1 Timoteo 3 - La'aqtaqa Ñim Lo'onatac 'Enauacna 2013

Na lataxala'pi na 'amqaanataxanaxaicpi

¹ Ỹataqta 'eesa da huo'otaq huo'o ca nshetaique da lataxala' na 'amqaanataxanaxaicpi, qalaq ỹataqta ỹaỹamaqchiguiñi, 'onaxaic yem tategueua'a no'onataxanaxac.

² Qalaxaye ca lataxala' na 'amqaanataxanaxaicpi saishet da huo'otaq sa ỹaỹamaxañi da na'aqtaguec. Nachaqrata da 'oonole naqa'en aca lhua, qataq ỹataqta ilotegue da llecỹaxac, daỹaanataxan, huo'o naq 'enec qanqa'en. Qataq ỹataqta ỹaỹaten da ilo'oguet ca lỹa. Qataq ỹaỹaten da dapaxaguenataxan.

³ Qataq saishet da taxaic, qataq saishet da sa ncherapec qataq saishet da nmitta'a da cotaxac. Nachaqrata da iuen da soxoraic qataq saishet da sa lhuanguit qataq saishet da quetaigui da latenataxanaxac da nmitta'a ana anom.

⁴ Qataq ỹaỹaten da ilo'ogue da lma'ỹaxac, qataq ỹapaxaguenec da lco'oxoc da ỹalaq qataq ntela'a ca lỹa.

⁵ Cha'aye da huo'otaq sa ỹaỹaten da ilo'ogue da lma'ỹaxac, qaq ¿hua'ago' ca 'eetec da ỹaỹaten da ilo'ogue na ỹa'amaqteetac Ñim Lo'onatac 'Enauacna?

⁶ Ca nataxala' saishet da huo'otaq cheta'ague da da'amqaanataxan, cha'aye saiuena'a da huo'otaq taigui da na'amqaanaxac, nache ishet da que'emaxam qome, nache ishet da 'eeta'am da nhuaxanaguec co'olloxocheye so pa'aguenataxanaxaic.

⁷ Nataqa'en iuen da no'on da na'aqtaguec da chegaqaigui nam saishet da 'amqaanataxanaxaicpi, yaqto' saishet da ivireguet cam ỹo'ot da lcoxo da ỹauaachigui namayepi, qataq yaqto' saishet da ilamaqa'aguet ca lqoinaxanaxac so pa'aguenataxanaxaic.

Da 'eetec da lataxac na ltauapi ca lataxala' na ỹa'amaqteetac So Jesús

⁸ Nache 'eetec nataqa'en na ltauapi ca nataxala' iuen da no'on da na'aqtaguec, qataq huesota da lataxac qataq saishet da taxaic. Qataq saishet da quetaigui da latenataxanaxac da nmitta'a ana anom.

⁹ Nataqa'en iuen da ỹataqta ỹa'amaqten dam 'eesa lataxac dam qarpi'iỹaxac, qataq da ntoonaxac ỹataqta ỹaỹamaqchiguiñi.

¹⁰ Qataq iuen da hua'auñi da qaỹe'eguen. Qaq da ime da qaica ca sa ỹaỹamaxañi na'aqtaguec, nache ishet da ltaua qanqa'en ca lataxala' na ỹa'amaqteetac So Jesús.

¹¹ Aca 'alo nataqa'en iuen da no'on da na'aqtaguec, qataq saishet da na'aqtaqa lo'o'. Nachaqrata da sa daỹactac, qataq da huo'o ca camachaqca, nache qaipi'iỹa'a.

¹² Ca ltaua ca lataxala' na ỹa'amaqten So Jesús iuen da 'oonole aca lhua naqa'en, qataq ỹaỹaten da ilo'ogue caua llalqa qataq da lmayaxac.

¹³ Cha'aye ca ltaua ca nataxala' da 'onaxaic da lo'onataxanaxac, nache camaye ivitta'a da huo'o da llo'oxoyec, qataq huo'o naq 'enec qanqa'en qataq lpe'et na 'amqaanataxanaxaicpi maye quetague' So Cristo Jesús.

Dam saqcha'a lataxac da qara'amqaanataxanaxac

¹⁴ Huo'o da iyaxa da saqaỹaloq da 'am ñauane'. Qalaxaye ñaqaiyeta 'am samaxa ana'ana ỹere,

¹⁵ yaqto' da aỹem lcopa'aguet, qalaxaye mashe lhuotta da 'auaỹaten ca lataxac ca 'oonolec nam llalaqpi Ñim Lo'onatac 'Enauacna, maye nachena nam ỹa'amaqten Ñim Lo'onatac 'Enauacna maye ỹataqta nca'altauec. Namayepi nachena na nlletañi qataq npaxattalec da 'eesa lataxac.

¹⁶ Qaq saishet da qaiqoleguet de'era 'eesa lataxac da qara'amqaanataxanaxac, cha'aye ỹataqta lta'araic da naigui llo'oxoyec: So Cristo nachaxan co'ollaxa, qalaxaye ỹacona da lataxac ca yo'oqchigui shiỹaxaua; qaq So Saqcha'a Na'añaxac ỹa'axat da saqca ca lasouaxashet Somaye, qaq ỹauaachigui Somaye 'enauac na chegaqasheguem lamaxashecpi Ñim Lo'onatac 'Enauacna. Qataq qaỹa'axatem 'enauac na ỹotta'a't shiỹaxauapi, qaq na shiỹaxauapi maye huetalec ana 'alhua ỹa'amaqten Somaye. Ime, qaq qaỹaueegue da piguem, nache Ñim Lo'onatac 'Enauacna ỹataqta nlaxatchigui da 'enec Somaye.