2 Reyes 6 - La'aqtaqa Ñim Lo'onatac 'Enauacna 2013

Aso qachepe maye iyiiñi

¹ Qaq huo'o so na'a'q, nache so na'aqtaxanaxanecpi 'enapega so Eliseo, 'eeta': Ña 'aumeten na nỹec maye sonaqtaigui 'am qataq qomi', namaye ỹataqta sa lcagui qataq sa ñaloxogui.

² Qaq no'on taxa da qomi' 'auasheete' da ñeqo'onaqaama so tala Jordán, da yaqto' llaỹonaxa't na qo'oipaqpi, qataq nache huaña yemaye da sa'araxañi ca qarma'. Nache so Eliseo 'enapeco': Aja', qauesomiỹa.

³ Qalaxaye huo'o' so 'oonolec somayepi, 'eeta': Ña qomi' 'anqouagueque taxa, nache qomi' 'auca'ateguelo. Nache somaye 'enapeco': Aja', qami' seca'ateguelo.

⁴ Nache so Eliseo, ca'atoigui co'ollaxa somayepi, nache co'ollaq choche iviraxaama so tala Jordán, nache somayepi iquesoq aso qo'oipaqpi.

⁵ Qalaxaye so 'oonolec somayepi co'ollaq ñaq iquesoqtac aso qo'oipaq, nache ñeuec aso nqachepe, nache tangui so 'etaxat. Nache somaye ỹa'alaq, 'eeta': ¡Aicoue, 'am ỹataxala'! ¡Asa'aso qachepe, asomaye choche qara'aale!

⁶ Nache so la'aqtaxanaxanec Ñim Lo'onatac 'Enauacna denataxano', 'eeta': ¿Hua'ague ca tachiguiña acamaxa? Nache somaye ỹachaxan so tachiguiña. Nache so Eliseo iquesoq so 'epaq, nache ỹasaqchiguiña som tachiguiña aso qachepe, nache naỹoxoosheguem naqa'en.

⁷ Nache so Eliseo 'enapeco': Ña 'auaconaxaama. Nache somaye ỹaconaxaama aso qachepe.

So Eliseo qataq so siiriopi

⁸ So nta'a ye Siria, nalattague' co'ollaxa so Israel le'ecpi, qaq co'ollaq ime da detaqtague' so lataxala'pi so nalleppi, nache huo'o yem ỹecapiguiña da ỹanaña da ỹa'ayiñi so lpe'lpi.

⁹ Huaña, nache so Eliseo, ỹamaxa da la'aqtac so nta'a ye Israel, 'eeta': «Saishet qome da 'ateuga yi'iye 'alhua, cha'aye ye siiriopi taỹa da naña yemaye.»

¹⁰ Nache so nta'a ye Israel, taỹa naxa naqa'en so nalleppi yem ỹecapiguiña co'ollaxa so la'aqtaxanaxanec Ñim Lo'onatac 'Enauacna, qaq nache qalota naxa da 'eeta'ac de'era so Eliseo, ỹoqo'oye qalota naxa da qoỹet se'eso nta'a.

¹¹ Nache so nta'a ye Siria, ỹataqta saỹaỹaten ca 'eetec souaxat de'era. Huaña, nache iỹaxaneuga so ltauapi, nache 'eeta': ¡Ñaq aỹem qaua'aqtaxañim taxa, da chaq negue't ca 'oonolec da shenaqta ca itauaatac so nta'a ye Israel!

¹² Nache huo'o so 'oonolec somayepi, 'eeta': Qomye qaica, 'am nta'a maye 'am ỹataxala', qalaxaye so na'aqtaxanaxanec Eliseo, maye lma' ye Israel, somaye nacheso som da'aqtaxaatapeguem naxa so nta'a ye Israel, 'enauac nam 'ara'aqtacpi maye 'anasaxauec da huaña ye ỹapogoñi 'aro'ochaqa'.

