2 Samuel 21 - La'aqtaqa Ñim Lo'onatac 'Enauacna 2013

So gabaoniitapi ipalaique lvi'

¹ Qaq nache huetoigui de'era lo'onataxanaxac da nta'a so David, da huo'o co'ollaxa so nqouaxa soua tres vi'iye. Nache so David, inat Ñim Nataxala', qaq Ñim Nataxala' 'enapeco': «Qomye souaxat so Saúl qataq so llalaqpi da ỹalauat co'ollaxa so gabaoniitapi, nache nagui huo'o ne'ena nqouaxa.»

² Nache so David, iỹaxana co'ollaxa so gabaoniitapi da yaqto' detaxaỹapegue'. Qaq se'eso gabaoniitapi, saishet da Israel le'ecpi, somayepi chegoxoguetpi co'ollaxa so hua'au amorreopi, maye naỹamaxate' co'ollaxa so Israel le'ecpi. Qalaxaye so Saúl, mashe huac co'ollaxa da nmatchiguiñi somayepi, souaxat da ndaqteguelec so Israel le'ecpi qataq so Judá le'ecpi.

³ Nache so David, inat co'ollaxa somayepi, 'eeta': Qaq ¿negue'to' taxa ca qami' so'oteque, da yaqto' 'onaxaic qanqa'eñi ca talec ne'ena nhuo' le'ecpi maye lalamaxat Ñim Nataxala'?

⁴ Nache so gabaoniitapi 'enapeco': Qomi' saishet da sauoqtaique da saconaxa ana alom plata, qataq oro, so Saúl qataq na llalaqpi, huo'otaq da huo'o ñaqa'enaq ca ileu na Israel le'ecpi. Nache so David, 'enapeco': Qaq ¿Negue'to' qone' ca qansheetaique da qami' so'oteque?

⁵ Nache somayepi 'enapeco': Qomye se'eso shiỹaxaua maye huac da ỹataqta qomi' nmatchiyiñi, qataq qomi' saỹashenema da sonaqtalec na na'alhua na Israel le'ecpi,

⁶ somaye sauoqtaique da qomi' qoỹanema caua siete som chegoxoguet somaye, qaq huaña ñaqa'enaq qome ye Gabaa maye lma' so Saúl maye lca'aguishec Ñim Nataxala', da secoñeraqrashegue'm, nache ỹauaachiguilo ñaqa'enaq Ñim Nataxala'. Nache so nta'a, 'enapeco': Aja', qami' sanema qome caamaye.

⁷ Qalaxaye so nta'a ichoxoren co'ollaxa so Mefiboset, maye llalec so Jonatán, qataq laual so Saúl, souaxat da somaye naỹamaxate' co'ollaxa so Jonatán.

⁸ Nache ỹaconeua'alo so Armoni qataq so lỹa Mefiboset, maye llalqa so Saúl co'ollaq deco'oiguet aso Rispá, asom llale so Ayá. Qataq soua cinco llalqa aso Merab maye llale so Saúl, maye lta'a so Adriel maye llalec so Barzilay, som lma' ye Meholá,

⁹ nache ỹanem so Gabaón le'ecpi, nache somayepi icoñeldashegue'm co'ollaq ỹalauat soomaye, huaña aso qasoxonaxa maye lalamaqte Ñim Nataxala', ỹauaachiguilo Ñimaye da ileu', se'esoua siete shiỹaxau', huetoiguilo co'ollaq cheta'ague da qanqat ana ala na cebada.

¹⁰ Nache aso Rispá, asom llale so Ayá, ỹacona co'ollaxa so sansatta hualoq laỹe maye la'anaxat da lasouaxac, ime nache ipiguiiñi somaye da yaqto' nnalec da huetalec aso coma'. Qaq nache huetaña co'ollaxa yemaye, chegoqta'a se'eso la'auaxanec na'a'q da qanqat ana ala na cebada, nache ivitta'a da huo'o so auot, da ilotagueto soomaye do'otaxaategueleguete da yaqto' saishet da che'c na qoỹo ye na'a'q, qataq na shiguiỹac ye pe.

