2 Samuel 5 - La'aqtaqa Ñim Lo'onatac 'Enauacna 2013

So David nta'a ye Israel qataq ye Judá

¹ Qaq co'ollaq qaỹata'ague de'era, nache 'enauac so maiche nhuo' Israel le'ecpi, nqo'ona ye Hebrón da detaxaỹapegue' so David, nache 'eeta': «'Am, maiche qomi' 'arqaỹañecpi,

² qataq nache 'eetai' co'ollaq ñaq qomi' ilotegueto so nta'a Saúl, da 'am lataxala' naxa da nalat na nalleppi na Israel le'ecpi, qataq Ñim Nataxala' mashe 'am 'eetega co'ollaxa, 'eeta': ‹'Am, 'auaueca'aguet qome, qataq 'aulo'ogue na Israel le'ecpi.›»

³ Qaq 'era da 'eetec co'ollaxa da 'enauac so nqueroxonecpi ye Israel, da nqo'ona ye Hebrón da detaxaỹapegue' so nta'a David, nache somaye naỹamaxate' co'ollaxa somayepi, ỹauaachigui naqa'en Ñim Nataxala'. Nache somayepi icorelec so aceite na lqaic so David, da yaqto' nta'a ye Israel.

⁴ Qaq so David mashe ivi' treinta vi'iye da llaxa co'ollaq ỹacoolec da lo'onataxanaxac da nta'a, qaq ivi' soua cuarenta vi'iye da nta'a,

⁵ qaq ivi' siete vi'iye qataq seis ca'agoxoiqa da netaña ye Hebrón da ilotague' so netaña ye 'alhua Judá. Ime co'ollaxa nache taỹa ye Jerusalén da ilo'ogue 'enauac so netaña ye Israel qataq ye Judá, nache ivi' treinta y tres vi'iye da nta'a.

⁶ Ime co'ollaxa nache so nta'a David qataq so nalleppi taỹa ye Jerusalén da iloquiaxan so jebuseopi maye netalec co'ollaxa yi'iye 'alhua. Qaq somayepi ipi'itaxana co'ollaxa da so David sa ỹañoxot da inoxoneua'a yi'iye huaqta'a't nỹecpi, nache somayepi 'eetego' somaye, 'eeta': «'Am sa 'auañoxot da 'annoxoneua'a ne'ena, cha'aye na'aictaxa da ndochiguiñi na tagoxoicpi qataq na ñi'iirauo naua lchel, qalaxaye namayepi saishet da 'am nasheneuo da 'annoxoneua'a ne'ena.»

⁷ Qalaxaye so David ñaqaiyeta ishet co'ollaxa da deuotaxanec se'eso huaqta'a't nỹecpi maye ỹataqta sa nsattec so lpaqtaxat ye Sión, maye qoỹanagui nagui da le'enaxat «huaqta'a't nỹecpi maye lalamaxat so David.»

⁸ Nache se'eso na'a'q, so David 'enapeco': «'Enauac cam jec da iloquiaxan ye jebuseopi, nache tateua'a qome so la'auaxac na 'etaxat, nache ỹalauat ye tagoxoicpi qataq ye ñi'iirauo naua lchel, cha'aye yemayepi ỹataqta saỹemec.» Ỹoqo'oye nache chegoqteua'a co'ollaxa dam na'aqtacaic naxa maye, 'eeta': «Na tagoxoicpi qataq na ñi'iirauo naua lchel, saishet qome da inoxoneua'a aca atamnaxaqui maye lalamaqte Ñim Nataxala'.»

⁹ Ime, nache so David naña se'eso huaqta'a't nỹecpi maye sa nsattec so lpaqtaxat, nache ỹanagui da le'enaxat, «Huaqta'a't nỹecpi maye lalamaxat so David.» Qataq nataqa'en no'oxoosheguem so lpaqtaxat coleesop naqa'en somaye, chegoqchiguiña so qaimeelec nqa'aic, nache iviraua'a so nma' lta'araic.

¹⁰ Nache so David nquictauec da la'añaxac, cha'aye Ñim Nataxala' maye Qaica ca Ỹaqalanapec ỹataqta hueta'aguet somaye.

