1 Samuel 11 - La'aqtaqa Ñim Lo'onatac 'Enauacna 2013

So Saúl loxonec so amoniitapi

¹ Qaq so Najás maye lataxala' so amoniitapi, somaye nqo'ona ye Jabés maye huaigui ye Galaad, nache ỹaqataxanai' so nalleppi da huotaique da iloquiaxan so lma' se'eso huaqta'a't nỹecpi. Qalaxaye som lma' ye Jabés 'enapego' somaye, 'eeta': 'Onaxaictaxa da qomi' 'anaỹamaxateto, nache 'am ñañanqot qome.

² Nache so Najás maye Amón le'ec 'enapeco': Ishet da qami' ñaỹamaxateto, qalaxaye da qanashiñiita da ñi 'oonolec da qoñiita, ñeqat añi la'aite aloiguishe, yaqto' so'otec da ỹataqta qaỹe'eetac qome na Israel le'ecpi.

³ Nache som nqueroxonecpi maye lma' ye Jabés, 'enapeco': «Ña qomi' 'anema caua siete na'axa'te da yaqto' sauoqo'o ca qaramaxashecpi da samaxasaxa 'enauac na lma'pi na Israel le'ecpi, qaq da huo'otaq qaica ca anac da qomi' itaua'n, nache 'am ñañanqot qome.»

⁴ Nache so namaxashecpi ivira'a co'ollaxa ye Gabaa, yem netaña so Saúl, nache da'aqtaxanem so shiỹaxauapi de'era na'axaỹaxac. Nache 'enauac somayepi ỹataqta nỹeetagui.

⁵ Qaq huaqchigui da so Saúl mashe nvireuo co'ollaxa chegaqauga so no'onaxa, no'ottalec so lauegaxanaxala' huacapi, nache denataxaataco', 'eeta': «¿Negue't cam huaigui na shiỹaxauapi? ¿Ta'ainco' ye nỹeetagui?» Nache qaỹa'aqtaxaatapeguem somaye da na'axaỹaxac maye ndoi' so shiỹaxauapi maye chegaqa'a ye Jabés.

⁶ Qaq co'ollaq choche hua'axaỹa de'era na'aqtaxanaxac so Saúl, nache so Saqcha'a La'añaxac Ñim Lo'onatac 'Enauacna ỹataqta ỹa'añaqchet somaye, nache so Saúl ỹataqta dalemata.

⁷ Nache ỹaconeua'alo soua dos lauegaxanaxala'ate huaca, nache ipelcapiguilo, nache ỹauo'o so lamaxashecpi da yaqto' ỹamaxa 'enauac nam nañapi lma'pi so Israel le'ecpi so laỹelolqa soomaye. Nache da huo'o na ivita se'eso namaxashecpi, nache 'eeta': «'Era qome da qoỹeetec nataqa'en caua lauegaxanaxala'ate huaca cam saishet da datalec qataq quegue ñi Saúl qataq ñi Samuel.» Nache ỹataqta huo'o da lta'araic lcolanaxa so shiỹaxauapi, nache 'eco' da 'oonolec shiỹaxaua so ỹalleppi da dataleguete soomaye.

⁸ Nache so Saúl co'ollaq naloqten so nalleppi huaña ye Bezec, nache ivi' trescientos mil so alleppi Israel le'ecpi, qataq treinta mil so alleppi Judá le'ecpi.

⁹ Ime, nache 'enapego' som namaxashecpi maye chegaqa'a ye Jabés yem huaigui ye Galaad, 'eeta': «Qoñiỹapega cam shiỹaxauapi maye lma' ye Jabés da qonte' na'a'q laiñi, nache ñeca'alaxataxauec.» Nache som namaxashecpi ỹe'eguelaq, nache da'aqtaxanem de'era som lma' ye Jabés, nache somayepi co'ollaxa ỹataqta machiguiñi.

¹⁰ Nache somayepi 'enapega co'ollaxa so Najás, 'eeta': Qonte', qaq 'am ñañanqot qome, da yaqto' maiche qomi' 'oiqueeta'ape.

¹¹ Qaq so lỹa na'a'q, nache so Saúl nlagaxaañi naqa'en so nalleppi, tres naqa'en soua lpa'axaco. Qaq co'ollaq ña qaỹata'aguet so na'a'q, nache somayepi ique'elaxatta da inoxoneua'a so lanataqa' so npa'agueetague'pi da iloqauiaxan, nache ỹataqta nmatchiguiñi da ỹalauat som amoniitapi, choche ivitta'a so na'a'q laiñi. Qaq som lca'alaxaicpi somayepi ỹataqta nlagaxattac, nache ỹataqta qaica da huo'oi caua dos da nnaictega't.

¹² Qaq co'ollaq ime de'era, nache huo'o som shiỹaxauapi da 'eetega so Samuel, 'eeta': «¿Chaq hueta'ague cam shiỹaxauapi maye sa ỹaỹamaxaren da qarta'a ñi Saúl? Ñaq qomi' 'aỹa'anema que'eca shiỹaxauapi, yaqto' salauataq.»

¹³ Qalaxaye so Saúl detaxaỹapegueuo', 'eeta': «Ne'ena na'a'q qaica qome ca ileu, cha'aye Ñim Nataxala' mashe nca'alaxatec na Israel le'ecpi.»

¹⁴ Nache so Samuel 'enapego' 'enauac somayepi, 'eeta': Ñeqo'onaxa qome ye Gilgal, da yaqto' huaña yemaye nache sanaxam da lo'onataxanaxac da qarta'a da Saúl.

¹⁵ Qaq ỹoqo'oye 'enauac se'eso shiỹaxauapi da taỹa ye Gilgal, qaq huaña yemaye, nache ỹauaachigui qanqa'en Ñim Nataxala' da qoỹanagui da nta'a so Saúl. Ime, nache qoỹanot Ñim Nataxala' aso nachetaqtaxanaqte qanhuaachigui. Nache so Saúl qataq 'enauac so Israel le'ecpi ỹataqta qalota da ntonaxac.