Amós 6 - La'aqtaqa Ñim Lo'onatac 'Enauacna 2013

Da nhuaxanaguec na Israel le'ecpi

¹ ¡Choxoraxaso' qome nam ỹataqta ỹe'emaqtac da hueta'a ye Sión! ¡Qataq nam pe'etega añi qasoxonaxa ye Samaria! ¡Qataq choxoraxaso' nam 'amaqtaqaicpi lataxala'pi nam ỹotta'a't shiỹaxauapi, maye nam Israel le'ecpi pe'etecot naxa!

² Ña qanqo'oñiỹa qome ye Calne nache qaumichiñi, ime, nache qanqo'oñiỹa qome ye 'amaqtaqaic Hamat, qataq qananaiña ye Gat maye lma' na filisteopi. Qaq ¿peta'a qaupi'itaxañiitega da qanapaquialec da la'amaqchec yi'iyiua 'alhua? ¿Qalqo' ye lcata yi'iyiua 'alhua napacalec ye lcata nam qana'alhuai?

³ Qaq qami' maye saishet da qauennacheetega cam qauem na'a'q, qalaxaye maiche qami' da qanaviquiila't nam qaica ca iyacnapec.

⁴ Qataq qaro'ochaxala'ai na mala' maye chegaqaigui na marfil, qataq qaua'aqaitalec nam ỹataqta no'on na'axasoxola', qataq qauo'ocheetac na nquia'axac, qolliquiitac na ỹataqta chaxaraic lapat na qagueta qataq na huaca llalec,

⁵ qataq qaue'enaxacheetac so David da maiche qauo'oche na qaro'oñiqui, qataq qauo'onaxañeeta'ai' ana qarviqui maye maiche qaro'onatai.

⁶ Qataq da qanỹomiigui na lataxa qalaq ỹataqta late'el naua qanỹomaxaquilli', qataq qancoyeetapigui na coraxat maye ỹataqta no'on da laitaỹaxac, qaq nache qaica ca qarhuogoqoi da nlaguiñi ne'ena 'alhua.

⁷ Qaq ỹoqo'oye qaua'aviichiguiñi qome da qami' qaỹauegalo ca ỹaqa'a 'alhua, qaq huaña qome nache loga't da qauo'ocheetac na nquia'axacpi.

⁸ Qaq Ñim Nataxala' maye Lo'onatac 'Enauacna maye Qaica ca Ỹaqalanapec, maiche nañaala't da ỹan da la'aqtac, 'eeta': «Aỹem, ỹataqta sepitaxac da na'amqaanaxac na lauo' le'ecpi so Jacob, qataq sepitaxac na lma' lta'araicpi, ỹoqo'oye nam huaqta'a't nỹecpi, saneguet qome na npa'aguenaxauapi namayepi, nache lỹaueegue' 'enauac nam huetaigui namayepi.»

⁹ Qaq ỹoqo'oye da diez ỹalleppi cam huetaigui ca 'oonolec nỹec, nache camayepi imauec da ileu.

¹⁰ Qaq da anac ca 'oonolec shiỹaxaua da nqatec ca lauo' le'ec maye ileu da yaqto' ỹavigaxa't, qaq da huo'otaq nvireuo ca lỹa shiỹaxaua nache da denataxan, 'eeta': «¿Peta'a ñaq huo'o ca lỹa shiỹaxaua na pa'auo?» Nache cam na'auhuo ỹasat, 'eeta': «Qaica» Qaq nataqa'en 'eeta': «'Aue'enaxaatai', ten qom 'alamaxata'a da 'anasaxauec da le'enaxat Ñim Nataxala'.»

¹¹ Cha'aye Ñim Nataxala' talec naqa'en qome ca nhuaxanaguec, nam nma' lta'araicpi qataq nam qapio'olecpi, nache ivitta'a da ỹataqta 'enauac qome da nlachiguiñi.

¹² Qaq ¿isheto' peta'a na caipi da nqalgoqtalec na coma'pi? Qataq ¿isheto' peta'a na nauegaxanaxala' huacapi da na'ayisheguem na coma'pi? ¡Cha'aye da no'on lataxac nmeneguet qanqa'eñi dam lataxac maye qanlem! ¡Qataq da alaỹaxac da nalochiguiñi lataxac qalaq ỹataqta chem qanqa'eñi!

¹³ Qami' maye saq 'en da qantonaxaqui, nache qoñeeta': «Qomi' chegoqchigui da maiche qana'añaxataxac da huo'o da qara'añaxac.»

¹⁴ Qaq ỹoqo'oye qami' Israel le'ecpi, Ñim Nataxala' maye Qaica ca Ỹaqalanapec, 'eeta': Aỹem, ñauaxaỹaxaasheguem qome ca shiỹaxauapi da yaqto' qami' dataỹa'agueta, nache qami' sa iyacna'ape qome da qami' ilo'oguelo, qataq ilo'ogue qome na qana'alhuai chegoqchiguiña ye pa'aigue da sheu', nache ivitta'a na pa'aỹa'ague da la'añaxa.