2 Samuel 22 - La'aqtaqa Ñim Lo'onatac 'Enauacna 2013

Da lo'onaxanaxac so David

¹ So David ỹo'ot co'ollaxa so lo'onec da ỹo'oxoren Ñim Nataxala', co'ollaq ime da Ñimaye nca'alaxateeguesop somaye, so mpa'aguenaxauapi qataq so Saúl.

² Qaq de'era lo'onec, 'eeta': «Ñim Nataxala', nacheñi ñi Aỹem mpaxattalec, ỹo'ot da ỹa'añaxac qataq aỹem nca'alaxatec,

³ Ñim Ñatamnaxala', 'eeta'am ana coma' da aỹem mpaxattalec, qataq ana mpaqtaxanaqte da aỹem mpaxattalec, qataq 'eeta'am ca ỹataqta qaỹoqotcheguema ñeqañoxotaqa', qataq ica'alaxaqui. ¡Qataq aỹem nca'alaxateeguesop da ñecogaxanataguec!

⁴ Ñim Nataxala', ỹataqta 'itchiguiñi da sho'oxoren, cha'aye naxa da seỹaxana nache aỹem nca'alaxateeguesop na ñepa'aguenaxauapi.»

⁵ «Qaq so nleuaxa, 'eeta'am ana lapaxa na 'etaxat da aỹem lpachigui, qataq ỹo'ot da icolanaxa, somaye 'eeta'am ana ỹataqta chaxaguet lapaxa maye dalaataxanapec.

⁶ Nache mashe aỹem lpachigui so lqoinaxanaxat da nleuaxa, qataq mashe sootaua'a na loigue añi huachiqui.

⁷ Qaq souaxat da lta'araic ỹachetataic, nache ñatamnot Ñim Nataxala', seỹaxanot Ñim Ñatamnaxala' da aỹem itauan. Nache iviro'ot de'era ñachoxonnaxac, huaña añi atamnaxaqui maye lalamaqte Ñimaye, da aỹem hua'axaỹa.»

⁸ «Nache huo'o so lta'araic ldaxa ana 'alhua, nache cholaxan naqa'en na na'attalecpi na piguem, souaxat da layeloxo Ñim Nataxala'.

⁹ Nache naviiguilo naua lmic lauaco, na lmala'q, qaq na alap qalaq chegaqaigui na norec dalaataxanapec, qataq ana poqo 'ettaigui.

¹⁰ Nache nquiguiñi naqa'en na piguem da huenotec. Nache petaigui so sansattec lo'oc.

¹¹ Nache netalec so huo'oi naua laua't le'enaxat querubín, nache huaỹotac quetaigui na la'at.

¹² Qataq taigui so ỹataqta lta'araic napalaxa, qataq so lo'oc maye nlaqchigui na 'etaxat, da 'eco' lapoxonaxat.

¹³ Nache na le'eraxa ye lanataqa', chegoqteua'a ana 'ettaigui poqo.»

¹⁴ «Ñim Nataxala' ỹataqta ỹalachiguilo naua la'aqtaqa Ñim Nataỹaña 'enauacna, ỹo'ot da qaỹa'axaỹa naqa'en da lavilỹaxac maye chemaqot na piguem.

¹⁵ Qataq 'eeta'am ana checna da anac na lqashelgaxa Ñimaye, nache ilagaxattac na ñepa'aguenaxauapi.

¹⁶ Qaq souaxat da layeloxo Ñim Nataxala', nache ya'aqlec naqa'en na pa'aguiñi aso auaxai, qataq na na'attalecpi ana 'alhua qalaq ỹaatec, souaxat na la'at maye chegaqaigui ñi nmic Ñimaye.»

¹⁷ «Ñim Lo'onatac 'Enauacna, chegoqotcheguema na ỹataqta pa'asheguem, da ỹauota'a na lhuaq da aỹem ỹacoosop, aỹem ỹachegoxotchiguiña ye ỹataqta pa'aguiñi aso auaxai.

¹⁸ Nache aỹem isoueeguesop na ñepa'aguenaxauapi maye 'añaxaicpi, maye ỹataqta aỹem nquiỹa, qataq napacalec da ỹa'añaxac.

¹⁹ Qaq huaigui se'eso na'a'q maye qaica ca iyac, da aỹem iloquiaxan, qalaxaye Ñim Nataxala' aỹem itauan.

²⁰ Nache aỹem isouec Ñimaye, qataq aỹem nca'alaxatec, cha'aye souaxat da aỹem ỹauotec.

²¹ Ñim Nataxala', ỹo'ot da ñesheetenaguec, souaxat da nalochiguiñi da ỹataxac,

²² cha'aye aỹem salaxagueta naua lapaxaguenataxanaxaco Ñim Nataxala', ¡qataq saishet da sheca'ai Ñim Ñatamnaxala'!

²³ Qataq sepaqueelec da so'o't naua lapaxayiñi lataxaco, ¡qataq saishet da sheca'aisalo naua lqataxaco!

²⁴ Ñimaye aỹem ỹauaachigui da ỹaỹamaqchiguiñi da ỹataxac, qataq sevita'aguet da so'ot ca qauem.

²⁵ Nache Ñim Nataxala', ỹo'ot da ñesheetenaguec, souaxat da ỹaỹamaqchiguiñi, qataq da qui'itta ỹataxac.»