¹¹ Qaq co'ollaq qaỹa'aqtaxanem so David, da 'eetec aso Rispá maye ỹaqauga co'ollaxa lhua so Saúl,

¹² nache ỹe'eguena'alo co'ollaxa soua lpi'ineqa so Saúl, qataq so llalec Jonatán, maye ỹaỹamaxa't co'ollaxa som lma' ye Jabés, yem huaigui ye Galaad. Cha'aye somayepi decachiỹa co'ollaxa huaña ye naponqa' ye Betsán yem huaña da qaicoñeldashegue'm co'ollaq ime da noxonec so Saúl, huaña ye Gilboa.

¹³ Nache so David damaxasoxoolec da qaỹache' soua lpi'ineqa so Saúl, qataq so Jonatán, nataqa'en qalaỹona't so lpi'inecpi soua siete ỹale't maye qaicoñeldashegue'm co'ollaq qaỹalauat.

¹⁴ Nache se'esoua lpi'ineqa so Saúl qataq so Jonatán, qailaroiguilo aso nhuachiqui so Cis, maye lta'a so Saúl, maye naña ye Selá yem 'alhua Benjamín. Qaq nache qaipacchigui co'ollaxa da lamaxasoxonaxac so nta'a, huaña nache Ñim Nataxala' ichoxoren so lma' se'eso 'alhua.

So Abisay npaxaalec so David

¹⁵ Qaq so filisteopi qaltaq ỹe'eguelaxalec co'ollaxa da nalaate' so Israel le'ecpi, nache so David qataq so nalleppi taỹa da nalaate' somayepi. Qalaxaye so David ye ỹataqta nasamñi co'ollaxa,

¹⁶ nache huo'o so shiỹaxaua logoraic, le'enaxat Isbibenob somaye huotaique da ỹalauat co'ollaxa so David. Qaq aso lataquiaxai bronce somaye, napacalec ye tres kilos, qataq na'attagui so dalaxaicolec lailonec.

¹⁷ Qalaxaye so Abisay, maye llalec aso Seruyá, itauan co'ollaxa so David, nache taỹa so filisteo da delogui', nache ỹalauat. Ime, nache so nalleppi so David, ỹan da la'aqtac, 'eeta': Nagui nache saishet qome da 'avi'eguelaxa da 'anqo'ona ca alaataxac 'am nta'a, cha'aye saiuena'a da huo'o ca 'am ỹalauat, huaña nache qaica ca nataxala' na Israel.

¹⁸ Qaq co'ollaq mashe qaỹoqtegue de'era, nache huo'o so lỹa alaataxac da qanalaate' so filisteopi huaña ye Gob, huaña co'ollaxa nache so Sibecay som husatiita, ỹalauat so Saf, maye chegoxoguet so logoraicpi.

¹⁹ Ime, qataq huo'o so lỹa alaataxac da qanalaate' so filisteopi, huaña ye Gob, nache so Eljanán, som llalec so Yaré, maye lma' ye Belén, ỹalauat co'ollaxa so Goliat, maye Gat le'ec. Qaq aso lataquiaxai ỹataqta late'erai qaq so lauaq 'eeta'am na nqaleenaxanaxat.

²⁰ Qaltaq huo'o co'ollaxa so lỹa alaataxac huaña ye Gat. Nache huo'o so shiỹaxaua logoraic, seis ana llaxaatapi ñi 'oonolec naua lhuaxaye, qataq seis ana lqonapi ñi 'oonolec naua lapia'ate.

²¹ Qaq somaye iloquiaxan co'ollaxa so Israel le'ecpi, qalaxaye so Jonatán maye llalec so Simea, som lqaỹa so David, ỹalauat somaye.

²² Qaq se'esoua cuatro shiỹaxau' logoraiqa, soomaye chegoxogueta so Refaj, maye le'ec ye Gat, qalaxaye loxonqa co'ollaxa so David qataq so ltauapi.