1 Juan 1 - La'aqtaqa Ñim Lo'onatac 'Enauacna 2013

So Na'aqtac maye chegaqaigui da nca'alaxa

^1-4 Sauoqo'o ana qorere da qami' samaxasaxalo, da qami' sa'aqtaxanaxama som sauanaqchigui qataq sa'axasoqchigui, som Na'aqtac maye chegaqaigui da nca'alaxa som nale'ena co'ollaxa da huo'o, co'ollaq saxanaxa da ỹo'ot ana 'alhua Ñim Lo'onatac 'Enauacna. So'otaq damaye yaqto' ishet da nalochiguiñi da qantonaxac, qataq da yaqto' nache 'eetai' da qomi' qana'ayeetaua'alo, 'eeta'ama qomi' da qolaqto'ot da ña'araqtaua'a Ñim Lo'onatac 'Enauacna maye Nta'a qataq So Llalec Jesucristo. Se'eso Na'aqtac maye chegaqaigui da nca'alaxa nacheso So Jesucristo, qataq nacheso so ỹan da 'eesa nca'alaxa. Qaq de'era nca'alaxa damaye chochaq tatec. Somaye nache 'eetai' da hueta'aguet Ñim Lo'onatac 'Enauacna maye Lta'a, qalaxaye qomi' naỹalo. Qaq qomi' maye qomi' lapaxaguenataqa sa'axasoqchiguilo naua la'aqtaqa qataq ỹataqta ñeloqta'ai' qataq seviraqa'a da ishet da sepotaxaua'a.

Da lataxac da yaqto' qaivira'a da auochaxaua Ñim Lo'onatac 'Enauacna

⁵ So Jesucristo qomi' ỹapaxagueneque da Ñim Lo'onatac 'Enauacna yo'oqchiguiñi qataq cam hueta'a Ñimaye qalaq qaica ca napalaxa. Qaq 'era dam qara'aqtaxanaxac maye qami' sa'aqtaxanaxama.

⁶ Qaq da shenaqtega da qanauochaxaua Ñim Lo'onatac 'Enauacna, qalaxaye qolaqto'ot da so'otaqtac da qaye'etaxaloxo, nache qomi' choche satenataxanaqtac, shenaqta'am nam tenataxanaxaicpi maye sa ỹalaxaguet Ñimaye.

⁷ Qalaxaye da ñachaataqtaigui na yo'oqchiguiñi, da shenaqta'am Ñim Lo'onatac 'Enauacna maye huetaigui da yo'oqchiguiñi, nache ỹataqta ña'araqta't da qomi' nqaỹañecpi, qaq Ñim Lo'onatac 'Enauacna ỹapalaxa't naua qarasouaxashe'ete, chegoqchiguilo naua ltago'q So Llalec Jesús.

⁸ Qaq da shenaqtega da qaica ca qarasouaxashet, nache qomi' maiche ñatenachetaqtapeguela't, cha'aye saishet da 'eesa dam ñasaxasoxouec.

⁹ Qalaxaye da sa'aqtaxanaxam naua qarasouaxashe'ete Ñim Lo'onatac 'Enauacna, qalaq nataqa'en qolaqto'ot da qarpi'iỹaxac da Ñimaye maye no'on da lataxac, ishet da qomi' ichoxore'n qataq iỹouec 'enauac na sa ỹaỹamaxañisat maye so'otaqtac.

¹⁰ Qataq da shenaqtega da saishet da huo'o ca so'otaq qarasouaxashet, nache qomi' so'otaxac Ñim Lo'onatac 'Enauacna da 'eeta'am ca tenataxanaxaic, qataq saishet da qomi' netaiguilo da la'aqtac maye qomi' ỹanema.