¹³ Nache so nta'a ye Siria 'enapeco', ñaq qauchemaxachiỹaique ca netaña ca Eliseo, yaqto' aỹem samaxasoxoolec camaye da qaỹaconeua'a. Qaq co'ollaq qaỹa'aqtaxanem da so Eliseo netaña ye Dotán,

¹⁴ nache se'eso nta'a, ỹamaq so nalleppi maye netalec so caipi, qataq so netangui aso naigonapi maye alaataxaquipi, qataq so qalota alleppi maye petañepi, nache somayepi, coleesop co'ollaxa so huaqta'a't nỹecpi ye Dotán so mashe pe.

¹⁵ Qaq so lamaxashec so Eliseo, co'ollaq ñesheguem so nte'etom so lỹa na'a'q, nache co'ollaq pa'auec, nache ila'a so alleppi maye netalec so caipi, qataq so netangui aso nnaigonapi maye alaataxaquipi da coleesop so huaqta'a't nỹecpi. Nache somaye 'enapego' so Eliseo, 'eeta': Qaq nagui, 'am ỹataxala', ¿hua'ago' ca shenaqtec?

¹⁶ Nache so Eliseo 'enapeco': Saishet da 'añi'i, cha'aye nam qomi' hueta'agueta ỹataqta qalota, napacalec nam hueta'aguet namayepi.

¹⁷ Nache so Eliseo, nqouagaxaunot Ñim Nataxala', 'eeta': «'Am Nataxala', 'am ñachoxonnot da nauachiguilo 'anqa'en naua la'ai'te da ỹamaxashec Guejazí, yaqto' nauaañi.» Nache Ñim Nataxala' ỹauachiguilo naua la'ai'te so lamaxashec so Eliseo. Nache somaye ila'a aye qasoxonaxapi da ỹataqta imattalec so qalota alleppi maye netalec na caaỹo, qataq na netangui aso nnaigonapi maye nalaataxaquipi maye 'ettaigui, nache coleesop ye hueta'a so Eliseo.

¹⁸ Qaq som siiriopi co'ollaq mashe yaqta'a da iloquiaxan somaye, nache so Eliseo natamnot Ñim Nataxala', 'eeta': «'Am ñachoxonnot da sa nauaañi 'anqa'en ne'ena shiỹaxauapi.» Nache Ñim Nataxala', sa nauaañi naqa'en somayepi, nache ipacchigui da nachoxonnaxac so Eliseo.

¹⁹ Nache so Eliseo 'enapego' somayepi, 'eeta': Ne'ena, saishet da nachena na nqa'aic, qataq saishet da nachena nam huaqta'a't nỹecpi maye qanmichiitaique, ñaq aỹem qauca'acheegue, nache qami' sauegalo cam ỹale maye qanmichiitaique. Nache somaye, ỹauega somayepi ye Samaria.

²⁰ Qaq co'ollaq iviraxata ye Samaria somayepi, nache so Eliseo nqouagaxauen, 'eeta': «'Am Nataxala', nagui, ñaq 'avi'eguelaxata da qaltaq nauaañi ne'ena shiỹaxauapi.» Nache Ñim Nataxala', qaltaq nauaañi naqa'en somayepi, nache somayepi ila'a da huetangui na laiñi, so huaqta'a't nỹecpi ye Samaria.

²¹ Nache so nta'a ye Israel, co'ollaq ilaigui somayepi, nache inat so Eliseo, 'eeta': ¿'Am ỹataxala', peta'a salauat namayepi, aỹem salauat namayepi?

²² Qalaxaye so Eliseo 'enapeco': 'A'i, saishet da 'aualauat. ¿Qalqo' 'auanaỹa'ac da 'aualauat co'ollaxa ca 'oxonecpi da 'aurolec ca 'ainec, qataq aca 'archecna? Ñaq 'auquia'axan qataq 'anỹomaxan namayepi. Qaq da ime, nache 'avi'eguelaxata cam lataxala'pi namayepi.

²³ Huaña, nache qaỹo'ot so lquia'axac lta'araic somayepi, nache deque'etac qataq nỹomtac. Qaq co'ollaq ime da lquia'axac, nache so nta'a ye Israel, ỹe'eguelaxat somayepi, nache somayepi ỹe'eguelaxa som lta'a. Huaña, nache so siiriopi ỹaxaañi da ỹachetac so lo'ogoxonaxatpi da coleeteguelec ye na'alhua na Israel le'ecpi.

