Apocalipsis 18 - La'aqtaqa Ñim Lo'onatac 'Enauacna 2013

Da 'eetec co'ollaq qailaxachigui ye Babilonia

¹ Qaq can ime de'era, nache qaltaq sela'aguet so lỹa namaxashec piguem le'ec, chegoqtot na piguem. Qaq somaye ỹataqta lta'araic da la'añaxac, qataq 'enauac ana 'alhua ỹataqta yo'oqtelec naqa'en na le'eraxa.

² Somaye ỹataqta alam da lavilỹaxac, detaqtac, 'eeta': «¡Chaxan lshegue, qaq noxonec yem lta'araic nỹecpi le'enaxat Babilonia! Qaq yemaye lma' nagui na saqcha'a na'añaxacpi, qataq nqañoxotaqa' nam saqcha'a na'añaxacpi maye qauemaicpi, qataq lpata'c na ỹotta'a't maỹopi qataq lauac na shiguiỹacpi maye qarqaigaxat qataq saishet da sacheguenaq.

³ Cha'aye 'enauac nam ỹotta'a't shiỹaxauapi ỹataqta quetegue da lataxac qataq ỹo'oxoreetac nam qanatameetacotpi maye saq 'en. Nataqa'en ỹo'ot damaye nam nta'alpi maye huetalec ana 'alhua. Qataq 'enauac nam nmenaxaicpi maye huetalec ana 'alhua ỹataqta ivira'a da sallaxanecpi, cha'aye nmene' co'ollaxa yemaye da yaqto' ỹo'ot na qalota lqopitaxanaqtaic maye qauem.»

⁴ Ime, nache qaltaq sa'axaỹa so lỹa nvilỹaxac, chemqot na piguem, 'eeta': «Qami' ỹalamaxatpi. Qoquiỹa'ai na Babilonia, qataq saishet da qauauo'oi ca qarasouaxashechi da qoñiỹa'am ayemaye, yaqto' saishet da qami' taleguete cam qaica ca 'ena'am da lchec napaxaco maye talec qome.

⁵ Cha'aye ỹataqta qalota da lle'etaxaloxo, iviro'ot na piguem. ¡Qaq Ñim Lo'onatac 'Enauacna saishet da huo'o ca icoua'ai na lasouaxashetpi namayepi!

⁶ Qauo'ochec ayemaye 'enauac nam qauem maye ỹo'otec co'ollaxa nataqa'en na laỹepi shiỹaxauapi; ỹataqta ỹactec qanqa'eñi cam lsheetenaxanaxat ayemaye, da isheeten 'enauac na qauem maye ỹo'ot. Qauo'ochec ayemaye da dos da ỹe'eguelaxalec da talec dam lta'araic nqui'ic maye talec co'ollaxa na laỹepi shiỹaxauapi souaxat ayemaye.

⁷ Ayemaye co'ollaxa ỹataqta ỹaguec da ño'oxonnaxac, qataq nqopita da huetaigui da lta'araic lyac da no'otaxac; ¡qaq ỹoqo'oye nagui qauauo'oi qome da nqui'ic!, ¡qaue'enaxachiichigui da 'eetec da ño'oxonnaxac co'ollaxa! Cha'aye da lhuennataxac naxa 'eeta': ‹Aỹem ñeso'ootaña ne'ena, ñeso'ootangui ana ñeso'onaxaqui da aỹem nate'e. Saishet da aỹem pa'ai, qataq saishet da ñauane' da huo'o ca ñeque'eenaxac.›

⁸ Qaq ỹoqo'oye 'oonolec na'a'q ca imaigui da ỹaconeguet 'enauac na nhuaxanaguecpi: lqouaxa, nque'eenaxac qataq da l-leuaxa. ¡Qataq qairolec ca norec da qaỹavigaxat, cha'aye Ñim Nataxala', Ñim Lo'onatac 'Enauacna maye qaica ca ỹaqalanapec, maiche lhuennataxac da ỹauo'o ca nhuaxanaguec!»

