2 Reyes 2 - La'aqtaqa Ñim Lo'onatac 'Enauacna 2013

So Elías qaỹaueegue da piguem

¹ Qaq co'ollaq mashe nayeeta'a so laloqo' da Ñim Nataxala', ỹaueegue da piguem so Elías, da queuoigui naqa'en aso daua'ache, nache so Elías, nnaictague' co'ollaxa so Eliseo da je'c, chegoqchiyiña ye Gilgal.

² Qaq so Elías, 'eetego' co'ollaxa so Eliseo, 'eeta': Nache qoueta'a taxa ne'ena, cha'aye Ñim Nataxala' aỹem ỹamaxague da Betel. Qalaxaye so Eliseo, 'enapeco': Aỹem sanot da ỹa'aqtac Ñim Nataxala' maye nca'altauec, qataq 'am, da saishet da 'am seỹotec. Huaña nache soomaye nnaicapega't co'ollaxa, nache choche ivittra'a ye Betel.

³ Qalaxaye som na'aqtaxanaxanecpi maye hueta'a ye Betel, huaqata'aguet co'ollaxa so Eliseo, nache 'enapego' somaye, 'eeta': ¿Peta'a 'auaỹaten da ne'ena na'a'q, Ñim Nataxala' ỹauec da 'anapaxaguenaxala'? Nache so Eliseo 'enapeco': Aja', mashe saỹaten, qaue'enaxañiitai'.

⁴ Qaq so Elías, qaltaq 'enapego' so Eliseo, 'eeta': Nache qoueta'a taxa ne'ena, cha'aye Ñim Nataxala' aỹem ỹamaxague da Jericó. Qalaxaye so Eliseo 'enapeco': Aỹem sanot da ỹa'aqtac Ñim Nataxala', qataq 'am, da saishet da 'am seỹotec. Huaña nache soomaye, qaltaq nnaicapega't co'ollaxa, nache choche ivittra'a ye Jericó.

⁵ Qalaxaye som na'aqtaxanaxanecpi maye netaña ye Jericó, huaqata'aguet co'ollaxa so Eliseo, nache 'enapego' somaye, 'eeta': ¿Peta'a 'auaỹaten da ne'ena na'a'q, Ñim Nataxala' ỹauec da 'anapaxaguenaxala'? Nache so Eliseo 'enapeco': Aja', mashe saỹaten, qaue'enaxañiitai'.

⁶ Qaq ime, nache so Elías, qaltaq 'enapego' so Eliseo, 'eeta': Nache qoueta'a taxa ne'ena, cha'aye Ñim Nataxala' aỹem ỹamaxa so tala Jordán. Qalaxaye so Eliseo, 'enapeco': Aỹem sanot da ỹa'aqtac Ñim Nataxala', qataq 'am, da saishet da 'am seỹotec. Huaña nache soomaye qaltaq nnaicapega't.

⁷ Qalaxaye nvi' so cincuenta na'aqtaxanaxanecpi, nache hua'a ye datatta, qataq qaỹata'a, yem huetra'a soomaye. Nache so Elías qataq so Eliseo, vi'iigueta co'ollaq huaña so loigue so tala Jordán.

⁸ Nache so Elías ỹacona so lapo', nache inana't nache iuaxaangui so 'etaxat, nache so 'etaxat colaxara'ache, huaña nache soomaye daqaqtegue so lleguetra da taitrague da le'ego.

⁹ Qaq co'ollaq mashe ivittrague da le'ego, nache so Elías 'enapego' so Eliseo, 'eeta': Ñaq aỹem 'aua'axatem nagui, chaq negue't ca 'anshetaique da 'am so'otec nagui da ñaq saxanaxa da aỹem qanqateeguesop da qoneta. Nache so Eliseo 'enapeco': Qomye sauotaique da ỹactec ca saconeguet de'era saqcha'a 'ara'añaxac.

¹⁰ Nache so Elías, 'enapeco': Ỹataqta huo'o da lqalaic de'era 'auỹaxanaique. Qalaxaye da ishet da 'avira'a da aỹem 'auauaategue qom aỹem qanqateeguesop da qoneta, nache 'am talec qome damaye. Qalaxaye qom saishet da aỹem 'auauanegue, nache saishet da 'am talec.

¹¹ Qaq co'ollaq ñaq quete', qataq na'aqtaxaatega't soomaye, nache nque'elaxatta da anac aso naigona 'ettaigui, qataq soua lauegaxala'ate caaỹo maye nataqa'en 'ettaiguilo, nache icolaxachiguilo soomaye, nache so Elías jec, taigue da piguem, queuoigui aso daua'ache.

¹² Qaq co'ollaq ỹauaachigui de'era so Eliseo, nache ỹa'alaq, 'eeta': «'Am ito'olec, 'am ito'olec. 'Am, maye qoneta'am aca naigona, qataq ca 'añaxaic alleppi da qoueta'aguet na Israel le'ecpi.» Qaq co'ollaq ime de'era, nache saishet da qaltaq ỹe'eguelaxa da ila'a so Elías. Huaña nache so Eliseo, ỹataqta ncolaxata'alo soua alogo.

