2 Reyes 15 - La'aqtaqa Ñim Lo'onatac 'Enauacna 2013

Da lo'onataxanaxac so nta'a Azarías

¹ Qaq co'ollaq mashe ivi' soua veintisiete vi'iye da lo'onataxanaxac so Jeroboán, maye nta'a ye Israel, nache so Azarías, maye llalec so Amasías, ỹacoolec da lo'onataxanaxac da nta'a ye Judá.

² Qaq somaye mashe ivi' dieciséis vi'iye da nachaalataxac co'ollaq ỹacoolec da lo'onataxanaxac, qataq ivi' cincuenta y dos vi'iye da lo'onataxanaxac da nta'a, huaña ye Jerusalén. Qaq aso late'e le'enaxat Jecolías, asomaye lma' ye Jerusalén.

³ Qaq so Azarías, ỹo'ot co'ollaxa nam ỹataqta ỹaỹamaxareeta Ñim Nataxala', cha'aye icaachigui da ỹo'ot nam ỹo'otpi co'ollaxa so lta'a Amasías.

⁴ Qalaxaye saishet co'ollaxa da nlaxaañi so qaỹoqotcheguema atamnaqa'pi, maye som nhuo' le'ecpi tasheguema naxa da ỹo'ot aso lachetaqtaxanaqtepi, qataq da ỹavigaxat so lchenaxanaxat.

⁵ Qalaxaye Ñim Nataxala', ỹo'ot co'ollaxa da nhuaxanaguec so nta'a Azarías, huec naqa'en so lepra, nache ivitta'a da ileu. Ỹoqo'oye so nta'a, ỹaqauga co'ollaxa naqa'en so lma', nache so llalec Yotán, ilo'ogue co'ollaxa se'eso nma' lta'araic, qataq ilo'ogue 'enauac so nhuo' le'ecpi.

⁶ Qaq nam laỹepi na'aqtaguecpi so Azarías, qataq nam ỹo'otpi co'ollaxa, nache nanettalec aso nere maye huetalec da na'aqtaguec so nta'alpi ye Judá.

⁷ Qaq co'ollaq ileu so Azarías, nache qailareñi, huaqta'ai' qanqa'en so hua'au lta'alpi, huaña so huaqta'a't nỹecpi maye lalamaxat so David. Qaq da lo'onataxanaxac da nta'a, nache talec so llalec Yotán.

Da lo'onataxanaxac so nta'a Zacarías

⁸ Qaq so mashe ivi' soua treinta y ocho vi'iye da nta'a so Azarías, maye nta'a ye Judá, nache so Zacarías, maye llalec so Jeroboán, ỹacoolec da lo'onataxanaxac da ilo'ogue so Israel le'ecpi, qaq ivi' seis ca'agoxoiqa da lo'onataxanaxac, huaña ye Samaria.

⁹ Qalaxaye nam ỹo'otpi co'ollaxa so Zacarías, ỹataqta saỹaỹamaxaren Ñim Nataxala', cha'aye 'eeta'am so hua'au lta'alpi da saishet da ca'ai nam qauem ỹo'otpi so Jeroboán som llalec so Nabat, maye ỹo'ot da huo'o na lasouaxashetpi so Israel le'ecpi.

¹⁰ Qaq so Salún, som llalec so Jabés, dataỹa'aguet co'ollaxa so Zacarías, nache iloquiaxan co'ollaq huaña ye Ibleam nache ỹalauat, huaña nache so Salún ỹacona da lo'onataxanaxac somaye.

¹¹ Qaq nam laỹepi na'aqtaguecpi so Zacarías, nache nanettalec aso nere, maye huetalec da na'aqtaguec so nta'alpi ye Israel.

¹² Qaq 'era da 'eetec da ipacchigui da la'aqtac Ñim Nataxala', co'ollaq 'enapega so Jehú, 'eeta': «De'era 'aro'onataxanaxac, talec qome ca 'aỹa'alec, 'arhual, qataq cam llalec ca 'arhual, qataq cam laual camaye, da ilo'ogue na Israel le'ecpi.»

Da lo'onataxanaxac so nta'a Salún

¹³ Qaq so Salún som llalec so Jabés, ỹacoolec da lo'onataxanaxac da ilo'ogue so Israel le'ecpi, co'ollaq mashe ivi' soua treinta y nueve vi'iye da lo'onataxanaxac so Uzías, maye nta'a ye Judá. Qalaxaye so Salún, ivi' 'oonolec ca'agoxoic da lo'onataxanaxac, huaña ye Samaria,

¹⁴ cha'aye so Menajén, som llalec so Gadi, chegoqchiguiña co'ollaxa ye Tirsa da taỹa ye Samaria, qaq co'ollaq ivita yemaye, nache iloquiaxan so Salún nache ỹalauat, qaq co'ollaq ime da ỹalauat, nache talec da lo'onataxanaxac somaye.

