1 Samuel 29 - La'aqtaqa Ñim Lo'onatac 'Enauacna 2013

So filisteopi ñi'iỹa'aguet so David

¹ Qaq so filisteopi laỹona't co'ollaxa 'enauac so nalleppi huaña ye Afec, qaq so Israel le'ecpi qalaq lanataqa' co'ollaxa ye saqaỹapeque ye huaña na npaxaatasheguem 'etaxat ye Jezrel.

² Nache so lataxala'pi so filisteopi naxa da inoxonec, nache ỹottecache so nnaictega't nalleppi, huo'o so ivi' cien, qataq huo'o so mil, qaq so David qataq so nalleppi nache nnaictague' so Aquis da ca'attaueego' naxa somayepi.

³ Nache so lataxala'pi so filisteopi inato' so Aquis, 'eeta': Qaq ne'ena hebreopi ¿Negue't ca ỹo'ottac da ỹalectauopi? Nache so Aquis, 'enapeco': Ne'ena, nachena na David, maye ltaua caillaye so Saúl, som nta'a ye Israel. Qalaxaye namaye mashe napacalec so 'oonolec vi'i da aỹem do'onataxaatacot, qaq chegoqta'a so na'a'q co'ollaq aỹem no'ot, da qaica ca ỹasouaxat, choche ivitta'a nagui.

⁴ Qalaxaye so lataxala'pi so filisteopi dalemataỹa so Aquis nache 'enapega, 'eeta': 'avi'eguelaxata qome namaye cam 'aỹa'anem 'alhua, qaq saishet da 'aua'aqta'a da qomi' ca'ateguelo, cha'aye saiuena'a da huo'otaq seloquiaq nache ishet da qomi' dataỹa'agueta, nache ishet da qaltaq nmanaqchet ñi Saúl da irotaua'a ca lqaicpi na qanalleppi.

⁵ ¿Peta'a saisheto' da nachena na David na qaỹasottapeguelec caillaye, qataq qaỹo'onaxaatalec, qoỹeeta': «So Saúl ỹalaua't so mil ỹalleppi, qaq so David ỹalaua't so diez mil?»

⁶ Nache so Aquis iỹaxano' so David, nache 'enapega, 'eeta': ¡Hua'aqchigui ñaqa'en da ỹa'aqtac Ñim Nataxala', da aỹem saỹaten da 'am ỹataqta no'on da 'arataxac! Qaq aỹem ỹataqta ñeqopita da 'arataxac co'ollaq huaña yem nanataqa'pi, qaq qaica ca 'arasouaxashet chegoqta'a so na'a'q co'ollaq aỹem qono'ot da aỹem 'auo'onataxanot. Qalaxaye na lataxala'pi na filisteopi saishet da 'am ỹaỹamaxaren,

⁷ qaq ỹoqo'oye no'on da 'auachetec qome da 'arlagaxayec da 'avi'eguelaxa ca 'arma', da yaqto' saishet da 'aunogoqchet namayepi.

⁸ Nache so David, 'enapeco': ¿Negue'to' co'ollaxa cam so'ot? ¿Negue't cam 'auauaachigui ñe'enaxac, chegoqta'a so na'a'q co'ollaq 'am so'onataxanot nache ivitta'a nagui, da aỹem sa 'auashenem da selogui' na 'ampa'aguenaxauapi?

⁹ Nache so Aquis 'enapeco': Aỹem saỹateeta da 'am soxoraic, qoneta'am ca lamaxashec Ñim Lo'onatac 'Enauacna. Qalaxaye na lataxala'pi na filisteopi saỹaỹamaxaren da qomi' 'auca'ateguelo da ñeqo'onaxa ca alaataxac.

¹⁰ Ỹoqo'oye 'ano'ottasheguem qonte' nte'etom, nache 'am qataq na 'analleppi qavi'iguelaqai qome.

¹¹ Qaq ỹoqo'oye so nte'etom so lỹa na'a'q, nache so David qataq so nalleppi no'ottasheguem, nache ỹe'eguelaxa ye na'alhua so filisteopi, qaq so filisteopi qalaq jec da taỹa ye Jezrel.