2 Samuel 1 - La'aqtaqa Ñim Lo'onatac 'Enauacna 2013

So David la'axaỹaxac da qaỹalauat so nta'a Saúl

¹ Qaq co'ollaq mashe ime da qaỹalauat so Saúl, nache so David mashe nvita ye Siclag da yaqto' hua'a yemaye soua dos na'axa'te, co'ollaq ime da loxonec so amaleciitapi.

² Qalaxaye so na'a'q tres, nache nvireua'a ye Siclag so 'oonolec ỹale maye chegaqa'a ye lanataqa' so Saúl, qaq somaye ỹataqta colaqta'ape soua alogo, qataq nlaqchigui na lqaic na 'alhua souaxat da nqui'ic. Qaq co'ollaq ivireua'a so David, nache ỹa'alyiñi naua l-llecte, iviraxata'aguet naqa'en na latap na 'alhua.

³ Nache so David inat somaye, 'eeta': ¿Hua'ague ca 'auachegoqta'ague? Nache somaye, 'enapeco': Qomye aỹem qoỹet, sachegoqtauga ye lanataqa' ye Israel le'ecpi.

⁴ Nache so David 'enapeco': ¿Ta'ainco' camayepi? ¡Ñaq aỹem 'aua'aqtaxanem! Nache somaye 'enapeco': Qomye so alleppi Israel le'ecpi dataueeguesop da alaataxac, qataq qalota so ileu. ¡Nataqa'en ileu ye Saúl qataq ye llalec Jonatán!

⁵ Nache so David qaltaq ỹe'eguelaxalec da inat somaye, 'eeta': ¿Qaq ca 'eeteco' da 'auaỹaten da ileu ca Saúl qataq ca llalec Jonatán?

⁶ Nache somaye 'enapeco': Qomye choche huaqteguet da soota'a añi qasoxonaxa Gilboa, nache selota'a so Saúl, da ỹasheltalec aso lataquiaxai, qaq aso naigonapi qataq so netalec so caipi mashe nayeeta'a somaye.

⁷ Qaq somaye namata'ague na l-laq nache aỹem ila'a, nache aỹem iỹaxana. Nache ñeqo'ona da yaqto' so'ot ca aỹem ỹamaxalec.

⁸ Nache somaye aỹem inat, 'eeta': ¿Negue't 'am? Nache aỹem sheeta': Qomye aỹem amaleciita.

⁹ Nache somaye aỹem 'enapega, 'eeta': Ñaq aỹem 'anquigueua'a, nache aỹem 'aualauat, cha'aye mashe seleetapigui', qalaxaye saishet da ỹoqta seleu.

¹⁰ Ỹoqo'oye aỹem ñiquigueua'a somaye, nache salauat, cha'aye mashe huañi nache saỹaten da saishet da nca'altauec. Ime, nache ñeqat ana naro'o da nta'a, qataq na lhuaxashec, nache 'am ñera'a 'am ỹataxala'.

¹¹ Nache so David qataq so nalleppi co'ollaq hua'axaỹa de'era, nache ncolaxata'aisalo soua alogo souaxat da nqui'ic,

¹² nache somayepi nỹeetac qataq nqouaqcheela't ivitta'a so pe, souaxat so Saúl qataq so llalec Jonatán, qataq so alleppi maye lalamaxat Ñim Nataxala', qataq so nhuo' Israel le'ecpi, maye qairota'a so ỹeelonec co'ollaq qaỹalauat.

¹³ Nache so David, inat co'ollaxa se'eso nsoqolec maye ndoua'a da la'axaỹaxac, 'eeta': ¿Hua'ague ca 'auachegaqa'ague? Nache somaye 'enapeco': Qomye sachegaqauec, aỹem amaleciita.

¹⁴ Nache so David, 'enapeco': Qaq ¿ta'ainco' da sa 'añi'iỹaleco' da 'aualauat co'ollaxa so nta'a maye lca'aguishec Ñim Nataxala'?