¹⁵ Qaq nam laỹepi na'aqtaguecpi so Salún, qataq co'ollaq dataỹa'aguet so Zacarías, nache nanettalec aso nere maye huetalec da na'aqtaguec so nta'alpi ye Israel.

¹⁶ Qaq nache huetoiguilo se'esoua na'axa'te da so Menajén, iloquiaxan co'ollaxa so huaqta'a't nỹecpi ye Tifesaj, nache ỹacona 'enauac som nogoxoshetpi maye huetaigui somaye, qataq som logoxoshetpi so saqaỹapequepi somaye. Qaq souaxat da saishet da qaỹauateguet co'ollaxa somaye, nache chegoqchiguiña ye Tirsa da iloquiaxan co'ollaxa, nache nataqa'en ipeleca'ague ana da'am aso hualaxaipi.

Da lo'onataxanaxac so nta'a Menajén

¹⁷ Qaq co'ollaq mashe ivi' treinta y nueve vi'iye da lo'onataxanaxac so Azarías, maye nta'a ye Judá, nache so Menajén, som llalec so Gadi, ỹacoolec da lo'onataxanaxac da ilo'ogue so Israel le'ecpi, qaq ivi' diez vi'iye da lo'onataxanaxac, huaña ye Samaria.

¹⁸ Qalaxaye somaye ỹo'ot nam ỹataqta sa ỹaỹamaxaren Ñim Nataxala', cha'aye saishet da ca'ai nam nasouaxashetpi maye ỹo'ot co'ollaxa so Jeroboán, som llalec so Nabat, maye ỹo'ot da huo'o na lasouaxashetpi so Israel le'ecpi.

¹⁹ Qaq se'esoua vi'iye da nta'a somaye, nache so Pul, maye nta'a ye Asiria, taỹa da iloquiaxan co'ollaxa yi'iye 'alhua. Nache so Menajén, ỹanem co'ollaxa so Pul, so treinta y tres mil kilos na lcat plata da yaqto' saishet sa qairaxanai' da lo'onataxanaxac da nta'a.

²⁰ Nache so Menajén, 'enapega 'enauac som sallaxanecpi so Israel, da ỹaneuo aso lsheetenaxanaqte, da yaqto' isheeten so nta'a ye Asiria, nache ỹamaxalec somayepi da ỹaneuo ca napactelec ca medio kilos ca plata. Huaña nache se'eso nta'a ye Siria, ỹe'eguelaxa so lma', nache ca'ai se'eso 'alhua.

²¹ Qaq nam laỹepi na'aqtaguecpi so Menajén, qataq nam ỹo'otpi, nache nanettalec aso nere maye huetalec da na'aqtaguec so nta'alpi ye Israel.

²² Qaq co'ollaq ileu so Menajén, nache qailareñi, huaqta'ai' qanqa'en so lta'alpi, qaq da lo'onataxanaxac da nta'a, nache talec so llalec Pecajías.

Da lo'onataxanaxac so nta'a Pecajías

²³ Qaq co'ollaq mashe ivi' soua cincuenta vi'iye da lo'onataxanaxac so Azarías, maye nta'a ye Judá, nache so Pecajías som llalec so Menajén, ỹacoolec da lo'onataxanaxac da ilo'ogue ye Israel, qaq da lo'onataxanaxac ivi' dos vi'iye, huaña ye Samaria.

²⁴ Qalaxaye somaye ỹo'ot nam ỹataqta saỹaỹamaxaren Ñim Nataxala', cha'aye saishet da ca'ai nam nasouaxashetpi maye ỹo'ot co'ollaxa so Jeroboán, som llalec so Nabat, maye ỹo'ot da huo'o da lasouaxashet so Israel le'ecpi.

²⁵ Qalaxaye huo'o so lataxala' so nalleppi somaye, le'enaxat Pecaj som llalec so Remalías, somaye ntaune' co'ollaxa so cincuenta ỹalleppi, maye lma' ye Galaad, nache dataỹa'aguet so Pecajías, nache ique'emaqchet qataq ỹalauat co'ollaxa, huaña so nma' lta'araic maye naña ye Samaria, qaq co'ollaq ime, nache de'era lo'onataxanaxac da nta'a, talec so Pecaj.

