1 Pedro 5 - La'aqtaqa Ñim Lo'onatac 'Enauacna 2013

Na lataxala'pi na ỹa'amaqten So Jesús

¹ Sauotaique da sami' da iqataxac na lataxala'pi na 'amqaanataxanaxaicpi. Cha'aye aỹem nataqa'en aỹem nataxala' shena'am namayepi qataq sauaachigui da 'eetec da nque'eenaguec So Cristo. Nataqa'en qom ñe'eguelaq So Cristo da ỹachaxan dam qaica ca 'ena'am llo'oxoyec, nache aỹem ñeuanaua'a da llo'oxoyec Somaye. Qaq da iqataxac 'eeta':

² Qanchilỹa'a na shiỹaxauapi maye qami' ipataxagueta Ñim Lo'onatac 'Enauacna da qauloỹeegue, cha'aye namayepi lalamaxat Ñimaye. Qanchilỹa'a namayepi 'eeta'am da ltelaqtaxanaxac ca qagueta lo'o da ntela'a aca ilotague' lalopi. Qaq damaye ỹataqta qanasapacheetelec da qauo'ocheetac, cha'aye nachera da 'eetapeguec Ñim Lo'onatac 'Enauacna qaq saishet da choche qami' qaỹamaqtaleguete. Saishet da qauo'ocheetac damaye da choche qanaquicheeta'a da qanaviqui aca anom, nachaqrata da ỹataqta qanasapacheetelec da qaro'onataxanaxaqui.

³ Saishet da 'eeta'am qanqa'eñi da qami' na'aco'ye nam qami' ipataxagueta Ñim Lo'onatac 'Enauacna da qauloỹeegue; nachaqrato' da qanpogoxoiñiỹapegue' da qami' laloqnaxanaqa'ate namayepi.

⁴ Yaqto' qom ñe'eguelaq So Cristo maye Lataxala' nam ilotague' na 'amqaanataxanaxaicpi, nache qami' qauacoñiiguet ca qaica ca 'ena'am da llo'oxoyec qansheetenaguiiqui maye qaica ca loga't.

Nam na'atta'a't 'amqaanataxanaxaicpi

⁵ Qaq nache 'ena'am nataqa'en qami' nsoxoppi, ỹataqta qaualaqaiguet ca la'aqtac na lataxala'pi na ỹa'amaqten So Jesús. Qataq 'enauac da qoñiita saishet da qana'amaqchiñi, cha'aye ana nere maye huetalec na la'aqtacpi Ñim Lo'onatac 'Enauacna 'eeta': «Ñim Lo'onatac 'Enauacna ỹataqta dataỹa'aguet na na'amqaanaxaicpi, qalaxaye ỹami' ca ntaunaguec nam saishet da na'amaqten.»

⁶ Qaq ỹoqo'oye saishet qome da qana'amaqchiñi, qataq qauacoñiiguet da lamaxasoxonaxac Ñim Lo'onatac 'Enauacna, cha'aye Ñimaye ỹataqta 'añaxaic. Qaq qom ivita ca laloqo', nache Ñimaye qami' ỹo'oteque da qoñiỹa'am na laỹepi shiỹaxauapi maye 'amaqtaqaicpi.

⁷ Qaq ỹoqo'oye 'enauac na qauennacheetapega ỹataqta qaumachiỹo'ot Ñim Lo'onatac 'Enauacna, cha'aye Ñimaye qami' ilotegueto.

⁸ Qataq ỹataqta qanaỹaanaxanaqchiñi, qataq qami' lhuotte' da huo'o ca qaviyeeguet, cha'aye so pa'aguenataxanaxaic, somaye nmittaique ca ishet da ilaxachigui, 'eeta'am ca quiyoc da desoqtac.

⁹ Qanachaachiỹa'aguet da lcanaxanaxac, qataq qauauo'oi ca qarpi'iỹaxaqui Ñim Lo'onatac 'Enauacna qataq saishet da huo'o ca huaña da qauqolectaxañi. Cha'aye mashe qauaỹaañi da 'enauac ana 'alhua da huo'o nam quetague' So Cristo da nataqa'en huo'o da nque'eenaxac 'eeta'am da qoñiita.

¹⁰ Qalaxaye qom ime da qami' cara'ac da huo'o da qanque'eenaxaqui, nache Ñim Lo'onatac 'Enauacna qami' ỹe'eguelaxatalo da qaica camachaqca da qoñiita. Qaq ỹoqo'oye qami' saishet da qaỹa'axañiiuec da qarpi'iỹaxaqui Ñimaye; qaq Ñimaye qami' ỹanema da qara'añaxaqui da yaqto' saishet da qauqalvi qataq qami' ỹo'oteque da nache 'eetai' da huo'o da qarpi'iỹaxaqui. Qataq qantooñita'ac da Ñim Lo'onatac 'Enauacna maiche qomi' lca'agui'she, chegoqchigui naqa'en So Jesucristo da yaqto' ña'araxaua'a da qaica ca 'ena'am llo'oxoyec lo'onataxanaxac.

¹¹ Qaq Ñim Lo'onatac 'Enauacna do'onataxana dam qaica ca 'ena'am la'añaxac maye chochaq tatec. Aja', nache 'eetec.

Da pa'atec nquinaxanaxac

¹² Ñi Silvano maye aỹem itauaatac da ỹiyiñi ana'ana saq aloc ỹere. Ñimaye samata'ac da ỹataqta sa naralaxat da lataxac da quetague' So Cristo, qataq taiguet da qaipi'iỹa'a. Qami' samaxalo ana ỹere da qami' seqatalo qataq ỹataqta 'eesa da 'enauac nam 'onaxaic maye qami' ỹanema Ñim Lo'onatac 'Enauacna ỹachaxan Ñimaye da ỹataqta lta'araic da lauoche da qoñiita. ¡Qaq ỹoqo'oye saishet qome da qauqolliguichi da lsoxoyec Ñim Lo'onatac 'Enauacna!

¹³ Qaq nam quetague' So Cristo maye netaña na nỹecpi na Roma qami' iquiita'ape. Namayepi 'ena'ama qami' da na'attaua'a na lalamaxatpi Ñim Lo'onatac 'Enauacna maye maiche lca'aguishecpi. Nataqa'en qami' ỹamaxalo da lquinaxanaxac ñi Marcos, ñim ỹataqta ỹauotaxat 'eeta'am ca yo'oqchigui ỹalec.

¹⁴ Qaq ñi 'oonolec da qoñiita da nquine' ca lỹa qalaq ỹataqta napigoxoi'. Qaq aỹem seỹaxaatacot Ñim Lo'onatac 'Enauacna da qami' ỹanema ca qarlagaxayiqui qami' maye qami' lalamaqa'ate So Cristo.