1 Reyes 19 - La'aqtaqa Ñim Lo'onatac 'Enauacna 2013

So Elías datauec taỹa ye Horeb

¹ Nache so Ajab da'aqtaxanem aso Jezabel 'enauac nam ỹo'otpi co'ollaxa so Elías, qataq da 'eetec co'ollaq icheguec so lqaicpi so la'aqtaxanaxanecpi so Baal.

² Nache aso Jezabel ỹamaq so lamaxashec da 'enapega so Elías, 'eeta': «Na atamnaxala'pi ỹataqta aỹem sa ỹala'ac da ỹauo'o ca ñeuaxanaguec qonte', qom ñaq 'eeta'am nagui da saishet da 'am se'enaqteeteguet da qonetec ñi 'oonolec som 'aualauatpi na'aqtaxanaxanecpi.»

³ Qaq so Elías co'ollaq ỹaỹaten de'era, nache ỹataqta ñi'i, nache datauec taỹa ye Berseba maye huaigui ye 'alhua Judá, qaq huaña yemaye nache icotanaña so lamaxashec.

⁴ Qaq ime, nache tauga so toolec 'alhua, nache queuoteguelec so 'oonolec na'a'q, huaña nache taỹot so lpaqal asotai' qo'oipaqole le'enaxat retama da nso'ooñi. Nache nhuootapeguela't, qataq nshetaique da nache ileu, nache 'eeta': «¡'Am Nataxala', 'onaxaictaxa da nache tachiguiña de'era, qaq no'on da 'anqat da ñachaalataxac, cha'aye saishet da no'on da ỹataxac da sheeta'ama soua ita'al!»

⁵ Ime, nache nnaañi hueto'ot asotai' qo'oipaqole le'enaxat retama, nache do'ochaañi. Qalaxaye anac so lamaxashec Ñim Nataxala', nache ipoteua'a da nquetoxon, nache 'eeta': «Qoñisheguem, nache 'auque'e.»

⁶ Nache so Elías co'ollaq ỹamatapiguiñi, nache ila'a aso nauole datoxoi huetaleguete soua poqo, qataq aso naquipiaxaqui huetagui so 'etaxat, huetra'ague da na'axaata'ague somaye. Huaña, nache ñisheguem co'ollaxa, nache deque'etac qataq nỹomtac. Ime, nache ỹe'eguelaxañi da do'oche.

⁷ Qalaxaye so lamaxashec Ñim Nataxala', qaltaq ñe'eguelaxa somaye, nache ipoteua'a da nquetoxon, nache 'eeta': «Qoñisheguem, 'auque'e, cha'aye ỹataqta qaỹoqoolec na nqa'aic qom qojec.»

⁸ Nache so Elías ñisheguem, nache deque'etac qataq nỹomtac 'etaxat. Nache se'eso nallec ỹauo'o da la'añaxac somaye, da yaqto' queta se'esoua cuarenta na'axa'te, qataq cuarenta pe', nache ivitta'a ye Horeb, maye nqasoxonaxa Ñim Lo'onatac 'Enauacna.

⁹ Qaq huaña yemaye nache taigui so auac, nache huetaigui se'eso pe. Qalaxaye Ñim Nataxala' 'enapega somaye, 'eeta': «Elías, ¿negue't ca 'auo'ottac da qoueta'a ne'ena?»

¹⁰ Nache somaye 'enapeco': «Qomye ỹataqta lta'araic da ica'alaxanaxac souaxat da qoneta, 'Am Nataxala' maye Qaica ca 'Auqalanapec, souaxat na Israel le'ecpi da ca'ai da 'anaỹamaxataxac, qataq nlaxaañi aso nca'atoxonaxalatepi maye 'aralamaqte, qataq ỹalauat so 'ara'aqtaxanaxanecpi ỹauota'a so ỹeelonec. Qaq nachaỹemta ño'onañi da ñeca'altauec, qalaq aỹem qanmittaique da huotaique da aỹem qaỹalauat nataqa'en.»