⁹ Qaq ye Babilonia qom nalaqaasheguem na le'eraxa, nache na'alaqtapiguiñi nam nta'alpi ana 'alhua qataq nỹeeteguelec yemaye. Ne'ena nta'alpi 'eeta'am ye Babilonia da ỹo'oxoreetac nam qanatameetacotpi maye saq 'en qataq huetaigui da lta'araic llo'oxoyec.

¹⁰ Qalaxaye souaxat da lcolanaxa da qaỹauo'o ca nhuaxanaguec da 'eeta'am yemaye, nache ỹataqta qaỹoqteuga qome namayepi, nache 'eeta': «¡'Agai, ỹataqta chaqaic da qouaigui! ¡Ỹataqta 'am choxoraxaso', 'am maye ỹataqta 'am lta'araic Babilonia, 'am maye 'am 'añaxaic! ¡'Eeta'am da 'eetec da nqachegoxoñi ca shiỹaxaua da Ñim Lo'onatac 'Enauacna lhuennataxac da ỹauo'o da 'anque'eenaxac!»

¹¹ Nataqa'en na nmenaxaicpi maye huetalec ana 'alhua ỹataqta na'alaqtapiguiñi qataq nỹeetac, cha'aye mashe qaica ca desheenaxana nam lmenec. Cha'aye nachaqyeta naxa ye Babilonia da nmeetague'

¹² da ndotai' na lmenec oro, plata, qataq ana 'otaqte, qataq na coma' maye le'enaxat perla; qataq na no'on nogoxot maye chegaqaigui na lino, qataq na nogoxot maye qashelgaxaraic naueralec da ltogaxa, qataq na togaxaraic; nataqa'en 'enauac na ỹotta'a't qo'oipaq ama na laita, qataq nam no'onatac maye chegaqaigui na marfil, qataq na le'enaxat bronce, qataq na lcat, qataq na coma' le'enaxat mármol;

¹³ qataq nam laỹe lla'ac chegaqaigui na canela, qataq nam ỹotta'a't ama na laita 'amnaxat, qataq na aceite maye ama na laita; qataq na lataxa, aceite, 'ayiiña lsoche, qataq na trigo; nataqa'en na shiguiỹacpi maye nlo, qaguetapi, caipi, qataq ana naigonapi, qataq na nlatacpi qataq ncoñeteguishecpi maye qaỹachegoxotaigui ca alaataxac.

¹⁴ Qaq da qaitaxaỹa qome ye Babilonia, qalaq qoỹeeta': «Mashe qaica ca 'arsallaxa maye nachaqrata 'arqopitaxat, mashe imauec da deqat 'enauac da 'aryacỹaxac qataq na 'ano'otaxatpi.»

¹⁵ Qaq nam shiỹaxauapi maye lmenec ne'enapi qataq ỹachegoxotchigui da lsallaxa ye Babilonia, namayepi ỹataqta qaỹoqteuga, souaxat da lcolanaxa da nataqa'en qaỹauo'o ca nhuaxanaguec da 'eeta'am yemaye. Nache ỹataqta nỹeetac qataq na'alaqtapiguiñi, nache 'eeta':

¹⁶ «¡'Agai, ỹataqta chaqaic da qouaigui! ¡Ỹataqta 'am choxoraxaso', 'am maye 'am lta'araic nỹecpi, qataq 'añaxaic! Naua 'ogo naxa qalaq ndota't na chegaqaigui na lino, da lo'oxoỹaxac naua 'ogo qalaq naueralec da ltogaxa qataq na togaxaraic, qataq na laỹepi 'ano'otaxatpi qalaq ndota't na chegaqaigui na oro, qataq na no'on coma' qataq ana perla.