Co'ollaq huo'o so nqouaxa ye Samaria

²⁴ Qaq co'ollaq mashe qaỹoqtegue de'era, nache so Ben Adad maye nta'a ye Siria, somaye laỹona't co'ollaxa 'enauac so nalleppi, nache taỹa da coleesop ye Samaria da yaqto' iloquiaxan.

²⁵ Qaq souaxat da ỹataqta qaỹoqtec de'era, nache huo'o so nqouaxa lta'araic ye Samaria, ỹoqo'oye da qaimen na 'oonolec lqaic na 'ashena, nache añi lasheue ivi' ochenta lcatpiole plata, qaq na un cuarto litro na la'atec na qoto', nache añi lasheue ivi' cinco ana lcatpiole plata.

²⁶ Qaq huo'o so na'a'q, da so nta'a ye Israel, quetalec na pa'asheguem so npaqtaxanaxat, nache huo'o aso 'alo iqaqaateguesheguema somaye, 'eeta': ¡'Am nta'a, ña qomi' 'autaua'n!

²⁷ Nache so nta'a 'enapeco': Ñim Nataxala' da saishet da 'am itauan, nache ¿ca sheeteco' da 'am setauan? Ye qaica ca aỹem hueto'ot trigo, qataq lataxa da 'am sanem.

²⁸ Qataq 'enapeco' so nta'a: ¿Negue't ca qonetapeguec 'am? Nache asomaye 'enapeco': Ana'ana 'alo aỹem dequiguiỹo'ot da hua'auñi so ỹalec da sacheguenaq, qaq qonte' nache sacheguenaq so llalec aramaye.

²⁹ Nache qomi' seuoshaq, sanaxauaq som ỹalec, ime nache sacheguenaq somaye. Qaq so lỹa na'a'q nache shenapega aramaye da ndouo ca llalec da yaqto' sacheguenaq, qalaxaye aramaye ỹoxooñi camaye.

³⁰ Nache so nta'a co'ollaq hua'axaỹa de'era la'aqtac asa'aso 'alo, nache ncolaxata'aisalo soua alogo souaxat da lauel, qalaxaye somaye nache queto'ot da quetalec so pa'asheguem so npaqtaxanaxat, nache 'enauac se'eso nhuo' le'ecpi ila'a somaye da ipa'axaatrauo soua sansatte' alogo.

³¹ Nache so nta'a 'enapeco': «Ñim Lo'onatac 'Enauacna, ỹataqta lta'araic qome naqa'en ca ñeuaxanaguec, da ne'ena na'a'q saishet da secheguec na lqaic ca Eliseo, maye llalec som Safat.»

³² Qaq so Eliseo, hueta'a co'ollaxa ye lma' nso'ootañi datata'aguet so nqueroxonecpi. Nache so nta'a ỹamaxa somaye so la'aqtaxanaxanec, qalaxaye co'ollaq ñaq saxanaxa da ivireuo se'eso na'aqtaxanaxanec, nache so Eliseo 'enapego' so nqueroxonecpi, 'eeta': Ña qauloichigui nagui da, ñi'iñi llalec so laataxanaxaic, huo'o na aỹem namaxa da yaqto' icheguec na iqaic. Qalaxaye qom nvireuo ne'ena lamaxashec ñimaye, nache qauauoi ca la'araxat ñi lasom da qauapoigui, yaqto' saishet qome da npa'auo namaye. Cha'aye mashe cheta'aguet da l-lamaxa naua lqauaxaqui' nam na'aco', maye nca'attaueegue namaye.

³³ Qaq co'ollaq ña na'aqtaxaatague' somayepi, nache so namaxashec nvireua'a so netaña so Eliseo, nache 'eeta': Qaq cha'aye 'enauac de'era qauem chegoqo'ot Ñim Nataxala'. Qaq ¿negue'to' ca lỹa seuattaique da chegoqo'ot Ñimaye?