1 Corintios 8 - La'aqtaqa Ñim Lo'onatac 'Enauacna 2013

Ca nallec maye hua'auñi da qoỹanot na qanatameetacotpi maye saq 'en

¹ Qaq nagui qami' sa'axatema da lataxac ca nallec maye hua'auñi da qoỹanot na choche ne'enaqtacpi maye qanatameetacotpi qataq saq 'en. 'Enauac da shenaqta saỹatenaq de'era. Qalaxaye saỹatenaq de'era nauattonaxanaxac da ỹo'ot da napagaqaanaxac qataq da ño'oxonnaxac ca shiỹaxaua. Qalaxaye da nsoxoyec ỹa'añaqchet da qara'amqaanataxanaxac.

² Da huo'o ca ipi'itaxaatega da qalota na ỹaỹaten, camaye ỹoqta 'eesa da qaica ca ỹaỹaten.

³ Qalaxaye Ñim Lo'onatac 'Enauacna, ỹauattoota 'enauac nam ỹauotec Ñimaye.

⁴ Qaq da 'eetec nam nallec maye hua'auñi da qoỹanot na qanatameetacotpi ne'enaqtacpi maye saq 'en, qomi' saỹaanaqta da nam qanatameetacotpi maye saq 'en qaica ca lca'alaxa, cha'aye 'oonolec Ñim Lo'onatac 'Enauacna qaica ca lỹa.

⁵ Qaq na'aictaxa da huo'o na qaỹamata'ac da 'amaqtaqaic na qalota qanatameetacot maye hueto'ot na piguem qataq na huetalec ana 'alhua,

⁶ qalaxaye qomi' saỹaanaq da 'oonolec Ñim Lo'onatac 'Enauacna qataq Qarta'a. Qaq chegoqchigui Ñimaye 'enauac nam huetalecna, qataq qomi' ỹo'o't da qomi' lalamaqa'ate. Qataq 'oonolec So Qarataxala', le'enaxat Jesucristo. Ñim Lo'onatac 'Enauacna ỹachegoxotchigui Somaye 'enauac nam huetalecna, qataq da lqouagaxanaqtaic nachera da huo'omshe qomi' huo'oi nagui.

⁷ Qalaxaye saishet da 'enauac da qaỹaỹateeteguet de'era. Co'ollaq saxanaxa da qaua'amaqchiñi So Cristo, nache da qoñiita huo'o na ỹo'oxoreetac na ne'enaqtacpi maye qanatameetacotpi qataq saq 'en, qaq nagui ñaq 'eetalec da ỹa'amaqteetac namayepi da 'eetega huo'o da lca'alaxa. Qaq ỹoqo'oye da ivita da chec na nallec maye hua'auñi da qoỹanot namayepi, nache da lvilỹaxac ỹataqta ñi'i, nache 'eetega huo'o da lasouaxashet.

⁸ Qalaxaye da qarataxac maye na'attaua'a Ñim Lo'onatac 'Enauacna saishet da no'onaxat huo'otaq na'aqchet cam nallec maye sacheguenaq.

⁹ Qaq qomi' na'aictaxa da qomi' huesochiguiñi da maicheye ca sacheguenaq. Qalaxaye iuen da ñetelaqa'a na qara'amqaanataxanaxauapi maye saxanaxa da da'añi da lpi'iỹaxac.

¹⁰ Cha'aye 'am maye 'auaỹateeta de'era, da huo'otaq 'anso'oñiisop cam huaña da qaỹo'oxoren nam qanatameetacotpi ne'enaqtacpi maye saq 'en da 'auque'e, qaq da huo'otaq 'am ilaua'a ca qarqaỹa maye saxanaxa da da'añi da lpi'iỹaxac, qaq que'eca qarqaỹa nache ỹa'añaxachigui lauel da dequi'iỹapegueua'a que'eca nallec maye qoỹanot nam qanatameetacotpi.

¹¹ Qaq 'am, maye huo'o da 'arauattonaxanaxac, nache 'aqataqchet ca qarqaỹa maye saxanaxa da da'añi da lpi'iỹaxac cam nataqa'en ileualec co'ollaxa So Cristo.

¹² Qaq da nache qoñiitec de'era, nache qauque'emaqchichi da ntoonaxac ca qarqaỹa maye saxanaxa da da'añi da lpi'iỹaxac, qataq nacheso So Cristo qauque'emaqchichi.

¹³ Qaq ỹoqo'oye aỹem saishet da sachec ca nallec da saỹaten da ỹauega ca ỹa'amqaanataxanaxaua maye saxanaxa da da'añi da lpi'iỹaxac da ỹauo'o ca lasouaxashet.