²⁶ «Qaq 'Am Nataxala', ỹataqta 'auchoxoren, ca shiỹaxaua choxonnataxanaxaic, qataq 'auo'otec ca ỹaỹamaqchiguiñi, cam nalochiguiña da lataxac,

²⁷ qataq 'Am huesota, da huesota ca shiỹaxaua, qalaxaye sa 'anqalaate' da 'oicnapec, cam ỹe'enai' ca lỹa.

²⁸ 'Am 'anca'alaxatec ca qaica ca 'enec, qalaxaye na na'amqaanaxaicpi, qalaq qaica ca naigui 'anqa'en.

²⁹ Qaq 'Am Nataxala', nache 'Am maye icoỹaraxanaqte, Qataq 'Am, aỹem 'aucoỹarelec da sootaigui na napalaxa.

³⁰ Qaq de'era 'artaunaxanaxac da sheeta, aỹem itauan da seloquiaxan na ñepa'aguenaxauapi qataq da selaxachigui na lpaqtaxat na huaqta'a't nỹecpi maye lalamaxat namayepi.»

³¹ «Da nqa'aicỹaxac Ñim Lo'onatac 'Enauacna, ỹataqta nalochiguiñi; qataq naua ỹa'n la'aqtaqa, ỹataqta qaipi'iỹa'alo. Qataq mpaxaalec ca ỹe'eguenot Ñimaye.

³² Cha'aye ¿Negue'to' ca lỹa Atamnaxala' ye nacheñita Ñim Nataxala'? ¡Qataq nacheñita Ñimaye da qomi' mpaxattaleguete!

³³ Qataq Ñim Lo'onatac 'Enauacna, nacheñi Ñim aỹem ỹa'añaqchet, qataq no'oitegue naqa'en da ỹecỹaxac.

³⁴ Qataq sa ilaua'ague naqa'en da iqauaxac, 'eeta'am ana ñi'imshe, qataq aỹem ỹa'añaxatchiguiñi da sootasheguema na qaỹoqotcheguema,

³⁵ qataq aỹem ỹapaxaguenec da ñalaataxac, qataq ỹo'ot da ỹa'añaxac da yaqto' sauec na nchecnec bronce.»

³⁶ «'Am, aỹem 'antela'a, qataq aỹem 'anca'alaxatec; qataq da 'archoxonnataxanaxa, nquictauec naqa'en da ñeqouagaxa.

³⁷ Qataq no'oitegue 'anqa'en so ỹec, da yaqto' saishet da huo'o ca sepogolaxaisop.»

³⁸ «Qataq da secanapec na ñepa'aguenaxauapi, nache ivitta'a da sevi', qataq saishet da ñe'eguelaq, da saxanaxa da ñematchiguiñi namayepi.

³⁹ Nache ỹataqta ñematchiguiñi, qataq sapigui. ¡Nache saishet da ỹe'eguelaxa da ñisheguem!

⁴⁰ Qataq aỹem 'anem da ỹa'añaxac da sootaigui da alaataxac, qataq aỹem nañanot 'anqa'en, na ñepa'aguenaxauapi,

⁴¹ qataq datauec 'anqa'en na namayepi. Nache ishet da ñematchiguiñi 'anqa'en na aỹem nquiỹatega.

⁴² Namayepi iỹaxaataique co'ollaxa ca ntaunaguec, qalaxaye qaica ca anac da itauan, nataqa'en iỹaxaatacot Ñim Nataxala', qalaxaye Ñimaye saishet da hua'axaỹa.

⁴³ ¡Nache ỹataqta ñelaxatchiguiñi, 'eeta'am ñaqa'en na namoxoỹaxa! ¡Qataq sapigui, 'eeta'am ñaqa'en na nshaxa na nqa'aic!

⁴⁴ Qataq aỹem 'eltaxaneguet da ncotaxac na maiche ihuo' le'ecpi, qataq aỹem 'aỹa'anagui da lataxala' na ỹotta'a't shiỹaxauapi, nache samaqtac na shiỹaxauapi maye sa sauatton.

⁴⁵ Qataq na chegaqauecpi qalaq aỹem ỹo'oxoren, qataq da choche aỹem hua'axaỹa da samaxasoxon, nache namayepi aỹem ỹalaxaguet.

⁴⁶ Nache ne'ena chegaqauecpi, qaica ca la'añaxac, qataq ỹataqta iviloxol da ca'aisalo naua nqañoxotaqa'ate!»

⁴⁷ «¡Qaq nache 'eetai' qome Ñim Nataxala'! ¡Ỹataqta qaỹo'oxoren Ñim Ñatamnaxala' maye ica'alaxaqui!

⁴⁸ Ñim Lo'onatac 'Enauacna, nacheñi Ñim aỹem iueelec, qataq aỹem nañanot naqa'en na shiỹaxauapi.

⁴⁹ Qataq aỹem isoueeguesop na ñepa'aguenaxauapi, qataq na sa ỹalaq maye aỹem dataỹa'aguetpi. Qataq aỹem ntelaqna'aguet na shiỹaxauapi maye qaica ca iren.

⁵⁰ Qaq ỹoqo'oye 'Am Nataxala', ỹataqta 'Am sho'oxoren da sootaigui na ỹotta'a't shiỹaxauapi, qataq so'onaxaataueegue da 'are'enaxat.

⁵¹ Qataq ỹataqta 'aỹa'anem da dauegaxan, na nta'a maye 'arca'aguishec qataq nache 'eetai' da 'arauotaxanaqtaic na David qataq na chegoxoguetpi.»