2 Reyes 8 - La'aqtaqa Ñim Lo'onatac 'Enauacna 2013

Aso 'alo Sunén lashe ñe'eguelaxaala't so na'alhua

¹ So Eliseo 'enapega co'ollaxa aso 'alo, asom late'e so nogotolec maye ỹe'eguelaxa co'ollaxa da nca'alec naqa'en somaye, da asomaye qataq so llalaqpi taỹa ca lỹa 'alhua, cha'aye Ñim Nataxala', ỹa'axatta'a da huo'o ca ỹataqta lta'araic nqouaxa yi'iye 'alhua, huaiguilo caua siete vi'iye.

² Nache asa'aso 'alo naỹamaxat, da ỹo'ot dam la'aqtac so la'aqtaxanaxanec Ñim Lo'onatac 'Enauacna, nache ỹauec so llalaqpi, taỹa ye na'alhua so filisteopi, qaq nache netaña somaye soua siete vi'iye.

³ Qaq co'ollaq mashe ivildec soua siete vi'iye, nache asa'aso 'alo ỹe'eguelaq, ca'ai ye na'alhua so filisteopi. Ime, nache asomaye taua'a so nta'a da iỹaxanot, da ỹe'eguelaxatem so lma', qataq som na'alhua asomaye.

⁴ Qaq huaqchigui co'ollaxa da so nta'a, na'aqtaxaatague' so Guejazí, som lamaxashec so la'aqtaxanaxanec Ñim Lo'onatac 'Enauacna, cha'aye som nta'a 'enapega somaye da da'aqtaxanem 'enauac nam sa qaỹauanapegapi maye ỹo'ot da na'aalaxa, maye ỹo'ot som Eliseo.

⁵ Qaq co'ollaq so Guejazí ñaq da'aqtaxaatapeguem so nta'a da 'eetec so Eliseo co'ollaq nca'alaxatec so nogotolec maye mashe ileu, nache ivireuo asa'aso 'alo maye nachaso aso ỹa'axattac somaye, da iỹaxaneua'a da qaỹe'eguelaxatem so lma', qataq so na'alhua. Nache so Guejazí, 'enapeco': «'Am nta'a, maye ỹataxala', ara'ara 'alo, nachara ara sa'axattac qataq 'era da llalec maye so Eliseo nca'alaxatec.»

⁶ Nache so nta'a inato' aso 'alo, nache asomaye da'aqtaxanem so nta'a, dam huaigui co'ollaxa asomaye. Huaña, nache so nta'a ỹamaq so lamaxashec, da yaqto' huapegue' asa'aso 'alo da qaỹe'eguelaxatem so na'alhua, qataq 'enauac so lalamaxatpi, qataq aso naueque maye chegaqaigui som na'alhua asomaye, chegoqchiguiña so na'a'q co'ollaq ca'ai yemaye, nache ivitta'a nagui.

So Azael qataq so nta'a ye Siria

⁷ Qaq co'ollaq ime de'era, nache so Eliseo taỹa ye Damasco, qaq se'esoua na'axa'te, sano'on co'ollaxa so Ben Adad, maye nta'a ye Siria, nache qaỹa'aqtaxanem somaye da nvita yi'iye 'alhua so la'aqtaxanaxanec Ñim Lo'onatac 'Enauacna.

⁸ Huaña, nache so nta'a, 'enapega so Jazael, 'eeta': Ñaq 'anqo'ona qome cam la'aqtaxanaxanec Ñim Lo'onatac 'Enauacna, qataq 'auauo'o ca 'auache da yaqto' nme 'anqa'en camaye. Nache 'auỹaxanot da ichemaxata ca la'aqtac Ñim Nataxala', da huo'otaq ishet da aỹem no'oita qome.

⁹ Nache so Jazael, nqo'ona so Eliseo, nache ỹache som ỹataqta no'on lachetaqtaxanaxatpi maye ỹachegoxotaña ye Damasco, nache dachoxoolec aso cuarenta nauanaxanaxapi. Qaq co'ollaq ivira so hueta'a somaye, nache taua'a, nache 'eeta': Ñi 'aramaxashec Ben Adad, maye nta'a ye Siria, aỹem namaq da 'am senat, da ¿peta'a ishet da no'oita qome?

¹⁰ Nache so Eliseo, 'enapeco': 'Aue, 'anqo'ona camaye, nache 'aua'aqtaxanem da no'oita qome, qalaxaye Ñim Nataxala' aỹem da'aqtaxanem, da camaye nache 'ena'am taỹa'a da ileu.

¹¹ Nache som la'aqtaxanaxanec Ñim Nataxala', ỹataqta ỹalletot co'ollaxa so Jazael, nache ỹo'ot da saỹaỹaten ca 'eetec somaye. Ime, nache so la'aqtaxanaxanec Ñim Lo'onatac 'Enauacna, ỹataqta nỹeetac co'ollaxa.

¹² Nache so Jazael, inat somaye, 'eeta': ¿Ta'ainco' ye 'anỹeetac? nache so Eliseo, 'enapeco': Cha'aye saỹaten da 'auo'otec qome ca qauem na Israel le'ecpi, cha'aye 'auavigaxat qome na lle'eguenaxaquipi, qataq 'aurolec na ỹeelonec da 'aualauat na nsoxoppi, qataq 'aualauat nam ñaqpiolec maye llalaqpi namayepi, qataq 'aupeleca'ague ana da'am ana hualaxaipi.

