Abdías 1 - La'aqtaqa Ñim Lo'onatac 'Enauacna 2013

Da taỹa'a nhuaxanaguec ye Edom

¹ Da lauanaqchec so Abdías, maye chegoqo'ot Ñim Nataxala' maye ỹa'axata'a da 'eetec qome da taỹa'a ye Edom. Qomi' sa'axasoqchigui so la'aqtaxanaxanec Ñim Nataxala', 'eeta' huo'o so namaxashec maye taỹa na ỹotta'a't shiỹaxauapi da da'aqtaxanem da na'aqtac maye, 'eeta': «¡Qolaq! ¡Ñeqo'onaxa ye Edom le'ecpi nache ñalaataxai'!

² Aỹem, 'am so'otec qome da qaica ca 'ara'amaqchec da 'aualectaigui na ỹotta'a't shiỹaxauapi, qataq ỹataqta qaica ca 'enec qanqa'en 'am.

³ Qaq dam 'ana'amqaanaxac, ỹataqta 'am ỹatenachet. 'Am maye qonetaigui nam lpoxoỹaxapi ana coma'pi, qataq qonetasheguema nam qaỹoqotcheguemapi, ỹoqo'oye 'aupi'itaxaatega da qaica ca ishet da 'am iqalagoxotec.

⁴ Qalaxaye na'aictaxa da qoneta'am ca vi'ic maye huaỹotac na piguem, qataq da 'aỹa'anaigui ana huaqaañipi ca 'arpata'c, qalaxaye nache 'am sachegoxotchiguiña qome camaye da 'auanaañi ñaqa'en». Qaq 'era da la'aqtac Ñim Nataxala'.

⁵ Qaq da huo'otaq 'am naua'a da pe ca cachaxaicpi da 'am decachiỹot, qalaq saishet da imauec da ỹache nam 'ogoxoshetpi, qataq da huo'otaq 'am naua'a ca uva lo'opi da 'am decachiỹot, qalaq huo'o ana no'onaxatañi ala ana uvapi. Qalaxaye nam 'ampa'aguenaxauapi namayepi ỹataqta 'am nhuotta.

⁶ ¡Qalaxaye 'am Esaú, ca qoneteco' ye ỹataqta mashe 'am qanhuotta! ¡Nache ỹataqta qaimattec da qaỹacona so ỹataqta no'on 'ogoxoshetpi!

⁷ Qaq nache 'enauac nam 'am itauaatacpi co'ollaxa, ỹataqta 'am ỹatenachet, nache 'am ỹo'orauec, qoca'ai naqa'en ye maiche 'ana'alhua. Qataq ivira'a nam 'anauochaxauapi da 'am dataỹa'aguet, nache namayepi ỹanangui na 'ec ana lqoinapi. ¡Cha'aye 'am Edom, ỹataqta qaica ca 'araỹaanataxanaxac!

⁸ Qaq Ñim Nataxala', 'enapec: Que'eca na'a'q qom sauo'o ca nhuaxanaguec ye Edom, nache selaxachigui nam ỹaanaxanaxaicpi, qataq seuotaxanec nam laỹaanataxanaxacpi nam netaña aye qasoxonaxapi maye lalamaqte so Esaú.

⁹ Qaq nam 'añaxaicpi alleppi ye Temán, ỹataqta iviloxol qome da lcolanaxa, qaq nam netañapi aye qasoxonaxapi maye lalamaqte so Esaú, ỹataqta qaica qome ca no'onañi da nca'altauec.

Na lasouaxashetpi ye Edom le'ecpi

¹⁰ Qaq souaxat da ỹataqta sa 'auyacnapec qataq 'aualauat so 'arqaỹa Jacob, nache 'am talec qome da ncoxo, qataq ỹataqta imauec da 'am qailaxachigui.

¹¹ Cha'aye co'ollaq anac so npa'aguenaxauapi somaye, da deuotaxanec so lsallaxa maye huetaigui so huaqta'a't nỹecpi, qataq co'ollaq anac so chegaqauec alleppi da ỹacagaxat so lasompi ye Jerusalén nache 'am saishet da 'ampaxateguet somayepi, qaq co'ollaq qanallichigui so nogoxoshetpi, nache 'aue'enaxat da lataxac somayepi.