¹³ Ime, nache ỹacona so lapo' so Elías, maye naañi co'ollaxa, nache ỹe'eguelaxa so tala Jordán, qaq co'ollaq ivita so loigue, nache vi'iiguet.

¹⁴ Ime, nache do'ogoxona som lapo' so Elías, da iuaxaangui so 'etaxat, nache na'axannec da la'aqtac, 'eeta': «¿Hueta'ague cam Nataxala', maye Natamnaxala' so Elías?» Qalaxaye co'ollaq choche iuaxangui so 'etaxat, nache colaxara'ache, nache so Eliseo, qaltaq ỹe'eguelaxatague da le'ego so tala.

¹⁵ Nache som na'aqtaxanaxanecpi maye lma' ye Jericó, maye hueta'atague da le'ego, co'ollaq ỹauaachigui de'era, nache 'enapeco': «Da saqcha'a la'añaxac so Elías, talec nagui na Eliseo.» Huaña, nache somayepi ca'atta'aguet somaye, nache ỹa'aroto naua l-llecte,

¹⁶ nache 'enapega somaye, 'eeta': Ne'ena 'aramaxashecpi maye hueta'a ne'ena, huo'o na cincuenta 'añaxaicpi maye ỹalectaigui namayepi. Qaq 'auasheetem taxa da nmitaique ca 'arataxala', cha'aye saiuena'a da so Saqcha'a La'añaxac Ñim Nataxala' ỹache, qalaxaye huo'otaq huo'o ca ỹasaxaña anam qasoxonaxapi, huo'otaq nam ca'amapega'tpi. Qalaxaye so Eliseo 'enapeco': 'A'i, saishet da huo'o ca qauamaqai.

¹⁷ Qalaxaye somayepi ỹataqta ỹe'eguelaqto'ot da dequicto'ot somaye, nache ivitta'a da ỹasateguet somayepi, nache somayepi ỹamaq so cincuenta ỹalleppi. Nache somayepi nmittaique co'ollaxa so Elías, soua tres na'axa'te, qalaxaye saishet da ỹanata.

¹⁸ Nache somayepi ñe'eguelaxaua'a ye Jericó, yem hueta'a co'ollaxa so Eliseo. Nache somaye 'enapeco': Mashe qami' sheetegalo mque' da saishet da qoqui.

So Eliseo ama naqa'en so npaxaatasheguem 'etaxat ye Jericó

¹⁹ Qaq som shiỹaxauapi maye lma' so huaqta'a't nỹecpi ye Jericó, 'enapego' so Eliseo, 'eeta': Ña 'aumeten na netaña nam huaqta'a't nỹecpi, namaye ỹataqta ỹaỹamaqchiguiñi, qalaxaye qauem na 'etaxat, qataq na 'alhua, qaica ca ñaxaalec.

²⁰ Nache somaye, 'enapeco': Ña qandoiuo qome aca naco'oña dalaxaale, qauachiỹangui qome ca toue. Nache co'ollaq qairoua'a somaye aso naco'oña,

²¹ nache so Eliseo, tauga co'ollaxa so npaxaatasheguem 'etaxat, nache icoyingui somaye so toue, nache 'eeta': Ñim Nataxala', 'eeta': «Aỹem ñataren ne'ena 'etaxat, nache saishet qome da qaltaq chegaqaigui ca nleuaxa, qataq da saq ñaxat ca nañiguishec ne'ena 'alhua.»

²² Qaq huaña, nache ỹataqta 'onaxaic so 'etaxat, nache ivitta'a nagui, nache ipacchigui da la'aqtac co'ollaxa so Eliseo.

²³ Huaña, nache jec co'ollaxa so Eliseo taỹa ye Betel. Qaq co'ollaq quetasheguemgue so nqa'aic, nache natena'aguet so nsoxoppi maye chegaqaua'a so huaqta'a't nỹecpi, nache somayepi ỹe'eetalec co'ollaxa so Eliseo, 'eeta': «¡Ña 'aunossheguem 'am qui'itaic! ¡Ña 'aunossheguem 'am qui'itaic!»

²⁴ Nache so Eliseo, nqoilec co'ollaxa ỹamata'aguet somayepi, nache ỹauota'a da le'enaxat Ñim Nataxala' da talec naqa'en somayepi so qauem la'aqtac. Huaña, nache ana'c soua dos oso maye chegoqraigui so aviaq, nache ỹataqta icolaxattac so cuarenta y dos se'eso nsoxoppi.

²⁵ Qaq ime, nache somaye tasheguema co'ollaxa añi qasoxonaxa Carmelo, qaq nache chegoqchiguiña co'ollaxa da ñe'eguelaxaña ye Samaria.