¹³ Nache so Jazael, 'enapeco': ¿Qaq ca 'eetec da ỹo'ot de'era ỹataqta lta'araic ne'ena 'aramaxashec, ye namaye 'eeta'am ca pioq ltoxoic? Nache so Eliseo, 'enapeco': Qomye Ñim Nataxala', aỹem da'aqtaxanem da nache 'am qome, da 'am nta'a ye Siria.

¹⁴ Nache so Jazael ncoyeguene' so Eliseo, nache jec, taỹa so lataxala' Ben Adad, nache somaye inat co'ollaxa so Jazael, 'eeta': ¿Ca 'eetec ca la'aqtac ca Eliseo? Nache so Jazael 'enapeco': Qomye somaye, 'enapec da 'am no'oita qome.

¹⁵ Qalaxaye so lỹa na'a'q, nache so Jazael ỹacona so hualoq laỹe, nache co'ollaq ime da ỹapapiaxatta somaye, nache lapaxangui na lashec so Ben Adad, nache iviraxata'a da ileu. Qaq co'ollaq ime de'era, nache so Jazael talec da lo'onataxanaxac da nta'a.

Da lo'onataxanaxac so nta'a Jorán

¹⁶ Qaq co'ollaq mashe ivi' soua cinco vi'iye da nta'a so Jorán, som llalec so Ajab, maye nta'a ye Israel, nache so Jorán, maye llalec so Josafat, ỹacoolec da lo'onataxanaxac da nta'a ye Judá.

¹⁷ Nache so Jorán, mashe ivi' treinta y dos vi'iye da nachaalataxac co'ollaq ỹacoolec da lo'onataxanaxac da nta'a, qataq ocho vi'iye da lo'onataxanaxac huaña ye Jerusalén.

¹⁸ Qaq somaye icaachigui co'ollaxa da lo'onataxanaxac so nta'alpi ye Israel, qataq da lataxac som chegoxoguetpi so Ajab, cha'aye somaye huaroneguet co'ollaxa aso llale so Ajab, ỹoqo'oye nam ỹo'otpi ỹataqta saỹaỹamaxaren Ñim Nataxala'.

¹⁹ Qalaxaye na'aictaxa de'era, Ñim Nataxala' saishet da nlaxaañi ye Judá, souaxat da lauoche so lamaxashec David, cha'aye ỹan co'ollaxa so la'aqtac da nache 'eetai' naqa'en da 'ettaigui aso lcoỹaraxanaxaqui da icoỹattalec somaye, qataq so llalaqpi.

²⁰ Qaq huetoigui co'ollaxa da lo'onataxanaxac so Jorán, da so edomiitapi dataỹa'aguet so Judá le'ecpi, huaña nache ỹauo'o so maiche lta'a somayepi.

²¹ Nache so Jorán taỹa co'ollaxa ye Saír, ỹauota'a aso laigona maye nalaataxaquipi, qaq se'eso pe, nache somaye qataq so lataxala'pi so nalleppi maye netangui aso nalaataxaquipi laigonapi, nache iloquiaxan so edomiitapi maye coleesop co'ollaxa somayepi, qalaxaye so edomiitapi datauec co'ollaxa.

²² Huaña nache so Edom le'ecpi, ỹañoxot da huesoueeguesop da la'añaxac ye Judá, nache ivitta'a nagui. Qaq nache huetoiguilo se'esoua na'axa'te da so huaqta'a't nỹecpi ye Libna nataqa'en nỹotec co'ollaxa.

²³ Qaq nam laỹepi na'aqtaguecpi so Jorán, qataq nam ỹo'otpi co'ollaxa, nache nanettalec aso nere maye huetalec da na'aqtaguec so nta'alpi ye Judá.

²⁴ Qaq co'ollaq ileu so Jorán, nache qailareñi, huaqta'ai' qanqa'en so lta'alpi maye huaña so huaqta'a't nỹecpi maye lalamaxat so David. Nache da lo'onataxanaxac da nta'a, talec so llalec Ocozías.

Da lo'onataxanaxac so nta'a Ocozías

²⁵ Qaq co'ollaq mashe ivi' doce vi'iye da nta'a so Jorán som llalec so Ajab, maye nta'a ye Israel, nache so Ocozías, som llalec so Jorán, ỹacoolec da lo'onataxanaxac da nta'a ye Judá.

²⁶ Qaq somaye ivi' veintidós vi'iye da nachaalataxac co'ollaq ỹacoolec da lo'onataxanaxac da nta'a, qaq 'oonolec vi'i co'ollaxa da lo'onataxanaxac, huaña ye Jerusalén. Qaq aso late'e le'enaxat Atalía, asom llale so Omri, maye nta'a co'ollaxa ye Israel.

²⁷ Qaq somaye icaachigui co'ollaxa da lataxac so llalaqpi so Ajab, nache ỹo'ot nam saỹaỹamaxarenpi Ñim Nataxala', cha'aye somaye maiche laronaxanec so Ajab.

²⁸ Nache so Ocozías, nnaicapegue' co'ollaxa so Jorán, maye llalec so Ajab, da yaqto' iloquiaxan so Jazael, maye nta'a ye Siria, huaña ye Ramot yem 'alhua Galaad. Qalaxaye so siiriopi ique'emaqchet co'ollaxa so Jorán.

²⁹ Nache so nta'a Jorán, ỹe'eguelaxa co'ollaxa ye Jezrel, da yaqto' qanataren so lque'emaxa maye ỹo'ot so siiriopi huaña ye Ramot co'ollaq deloctague' so Jazael maye nta'a ye Siria. Qaq so Jorán, ye sano'on co'ollaxa, nache so Ocozías, som llalec so Jorán, maye nta'a ye Judá, nqo'ona co'ollaxa ye Jezrel da namaqtega somaye.