²⁶ Qaq nam laỹepi na'aqtaguecpi so Pecajías, qataq nam ỹo'otpi somaye, nache nanettalec aso nere maye huetalec da na'aqtaguec so nta'alpi ye Israel.

Da lo'onataxanaxac so nta'a Pecaj

²⁷ Qaq co'ollaq mashe ivi' soua cincuenta y dos vi'iye da lo'onataxanaxac so Azarías, maye nta'a ye Judá, nache so Pecaj som llalec so Remalías, ỹacoolec da lo'onataxanaxac da ilo'ogue so Israel le'ecpi, qaq ivi' soua veinte vi'iye da lo'onataxanaxac, huaña ye Samaria.

²⁸ Qalaxaye somaye ỹo'ot co'ollaxa nam ỹataqta saỹaỹamaxaren Ñim Nataxala', cha'aye saishet da ca'ai nam nasouaxashetpi maye ỹo'ot co'ollaxa so Jeroboán som llalec so Nabat, maye ỹo'ot da huo'o na lasouaxashet so Israel le'ecpi.

²⁹ Qaq huetoiguilo se'esoua na'axa'te da so Pecaj nta'a ye Israel, nache nvita yi'iye 'alhua so Tiglat Piléser, maye nta'a ye Asiria, nache loxonec ye Iyón, Abel Betmacá, Yanoja, Cedes, Jazor, Galaad, Galilea, qataq 'enauac ye na'alhua so Neftalí, qataq 'enauac som netalecpi yemaye da loxonec, nache ỹauega ye Asiria.

³⁰ Huaña nache so Oseas som llalec so Elá, dataỹa'aguet co'ollaxa so Pecaj som llalec so Remalías, qaq somaye iloquiaxan co'ollaxa so Pecaj, nache ỹalauat. Qaq 'era da 'eetec da so Oseas, talec da lo'onataxanaxac se'eso nta'a, co'ollaq mashe ivi' soua veinte vi'iye da lo'onataxanaxac so Yotán som llalec so Uzías.

³¹ Qaq nam laỹepi na'aqtaguecpi so Pecaj, qataq 'enauac nam ỹo'otpi, nache nanettalec aso nere maye huetalec da na'aqtaguec so nta'alpi ye Israel.

Da lo'onataxanaxac so nta'a Yotán

³² Qaq co'ollaq mashe ivi' soua dos vi'iye da lo'onataxanaxac so Pecaj, som llalec so Remalías, maye nta'a ye Israel, nache so Yotán, som llalec so Uzías, ỹacoolec da lo'onataxanaxac da ilo'ogue ye Judá.

³³ Qaq somaye mashe ivi' soua veinticinco vi'iye da nachaalataxac, co'ollaq ỹacoolec da lo'onataxanaxac huaña ye Jerusalén, qaq ivi' dieciséis vi'iye da lo'onataxanaxac. Qaq aso late'e le'enaxat Jerusá, maye llale so Sadoc.

³⁴ Qaq so Yotán, ỹo'ot co'ollaxa nam ỹataqta ỹaỹamaxareeta Ñim Nataxala', qaq nache 'eeta'am so Uzías, maye lta'a somaye,

³⁵ qataq somaye ỹo'ot co'ollaxa so ñegueuo lta'araic aso atamnaxaqui maye lalamaqte Ñim Nataxala'. Qalaxaye saishet co'ollaxa da nlaxaañi so qaỹoqotcheguema atamnaqa'pi, maye som nhuo' le'ecpi tasheguema naxa da ỹo'ot aso lachetaqtaxanaqtepi, qataq da ỹavigaxat so lchenaxanaxat.

³⁶ Qaq nam laỹepi na'aqtaguecpi so Yotán, qataq 'enauac nam ỹo'otpi, nache nanettalec aso nere maye huetalec da na'aqtaguec so nta'alpi ye Judá.

³⁷ Qaq nache huetoiguilo se'esoua na'axa'te da Ñim Nataxala' ỹamaq so Resín, maye nta'a ye Siria, qataq so Pecaj som llalec so Remalías, da dataỹa'aguet naqa'en ye Judá.

³⁸ Qaq co'ollaq ileu so Yotán, nache qailareñi, huaqta'ai' qanqa'en so hua'au nta'alpi, huaña so huaqta'a't nỹecpi maye lalamaxat so David som chegoxoguet somaye. Qaq da lo'onataxanaxac somaye, nache talec so llalec Ajaz.