¹¹ Ỹoqo'oye so Jirán, maye nta'a ye Tiro, ỹamaq so ltaxaỹaxanaxanecpi da taỹa so David, nataqa'en ỹamaq som ỹaỹaten da ichec na qo'oipaq, qataq som ỹaỹaten da ichec na coma', qataq ỹache naqa'en so qo'oipaqpi cedro da yaqto' no'oxoosheguem so lma' lta'araic so David.

¹² Huaña nache so David ỹaỹaten da nacheñi Ñim Nataxala' da ỹanem da lo'onataxanaxac da nta'a ye Israel, qataq da ỹataqta nquictauec naqa'en da lo'onataxanaxac da nta'a somaye, souaxat da lauoche Ñimaye nam lalamaxat nhuo' Israel le'ecpi.

¹³ Qaq co'ollaq ime da ca'ai ye Hebrón so David da taỹa ye Jerusalén, qaq nache huaña yemaye da dalaxai aso laỹepi lhuapi, qataq asom ỹataxanauopi, nache asomayepi deco'oiguet somaye, nache qalota so dalaxaic llalaqpi ỹalleppi qataq 'alpi.

¹⁴ Qaq 'ena na le'enaxatpi so llalaqpi maye lañoqo' ye Jerusalén: Samúa, Sobab, Natán, Salomón,

¹⁵ Ibejar, Elisúa, Nefeg, Jafía,

¹⁶ Elisama, Eliada, qataq Elifelet.

So David loxonec so filisteopi

¹⁷ Qaq so filisteopi co'ollaq la'axaỹaxac da so David qoỹanagui da nta'a ye Israel, nache somayepi nqo'ona co'ollaxa somaye da iloquiaxan, qalaxaye so David la'axaỹaxac co'ollaxa de'era, nache somaye taỹa so huaqta'a't nỹecpi maye sa nsattec so lpaqtaxat.

¹⁸ Nache so filisteopi taỹa, nache imattalec ye ca'amegue ye Refayin.

¹⁹ Nache so David, inat co'ollaxa Ñim Nataxala', 'eeta': ¿Peta'a ñeqo'ona ye filisteopi da seloquiaxan? Qataq peta'a ¿aỹem 'aỹa'anem da ỹoxonec yemayepi? Nache Ñim Nataxala' 'enapeco': «Aja', 'anqo'ona qome da 'auloquiaxan, cha'aye mashe 'am sanem da 'oxonec yemayepi.»

²⁰ Nache so David nqo'ona co'ollaxa ye Baal Perasin, qaq huaña yemaye, nache loxonecpi so filisteopi. Ỹoqo'oye somaye 'enapeco': «Ñim Nataxala' ỹauategue so ỹegueuo quichiguingui naqa'en so ñepa'aguenaxauapi, 'eeta'am naqa'en ca chaxaguet 'etaxat da ỹa'auatec.» Ỹoqo'oye se'eso 'alhua ỹanagui da le'enaxat «Baal Perasin.»

²¹ Cha'aye nataqa'en huaña co'ollaxa yemaye da so filisteopi ỹalat so lqolacpiolec, nache so David qataq so nalleppi laỹona't somayepi nache ỹache.

²² Qalaxaye so filisteopi qaltaq ỹe'eguelaxa co'ollaxa so ca'amegue ye Refayin, nache imattalec,

²³ qaq ỹoqo'oye so David, qaltaq ỹe'eguelaxalec da inat Ñim Nataxala', nache Ñim Nataxala' 'enapeco': Saishet qome da 'auatateguet da 'aulogui' yemayepi, nacherata da 'aucoleesop, qaq qom 'avita ye qo'oipaqsat nache 'auachegoqtegue na l-laq da 'auloquiaxan.

²⁴ Nache qom 'aua'axaỹa ca l-lamaxa ayem qo'oipaqpi, da 'eeta'am da qanayectalec na pa'asheguem, huaña qome nache 'auloquiaxan yemayepi, cha'aye nachaỹem qome da sa'auta'ague da 'ata'ague da yaqto' selaxachigui ye alleppi filisteopi.

²⁵ Nache so David ỹo'ot 'enauac de'era maye ỹamaxalec Ñim Nataxala', nache somaye loxonec so alleppi filisteopi chegoqchiguiña ye Gabaón ivitta'a ye Guéser.