¹² Qataq saishettaxa da 'antootapeguec da 'auauaachigui nam 'arqaỹañecpi so na'a'q co'ollaq huaigui da nque'eenaxac, qataq saishettaxa da 'antooteguec da 'auauaachigui da qailaxachigui na Judá le'ecpi, qataq saishettaxa da 'avi'iitac namayepi so na'a'q co'ollaq huo'o da lachetataic.

¹³ Qataq saishettaxa da 'aunoxoneua'a ye ỹalamaxat huaqta'a't nỹecpi co'ollaq huo'o da nque'eenaxac, qataq saishettaxa da 'antooteguec da qauem maye talec, qataq saishettaxa da 'aucachiỹa da lsallaxa co'ollaq mashe qaica ca la'añaxac.

¹⁴ Qataq saishettaxa da qonetangui co'ollaxa so ñec maye hua'axagui so lỹa ñec da yaqto' 'aualauat nam datauecpi, qataq saishettoxo' co'ollaxa da 'aỹa'anec nam no'onañi lca'alaxaicpi da huaigui so na'a'q maye huo'o da lachetataic.

¹⁵ Qalaxaye mashe sa qaỹapeque ca na'a'q da Ñim Nataxala', nmit na ỹotta'a't shiỹaxauapi. Qaq dam 'auo'ot nataqa'en 'am qaỹo'otec qome, nache 'am talec ca 'ansheetenaguec.

¹⁶ Nache dam 'eetec da qanỹomiitac co'ollaq huaña añi qui'itta ñeqasoxonaxa, qaq nache 'eetec qome da queto'ot da nỹomtac na ỹotta'a't shiỹaxauapi, nache ivitta'a da iqueno'oc na lataxa, huaña nache imauec da pal.

¹⁷ Qalaxaye añi qasoxonaxa Sión huo'o qome ca lca'alaxaicpi, qaq añimaye ỹataqta sa qaishetapec qome. Nache nam chegoxoguetpi so Jacob, qaltaq ỹe'eguelaxa qome da nalec na na'alhuapi.

¹⁸ Qaq nam chegoxoguetpi so Jacob, qalaq 'eeta'am qome ca norec, qataq nam llalaqpi so José, qalaq 'eeta'am na le'eraxa ca norec, qaq nam chegoxoguetpi so Esaú, qalaq 'eeta'am ca nca'atoxonaxat, da qaỹe'eraxatoigui nache ivitta'a da ỹataqta ỹavicta, nache qaica qome ca lca'alaxaicpi nam chegoxoguetpi so Esaú. Qaq 'era da la'aqtac Ñim Nataxala'.

¹⁹ Qaq nam Israel le'ecpi maye netaña ye Néguev, ỹacona qome da nalec aye qasoxonaxapi maye na'alhua so Esaú, qaq nam netaña ye nalochiguiñi 'alhua, qalaq ỹacona qome ye 'alhua maye lalamaxat na Filistea le'ecpi. Nataqa'en ỹacona qome ye 'alhua ye Efraín, qataq ye 'alhua ye Samaria, qaq nam chegoxoguetpi so Benjamín, qalaq ỹacona qome ye 'alhua Galaad.

²⁰ Qaq nam Israel le'ecpi maye qaỹauec co'ollaxa, qalaq ỹacona da nalec ye na'alhua na cananeopi, nache ivitta'a ye Sarepta. Qaq nam noxonecpi maye lma' co'ollaxa ye Jerusalén maye hueta'a ye Sefarad, namayepi ỹacona qome ye huaqta'a't nỹecpi ye Néguev.

²¹ Qaq nam dauegaxanpi qalaq tasheguema qome añi qasoxonaxa Sión, da yaqto' nmit nam shiỹaxauapi maye nalec aye qasoxonaxapi maye na'alhua so Esaú. Qaq huaña, nache de'era no'onataxanaxac, ilo'ogue qome Ñim Nataxala'.