1 Reyes 6 - La'aqtaqa Ñim Lo'onatac 'Enauacna 2013

So Salomón no'oxoosheguem aso atamnaxaqui

¹ Qaq mashe ivi' co'ollaxa soua cuatrocientos ochenta vi'iye da so Israel le'ecpi ca'ai ye Egipto, nache so Salomón damaxasoxoolec co'ollaxa da qano'oxoosheguem aso atamnaxaqui maye lalamaqte Ñim Nataxala', co'ollaq mashe ivi' soua cuatro vi'iye da so ilotague' ye Israel, huetoigui so ca'agoxoic le'enaxat da Ziv, maye ca'atalec so la'auaxanec ca'agoxoic se'eso vi'i.

² Qaq asa'aso atamnaxaqui maye no'oxoosheguem so nta'a Salomón da yaqto' lalamaqte Ñim Nataxala', ivi' veintisiete metros ye lalogaxa, qataq nueve metros ye lcateueegue, qataq trece y medio metros ye lshequitcheguema.

³ Qaq so nanataxaqui nỹec maye dataỹaueegue asa'aso atamnaxaqui, ivi' nueve metros ye lalogaxa, qaq nache 'eeta'am ye lcategue aso atamnaxaqui, qataq cuatro metros y medio ye lcateueegue so dataỹaueegue asomaye.

⁴ Qaq so Salomón nataqa'en damaxasoxoolec da qaỹo'ot so nalloxoquipi asa'aso atamnaxaqui, nache npa'aỹauec naqa'en so lpaqtaxat lcatpi.

⁵ Nataqa'en nauaxaỹaxaasheguem so nanataxaquipi na'atteua'a naqa'en na laỹe so lpaqtaxat maye coleesop aso atamnaxaqui. Qataq som nanataqa' maye saqaishetapec, qataq ỹo'ot nataqa'en som nanataxaquipi maye naua'alo naua laỹel qataq coleesop aso atamnaxaqui.

⁶ Nache so pa'aỹañi nanataxaqui, ivi' dos metros veinticinco centímetros ye lcateueegue. Qaq so pa'aỹangui na laiñi so nỹec, ivi' dos metros setenta centímetros. Qaq so ỹoqta pa'atcheguem nỹec, ivi' tres metros quince centímetros, cha'aye so pa'aỹa'ague aso atamnaxaqui, nquiga't qanqa'en ye lalogaxa, yaqto' saishet da ivirauga so l-llecnaxanaxatpi aso atamnaxaqui.

⁷ Qaq co'ollaq qano'oxoosheguem aso atamnaxaqui, nache qaỹo'onataxana so coma' maye mashe nchiiguishec, ỹoqo'oye co'ollaq qano'oxootapiguisheguem asomaye, nache saishet da qaỹa'aqtega da l-lamaxa aca ntoqnaxanaqtepi, nchegaxanaqtepi, huo'otaq na laỹepi no'ogoxonaxatpi lcat.

⁸ Qaq so ñegueuo se'eso pa'aỹañi so nỹec, pa'aỹa'ague da aloiguishec aso atamnaxaqui. Qaq da qotasheguema so laiñiguishec, qataq so pa'atcheguem se'eso nỹec, qalaq huo'o so ñiguisheguem maye coleetasheguem.

⁹ Nache so Salomón co'ollaq ime da no'oxoosheguem aso atamnaxaqui, nache na pa'auo asomaye lapaxaua'a da llo'oxoraxat naqa'en na nchiiguishec 'epaq cedro.

¹⁰ Qataq ỹo'ot nataqa'en so qapalauo nỹecpi maye coleesop aso atamnaxaqui, qaq ye lalogaxa ye lshequitcheguemec somayepi, ivi' dos metros veinticinco centímetros. Qataq ỹo'ot so nchiiguishecpi 'epaqpi cedro da l-llecnaxat naqa'en, qataq nache qota'aguet naqa'en so lpaqtaxanaxat aso atamnaxaqui.