¹¹ Nache Ñim Nataxala', 'enapeco': «Ñaq 'ampa'auec, nache aỹem 'auataỹot da qoueta'a ana'ana qasoxonaxa.» Qaq Ñim Nataxala', nache nateuga co'ollaxa yemaye, huaña nache anac so la'at lta'araic, nache depoqogui naqa'en aso qasoxonaxapi, qataq dolagui naqa'en aso coma'pi, qalaxaye Ñim Nataxala' saishet da huetaigui se'eso la'at. Qaq co'ollaq ỹoxogue se'eso la'at, nache huo'o so nacholaxanaxa, qalaxaye Ñim Nataxala' ñaqaiyeta saishet da huetaigui somaye.

¹² Qataq co'ollaq ime so nacholaxanaxa, nache anac so norec, qalaxaye ñaqaiyeta Ñim Nataxala', saishet da huetaigui se'eso norec. Qaq co'ollaq ime so norec, nache huo'o so ño'oxonaxac qapio'oñiic da l-lamaxa.

¹³ Nache so Elías co'ollaq hua'axaỹa somaye, nache nacona'a so lapo' da ỹapogui na lashec, nache pa'auec, nache hua'a so ñegueuo se'eso auac. Nache hua'axaỹa so na'aqtac, 'eeta': Elías, «¿negue't ca 'auo'ottac da qoueta'a ne'ena?»

¹⁴ Nache somaye 'enapeco': «Qomye ỹataqta lta'araic da ica'alaxanaxac souaxat da qoneta, 'Am Nataxala' maye Qaica ca 'Auqalanapec, souaxat na Israel le'ecpi da ca'ai da 'anaỹamaxataxac, qataq nlaxaañi aso nca'atoxonaxalatepi maye 'aralamaqte, qataq ỹalauat so 'ara'aqtaxanaxanecpi, ỹauota'a so ỹeelonec. Qaq nachaỹemta da ño'onañi, qalaq aỹem qanmittaique da huotaique aỹem qaỹalauat nataqa'en.»

¹⁵ Nache Ñim Nataxala' 'enapego' somaye, 'eeta': «'Am, 'avi'eguelaq qome, nache 'avi'eguelaqtegue na nqa'aic maye taỹa'a ye toolec 'alhua maye huaigui ye Damasco. Qaq qom 'avi', nache 'aucorelec na lqaic so Jazael, da yaqto' 'aỹa'anagui da nta'a ye Siria,

¹⁶ qataq so Jehú, som laual so Nimsi, da yaqto' lta'a na Israel le'ecpi, nataqa'en 'aucorelec na lqaic so Eliseo, som llalec so Safat, maye lma' ye Abel Meholá, da yaqto' 'aỹa'anagui da 'aro'onataxanaxac da na'aqtaxanaxanec.

¹⁷ Yaqto' cam ỹet ca lainec so Jazael, nache so Jehú ỹalauat camaye, qaq cam ỹet ca lainec so Jehú, nache so Eliseo ỹalauat qome camaye.

¹⁸ Qalaxaye aỹem, no'onañi ñaqa'en ca siete mil na Israel le'ecpi, maye saishet co'ollaxa da ỹa'aldoto naua l-llecte so Baal, qataq saishet da napigoxoi'.»

Da nỹaxanaguec so Eliseo

¹⁹ Nache so Elías jec, ca'ai yemaye, nache natenalec so Eliseo, som llalec so Safat, maye da'araxaatac. Qaq somaye datataueegue so doce so nauaxaỹaxauapi lauegaxanaxala'pi huaca, qaq somaye nache ca'attaueegue somayepi. Nache so Elías co'ollaq nlectot somaye, nache ỹasaxalec na lallac somaye so lapo'.

²⁰ Huaña, nache so Eliseo ỹaxanec so lauegaxanaxala'pi, nache nqalgoqta da icaalec so Elías, nache 'enapega, 'eeta': Ñaq aỹem 'auasheetem taxa da ñapigoxoi' ca ita'a qataq aca ỹate'e da secoyegue'n, ime, nache 'am seca'ategue. Nache so Elías 'enapeco': 'Aue qojec, qalaxaye 'auennata'a qome da 'am so'otec.

²¹ Nache so Eliseo ỹe'eguelaq, nache ỹaconeua'alo soua dos lauegaxanaxala'ate huaca nache ỹalaua't, qataq so lauegaxanaxaqui 'epaq soomaye, nache dalonaxana da ỹauot so lapat se'esoua huaca, nache iquia'axanec se'eso shiỹaxauapi. Qaq co'ollaq ime, nache icaalec so Elías, nache do'onataxanot somaye.