¹⁵ Nache somaye iỹaxana so 'oonolec som nalleppi, nache 'eeta': ¡Ña 'aualauat de'era! Nache somaye ỹa'arapec co'ollaxa se'eso amaleciita, nache ỹalauat.

¹⁶ Qaq so David 'enapeco': 'Am, maiche 'anasouaxaala't da 'am qaỹalauat, cha'aye maiche 'aua'axat da 'aualauat so nta'a maye lca'aguishec Ñim Nataxala'.

Da lo'onec so David souaxat da laquicoxo

¹⁷ Nache so David, ỹo'on so lo'onec nỹeetaueegue, souaxat da l-leuaxa so Saúl qataq so llalec Jonatán,

¹⁸ qataq ỹamaxalec da qaỹapaxaguenec so shiỹaxauapi ye Judá. Qaq se'eso no'onec nanettalec aso lere so le'enaxat No'on da Lataxac, qaq somaye, 'eeta':

¹⁹ «¡Huaña ye qaỹoqotcheguemec, nache imeuo da llo'oxoyec na Israel! ¡Qaq so 'añaxaicpi qalaq nmañi da ileu!

²⁰ ¡Saishet qome da qaua'aqtaxañim ye hueta'a ye Gad, qataq saishet da qaua'axache da qoquiitague' so nqa'aicpi ye Ascalón! ¡Yaqto' saishet da ntootapigui' na 'alpi filisteapi, qataq da dasottagui ana ỹaqa'a da la'amqaanataxanaxac!

²¹ ¡Qaq qami' qasoxonaxapi ye Gilboa, saishet qome da ỹe'eguelaxa da qami' taleguete ca auot qataq ca 'aỹa, yaqto' saishet da ñaxaalec ca nañiguishec! Cha'aye huaña co'ollaxa da huetaiya' qanqa'en aso lpaqtaxanaqtepi so 'añaxaicpi, qataq da qaica ca 'enec qanqa'en aso lpaqtaxanaqte so Saúl.

²² Cha'aye so lchecnec so Jonatán, qataq so lainec so Saúl, saishet da ñe'eguelaqtreuo, da saq huagui na ltago'q, qataq na lcheta na ỹataqta 'añaxaicpi, maye nloquiaxauapi.

²³ So Saúl qataq so Jonatán, soomaye ỹataqta auochaxau', co'ollaq ñaq nca'altrauec, qalaq sa nỹoteegache, qaq 'eeta'am co'ollaq ivita da ileu' nache sa nỹoteegache. ¡Soomaye ỹataqta qayaqaiqa, napacaleguete ca huole da naloxoyaxa'c! ¡Qataq napacalec ca quiyoc da la'añaxa'c!

²⁴ ¡Qami' llalpi so Israel, ña qanỹeñiilec qome ye Saúl, yem qami' no'otaxanaxa'n co'ollaxa, yem qami' ỹaañiguilo so nogoxot tocalec, qataq so ỹataqta no'on lino, maye llo'oxoraxat na oro!

²⁵ Qaq ¿ta'ainco' da isheto' co'ollaxa da noxonec so 'añaxaicpi da huaigui so alaataxac? ¡Qataq da huasheguema na pa'asheguem aye qasoxonaxapi da ileu so Jonatán!

²⁶ ¡Qaq aỹem ỹataqta saquico, souaxat 'am ỹaqaỹa Jonatán! ¡Cha'aye 'am ỹataqta aỹem 'arauotaxat co'ollaxa! Qaq de'era 'arauotaxanaqtaic co'ollaxa, napacalec da lauotaxanaqtaic aca 'alo.

²⁷ ¡Ta'ainco' da isheto' da noxonec co'ollaxa so 'añaxaicpi! ¡Qataq da imeuo, qanqa'en so no'ogoxonaxatpi!»