¹¹ Ime, nache Ñim Nataxala' 'enapega so Salomón, 'eeta':

¹² «Qaq cha'aye 'auo'ottac ana'ana atamnaxaqui, nache aỹem, 'am shenapega nagui, qom ỹataqta qoqueteguelo naua iqataxaco, qataq naua llapaxayiñi lataxaco, qataq da ỹataqta 'auo'ot 'enauac na ỹamaxasoxonaxacpi, nache sepacchigui qome som ỹa'aqtac maye sanem co'ollaxa so 'arta'a David, co'ollaq 'am setaqtega.

¹³ Qaq Aỹem, nache salectaigui qome na Israel le'ecpi, qataq saishet da salat ne'ena nhuo' le'ecpi Israel le'ecpi maye ỹalamaxatpi.»

¹⁴ Nache so Salomón, co'ollaq imat da no'oxoosheguem aso atamnaxaqui,

¹⁵ nache 'enauaque naua laỹel na pa'auo aso atamnaxaqui, lapaxauo so nchiiguishec 'epaq cedro, chegoqchiguiña naqa'en so pa'aguiñi nache ivittasheguema so l-llecnaxanaxatpi asomaye. Qaq so napiaqa', qalaq lapaxalec so nchiiguishec 'epaq pino.

¹⁶ Qataq so ỹataqta pa'auo aso atamnaxaqui, nataqa'en ỹo'ot so nanataqa' maye sa qaishetapec, maye ivi' ye nueve metros, nache nataqa'en lapaxauo so nchiiguishec 'epaq cedro, chegoqchiguiña naqa'en so pa'aguiñi nache ivittasheguema so pa'asheguem.

¹⁷ Qaq so ndaqa' maye dataỹaueegue aso atamnaxaqui som dataỹauga so nanataqa' maye sa qaishetapec, ivi' dieciocho metros ye lcateueegue.

¹⁸ Qaq nache 'enauac so pa'auo aso atamnaxaqui, qalapaxauo so 'epaq cedro maye hualec qanqa'en aso ne'enaqta qo'oipaq lauoxo, qataq aso qo'oipaq ala. Nache saishet da yo'oxoua'a qanqa'en na coma', cha'aye nda'a't na cedro na qalapaxauo.

¹⁹ Qaq so Salomón ỹataqta ỹaỹamaxatchiguiñi so nanataqa' maye sa qaishetapec, pa'aỹauo naqa'en da yaqto' qoỹanaña aso arca maye laỹe' soua nanettaleguete da naỹamaxataxac Ñim Nataxala'.

²⁰ Qaq se'eso nanataqa' maye sa qaishetapec maye pa'aỹauo, ye lcateueegue ivi' ye nueve metros, qataq nueve metros ye lalogaxa, qataq nueve metros ye lshequitcheguema. Nache 'enauac so pa'auo somaye qampa'axanasheguem da qalapaxalec so oro. Qataq nataqa'en ỹo'ot aso nca'atoxonaxalate ỹauota'a so 'epaq cedro, nache mpa'axanauec da lapaxalec so oro.

²¹ Qataq 'enauac so pa'auo aso atamnaxaqui, qataq so nanataqa' maye sa qaishetapec lapaxaua'a so oro, qataq ỹauec so npaqtac oro da yaqto' mpaxateua'a so nanataqa' maye saqaishetapec.

²² Qataq 'enauac so pa'auo aso atamnaxaqui, lapaxaua'a so oro, qataq aso nca'atoxonaxalate maye netaña so saqaỹapeque so nanataqa' maye saqaishetapec.

²³ Nataqa'en ỹo'o't soua dos ne'enaqtaqa shiỹaxau' maye huo'oi naua laua't, chegaqaigui na qo'oipaq olivo, nache ỹaaraña so nanataqa' maye saqaishetapec. Qaq ye lshequitcheguema ñi 'oonolec somaye, ivi' ye cuatro metros y medio.

²⁴ Nache añi 'oonole naua laua't soomaye, ivi' dos metros veinticinco centímetros ye lalogaxa. Qaq ye lshecta'ache da na'ara't soua lsheeneqa soua laua't, nache cuatro metros y medio.