¹⁷ ¡'Eeta'am da 'eetec da nqachegoxoñi ca shiỹaxaua, nache imeuo so lta'araic 'arsallaxa!» 'Enauac na lo'opi ana notaxaquipi maye quiguingui na 'etaxat, qataq nam nqottauo, qataq nam 'etaxat lo'opi, qataq 'enauac nam nmenaxaicpi namayepi ỹataqta qaỹoqteuga.

¹⁸ Qaq co'ollaq ila'a na lmala'q se'eso lta'araic nỹecpi maye ỹavic, nache ỹa'alaq, 'eeta': «¡Saishet da huo'o ca lỹa lta'araic nỹecpi qataq 'añaxaic da 'eeta'am ye Babilonia!»

¹⁹ Nataqa'en imeeleguete naua lqaigo na alo da ỹachaxan da laquicoxo, nache nỹeetac, qataq na'alaqtapiguiñi, 'eeta': «¡'Agai, ỹataqta chaqaic da qouaigui! ¡Ỹataqta 'am choxoraxaso' 'am maye 'am lta'araic nỹecpi qataq 'am 'añaxaic! Cha'aye da 'arsallaxa nachera da isallaqchet, 'enauac nam nmenaxaicpi maye huo'o ana nnotaxaqui maye quiguingui na 'etaxat. ¡'Eeta'am da 'eetec da nqachegoxoñi ca shiỹaxaua nache 'am qailaxachigui!

²⁰ ¡Qantoñiỹapigui' qami' maye qami' qui'itte' maye qoviito'ot na piguem, cha'aye Ñim Lo'onatac 'Enauacna ilaxachigui ye lta'araic nỹecpi! ¡Qantoñiỹapigui' qami' maye qami' namaxa'she, qataq nataqa'en qami' maye qami' la'aqtaxanaxanecpi Ñim Lo'onatac 'Enauacna, cha'aye Ñimaye mashe ỹauo'o da nhuaxanaguec ye Babilonia, souaxat 'enauac nam ỹo'otpi qauem maye qami' ỹo'oteque!»

²¹ Ime, nache so 'oonolec namaxashec piguem le'ec maye ỹataqta qaica ca 'ena'am da la'añaxac, somaye ỹacoosop so coma' lta'araic maye 'eeta'am na namaicnaxanaxat, nache ỹasaxangui aso auaxai, nache 'eeta': «'Am Babilonia, 'am ỹataqta lta'araic da 'ara'añaxac, ¡'Era qome da 'eetec da 'am qailaxachigui, nache saishet qome da qaltaq 'am qaila'a!

²² ¡Nache saishet da lỹa da qaỹa'axaỹa da huetangui na 'anqa'aicpi ca devicnaxaatac da ỹauota'a aca nvique arpa qataq ana nasheere le'enaxat flauta qataq ana trompeta! ¡Nache saishet da lỹa da qaila'a da huetangui na 'anqa'aicpi na shiỹaxauapi maye ỹotta'a't na ỹaỹaten qataq nataqa'en saishet da qaltaq ỹe'eguelaxalec da qaỹa'axaỹa da l-lamaxa na coma' maye namaicnaxanaxat!

²³ ¡Qataq saishet da qaltaq ỹe'eguelaxalec da icoỹarelec 'am na le'eraxa aca ncoỹaraxanaxaqui, qataq saishet da qaỹa'axaỹa ca ntonaxac cam hueta'a ca naronaxac! Cha'aye nam 'armenaxanaxanecpi namayepi co'ollaxa ndotec na 'añaxaicpi da huetalec ana 'alhua, qaq 'am ỹataqta 'auatenachet co'ollaxa da 'arolec da 'aye'eyaqnataxanaxac 'enauac na ỹotta'a't shiỹaxauapi.»

²⁴ Ñim Lo'onatac 'Enauacna ỹauo'o da nhuaxanaguec yi'iye lta'araic nỹecpi, cha'aye yemaye lasouaxashet da ỹalauat so la'aqtaxanaxanecpi Ñimaye qataq so lalamaxatpi. Qataq 'enauac nam ỹalauatpi maye huetalec ana 'alhua.