Cantares 1 - La'aqtaqa Ñim Lo'onatac 'Enauacna 2013

¹ Na ỹataqta 'onaxaic no'onecpi maye lo'onecpi so Salomón.

Da hua'autec no'onec 'Enapec aso 'alo:

² ¡Sauotaique da aỹem 'anapigoxoi'! Ỹataqta napacalec da lamaic na lataxa da 'arauotaxanaqtaic.

³ Ỹataqta ama da laitaỹaxac na 'ancoraxat, qataq da qanasaxauec da 'are'enaxat nache 'eeta'am na coraxat da huaỹoxon na ama laitaỹaxac. ¡Ỹoqo'oye ỹataqta 'am nqopita na qa'ampiolec!

⁴ ¡Aỹem 'auauec! ¡Sa ñaỹaloxonaq qome! ¡'Am nta'a, ñaq aỹem 'auauegueua'a ca 'aro'ochaqa'! So'otaq ca qantonaxac da salegaqta'a't. She'eguelaxasoxolec da seuennaqte da 'arauotaxanaqtaic, de'era 'arauotaxanaqtaic maye napacalec da lamaic na lataxa. ¡Mañaxasaco' da ỹataqta 'am nqopita na qa'ampiolec!

'Enapec so laỹe 'alpi: 'Enapec aso 'alo:

⁵ Qami' 'alpi maye qarma'ai na Jerusalén, aỹem lairaxaale qalaxaye aỹem 'onaxai, da ỹaueraxa 'eeta'am da laueraxa na lpe'lpi na Quedar le'ecpi, da iyacỹaxac qalaq 'eeta'am da lyacỹaxac na lapoxonaxatpi so Salomón.

⁶ Saishet qome da qaualleetagui da ỹaueraxa, na'aictoxo' da ỹavigaxat na ỹo'oc añi nala'. So ỹaqaỹañicpi aỹem dalemataỹa co'ollaxa nache aỹem ỹamaxalec da selo'ogue so nañiguishe uva lma'pi, ¡qaq nache secoua'ai da selo'ogue ana maiche ỹañiguishe!

⁷ Ñaq aỹem 'aua'aqtaxanem, 'am maye 'arauotaxat da ñachaalataxac, ¿chaq hua'ague naxa ca lquia'aqa' 'anqa'en na 'ana'atetpi? ¿Chaq hua'ague naxa ca nmataqa' 'anqa'en ye na'a'q laiñi? ¿Ta'ainco' da 'anshetaique da sheeta'am aca queuoxoi, da salectaigui na na'atetpi na 'araỹepi?

'Enapec so laỹe 'alpi:

⁸ Da huo'otaq sa 'auaỹaten de'era, 'am, maye ỹataqta 'anapacalec da lyacỹaxac na laỹepi 'alpi, qaq 'am qome, no'on da qoquetegue na lapia' lliguiñi ana nlopi, nache 'aulotague' ana 'arelo quetaqpiole huaña ca naloteuga na lma'pi na laỹe qagueta lo'opi.

'Enapec so ỹale:

⁹ 'Am maye 'am ỹoqopitaqte, ỹataqta 'am 'eeta'am ñaqa'en da lyacỹaxac aca nlo caaỹo maye lauegaxalate aca laigona so faraón.

¹⁰ ¡Ỹataqta 'onaxail naua 'aramelque da 'aỹa'aatrañi naua 'arshete! ¡Ỹataqta 'onaxaic na 'arqosot da 'aỹa'aatañi ana 'arqolapi maye chegaqaigui na conec!

¹¹ ¡Samaxasoxoolec qome da qaỹo'o't caua 'arshete oro, maye qalapaxalec na lcat plata!

'Enapec aso 'alo:

¹² So nta'a da ñaq hua'aqtalec so la'axasoxola', nache na ñecoraxat huaỹoxon da ama laitaỹaxac.

¹³ So ỹauotaxat 'eeta'am ana laỹe' na ña'amnaxat mirra da huetanguilo naua itetel.

¹⁴ So ỹauotaxat 'eeta'am ñaqa'en ana lauoxo ana alheña maye huauga ye lma' ana nañiguishe uvapi ye Engadí.

'Enapec so ỹale:

¹⁵ ¡Ỹataqta 'am 'onaxaale, 'am ỹoqopitaqte, ỹataqta 'am 'onaxaale! ¡Naua 'ara'ai'tolqa ỹataqta 'onaxaiqa 'eeta'ama caua qoto'olqa!

'Enapec aso 'alo:

¹⁶ ¡Ỹataqta 'am 'onaxaicolec, 'am ỹauotaxat, ỹataqta 'am 'onaxaicolec! ¡Na darala 'auaqpi nache qaracanec!

¹⁷ Qaq ana qo'oipaq piinopi, nache l-llecnaxanaxatpi ca qarma', qaq ana qo'oipaqpi ciprés, nache qarhuoyec.