1 Samuel 27 - La'aqtaqa Ñim Lo'onatac 'Enauacna 2013

So David hueta'a ye na'alhua so filisteopi

¹ Qaq so David deuennataxaataco', nache, 'eeta': «Yo'oqta da huo'o ca huaña ne'enaua na'axa'te, da so Saúl aỹem ỹalauat. Qaq ỹoqo'oye nagui no'on da ñeqo'ona da sonaña ye lma' ye filisteopi, yaqto' so Saúl aỹem ỹaxaañi qome da aỹem nmittaique ne'ena na'alhua na Israel le'ecpi, nache aỹem she'emaqtac qome.»

² Huaña nache so David nqo'ona co'ollaxa so Aquis, som llalec so Maoc, maye nta'a ye Gat da yaqto' do'onataxanot somaye, qaq so seiscientos nalleppi maye nnaictague' nache ca'ategue somaye.

³ Qaq 'era da 'eetec da so David qataq so nalleppi, nache naña co'ollaxa ye Gat, maye ilotague' so Aquis, qaq ñi 'oonolec somayepi nache nnaictague' so llalaqpi. Qaq so David nache nnaictagueto soua dos lhua't: Aso Ajinoán maye lma' ye Jezrel qataq aso Abigaíl aso lhua co'ollaxa ye Nabal maye lma' ye Carmel.

⁴ Qaq so Saúl co'ollaq la'axaỹaxac da so David naneltaxana ye Gat, nache ỹaxaañi da icaatac.

⁵ Nache so David 'enapego' so Aquis, 'eeta': Aỹem 'anqouaguec qome 'am nta'a, da 'auauo'o ca aỹem 'aỹa'analec na nma'piolec maye lauoreua nam huaqta'a't nỹecpi maye 'aralamaxat, cha'aye choche aỹem 'aramaxashec, qaq saỹaỹamaxañi da nache sootaigui ne'ena huaqta'a't nỹecpi maye hueta'a da 'aramaxasoxonaxac da 'am nta'a.

⁶ Qaq nacheso se'eso na'a'q da so nta'a Aquis ỹanem so David da naigui ye huaqta'a't nỹecpi ye Siclag. Qaq ỹoqo'oye nache ivitta'a nagui da yemaye nache lalamaxat na llalaqpi so Judá.

⁷ Nache so David ivi' so 'oonolec vi'i qataq soua cuatro ca'agoxoiqa da netalec so na'alhua so filisteopi.

⁸ Nache somaye lỹatac naxa so nalleppi da taỹa da iloquiaxan so Gesur le'ecpi, gezriitapi qataq so amaleciitapi, maye salcoshe'ego' da netalec se'eso 'alhua, maye chegoqchiguiña yem pa'aỹa'ague da la'añaxa nache ivitta'a ye Egipto.

⁹ Qaq so David naxa da iloquiaxan so netaña se'eso 'alhua, nache qaica ca nca'altauec naqa'en so ỹalleppi qataq so 'alpi. Qataq ỹaconeua'a aso qaguetapi, huacapi, 'ashenapi, qataq aso cameellopi, qataq so logoxot somayepi. Ime naxa nache ỹe'eguelaxa ye netaña so Aquis.

¹⁰ Nache so Aquis inattac naxa somaye, 'eeta': «¿Chaq hua'ague ca qoueta'ague so na'a'q da 'anhuottac na shiỹaxauapi?» Nache so David 'enapec naxa: «Qomye 'era pa'aỹa'ague da la'añaxa ye Judá, qataq da pa'aỹa'ague da la'añaxa ye Yeramel, qataq da pa'aỹa'ague da la'añaxa ye na'alhua ye queniitapi.»

¹¹ Qaq so David qaica naxa ca no'onaxatañi da nca'altauec naqa'en som ỹalleppi, qataq 'alpi, cha'aye ivittaique da taỹa ye Gad nache ỹa'axat nam ỹo'ottacpi somaye. Qaq 'era da 'eeta'ac naxa soua na'axa'te maye huaiguilo da netaña ye na'alhua so filisteopi.

¹² Qaq so Aquis, pe'etega co'ollaxa so David, cha'aye 'eetaco' naxa: «Na Israel le'ecpi ỹataqta nquiỹa nagui ñi David, souaxat na ỹo'ottacpi ñimaye, qaq ỹoqo'oye nache 'eetai' qome da aỹem do'onataxaatacot.»