²⁵ Qaq se'esoua dos ne'enaqtaqa shiỹaxau' maye huo'oi soua laua't, nache 'eeta'a't ye lalogaxa da ivi' ye cuatro metros y medio, qataq 'eeta'a't da lataxa'c.

²⁶ Qaq ye lshequitcheguema ñi 'oonolec soomaye, cuatro metros y medio.

²⁷ Qaq so Salomón nache ỹaaraña ye laiñi so nanataqa' maye saqaishetapec se'esoua shiỹaxau', nache aso laua so 'oonolec ivira'aguet na laỹe so pa'auo aso atamnaxaqui, qaq aso laua so lỹa nache ivira'aguet na lỹa laỹe asomaye, qaq soua lỹa't laua't soomaye qalaq ivira'a't, da tachiguiña na laiñi so nanataqa' maye saqaishetapec.

²⁸ Ime, nache so Salomón npa'aỹauec naqa'en so oro da lapaxaua'alo se'esoua dos ne'enaqtaqa shiỹaxau' maye huo'oi naua laua't,

²⁹ qaq nache 'enauac na pa'auo qataq na pa'auec asa'aso atamnaxaqui da qaỹo'ot so llo'oxoraxat ne'enaqtacpi shiỹaxauapi maye huo'oi naua laua't, qataq aso ne'enaqta chaicpi, qataq aso qo'oipaq lauoxopi.

³⁰ Nataqa'en so napiaqa' ye pa'auo qataq so pa'auec aso atamnaxaqui, qampa'axanasheguem da qalapaxalec so oro.

³¹ Qataq ỹo'o't soua laso'omi so ñegueuo so nanataqa' maye sa qaishetapec, chegaqaigui na qo'oipaq olivo, qaq so hua'axagui na pa'asheguem soomaye qataq soua lauoqtel, qalaq cinco qanqa'en naua laỹel.

³² Nache 'enauaque se'esoua dos laso'omi chegaqaigui na qo'oipaq olivo, qataq qoỹereleguete soua ne'enaqtaqa shiỹaxau' maye huo'oi naua laua't, qataq aso ne'enaqta chaicpi, qataq aso qo'oipaq lauoxopi.

³³ Qaq nache 'eetec nataqa'en so ñegueuo aso atamnaxaqui, da ỹo'o't soua lauoqtel na nchiiguishec 'epaq olivo maye cuatro naua laỹel.

³⁴ Qaq se'esoua dos laso'omi chegaqaigui so nchiiguishec 'epaq pino, qataq connapigui'salo soua lapoqo'ote soomaye.

³⁵ Qataq hualeguete naqa'en soua ne'enaqtaqa shiỹaxau' maye huo'oi naua laua't, qataq aso ne'enaqta chaicpi, qataq aso qo'oipaq lauoxopi, ime nache mpa'axanauec da lapaxaua'a se'eso ne'enaqtacpi so sanquesaxan oro.

³⁶ Qataq no'oxoosheguem so lapoxot so pa'aỹauo nqasoxoc aso atamnaxaqui, tres naqa'en da no'oxoosheguem so nchiiguishecpi coma'pi, qataq mpa'aỹasheguem naqa'en da qalapaxalec somaye so nchiiguishec 'epaq cedro.

³⁷ Qaq co'ollaq qalapaxañi so lo'oxonaxala' aso atamnaxaqui maye lalamaqte Ñim Nataxala', nache huetoigui so ca'agoxoic Ziv soua cuatro vi'iye da nta'a so Salomón,

³⁸ Qaq co'ollaq mashe ivi' once vi'iye da nta'a so Salomón, nache ime 'enauac som iuen da qalapaqtañi lataxac asa'aso atamnaxaqui, huetoigui so ca'agoxoic Bul som ca'agoxoic ocho se'eso vi'i, qaq ivi' soua siete vi'iye da so Salomón ỹo'ottac asa'aso atamnaxaqui nache ime.