ỹataqta ỹalamaxat, qataq somaye aỹem lalamaqte. Da ilotague' ana lalo nache nqopita da ỹalectaigui ana lauoxo ana huouepi.

¹⁷ Da ñaq napaltañi qataq natomchiguiñi, nache 'avi'eguelaq, 'am ỹauotaxat, 'auỹalapigui' qoneta'am ana ñi'imshe qataq na chegaxango llalec da quetalec ana qasoxonaxapi ye Beter.