Vötaâ Jâan 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê ndə̂ më wâtə̂ kpôkpô akrə ndə̂ Egilîze kä ndə̂ âmbô mbëtï âtə sə̈ mö Gäyïwûse ndə̂ më nyîndə̂ zə̈ tə̂ lëge nə̈ gbɛ̂.

² Ngâ mê ndə̂ më nyîndə̂ zə̈ tə̂ gbölösə̂nə̈, më nyïndə̂ nə̈ pä arə ndə̂ zə̈ gbɛ̂ e atə̂ tchâtchu nə̈, tə̂kömbo mboabô mö mbô-ê, ânyë tə̂ zə̈ wa batə̂ yingö ndə̂ zə̈ ndə̂ âwâtə̂ tchôtchô nə̈.

³ Më wä la mômô tə̂ su mê tə̂ gbölösə̂nə̈, bëte angâ arə̂mâ lə̂ Krîsiti nə̈, kə̈ tô pö ndə̂ lëge pö ndə̂ âwâ lə̂ zə̈, ndjë la köbosə̂ nə̈ ndə̂ mo sə̂ lə̂ lëge pö.

⁴ Ndə̂ më djê pö ndə̂ abechë ndə̂ mê ndə̂ andjë sə̂ lə̂ lëge pö, mômô ndə̂ më wâ la rə̂ rö adɨ̂ amômô gbɛ̂.

Djîrə̂ kua ndə̂ Gäyïwûse

⁵ Ngâ mê ndə̂ më nyîndə̂ zə̈ tə̂ gbölösə̂nə̈, më djë rə̂ pä mo zä su zə̈ gbɛ̂ ndə̂kə̂ mbo rə̂ la azü ndə̂ Krîsiti, ndjë la azü ndə̂ angâ agö ngbî.

⁶ Andjë tö pö ndə̂ köbo ndə̂ mo nyində̂ azü tchâtchu azü ndə̂ Egilîze ndə̂ ârâ. Më zä da zə̈, amö za könô sə̈ andjê ndə̂kə̂ pa andjë e la wrʉ̂ ndə̂ andjê, lə̂ köbosə̂ nə̈ ndə̂ âdâka tchâtchu Ndjapä.

⁷ Bëte andjë rö lâme tə̂ pö ndə̂ rə̈ Krîsiti, kə̈ yûâbo kû ngâ rə tchânə̂ azü ndə̂ andjë wûn-âbô sə̂ Ndjapä wûn lâme-a.

⁸ Äwäpä azəzə̂ ndə̂ azü ndə̂ Ndjapä, azə̈ mbo rə̂ la azü käko lâme, ânyë azə̈ la andjê gbɛ̂, azə̈ watə̂ a-earə̂ kua ndə̂kə̂ nyisə̂ lëge pö sə̈ azü.

Pö pâ Dïötrêfe la Dëmëtrïyûse

⁹ Më mbö ngâ ndöndö mbëtï kə̈ wân rə̂ sə̈ Egilîze ndə̂ nyê, praâbalë Dïötrêfe ndə̂ tche nyîndə̂ kə̂ watə̂ küma angâ yê, tche nyîâbo ndə̂kə̂ dje mê-a.

¹⁰ Bëte rə̂ kä, âdə mê ânə, kə̂ toadje pö ndə̂ ngbongbo rə ndə̂ tche mbô rə̂ ësûwu, tchetchë ndə̂ tche tô angbongbo pö, la apö yepa la rə̈ azə̂. Âdə̂âbo kütû rə ndə̂ tche mbô rə̂ kä lâme-a. Tche kösə̂ kə̂ kʉ azü ndə̂ Krîsiti ndə̂ andjë sə̂ lakə̂ rôrö, kə̂ kîtə̂ köbo tə̂ angâ yê ndə̂ andjë nyîndə̂ kə̂ kʉ andjê, ndjë tche grô angâ yê nə̈ lâme lə̂ Egilîze.

¹¹ Ngâ mê ndə̂ më nyîndə̂ zə̈ tə̂ gbölösə̂nə̈, amö zabô tchêngbâ ngbongbo rə zâ-ê, praâbalë amö za tchêngbâ tchôtchô rə. Akrə ndə̂ tche mbô tchôtchô rə, dëkë tche də̈ akrə ndə̂ Ndjapä. Akrə ndə̂ tche mbô ngbongbo rə, dëkë tche wûn-âbo sə̂ Ndjapä-a.

¹² Azü gbɛ̂ tö tchôtchô pö ndə̂ Dëmëtrïyûse. Lëge pö la tə̂ yê tö ndjë tchôtchô pö ndə̂ yê. Ârâ ndjë gbɛ̂, ârâ tö ndjë tchôtchô pö ndə̂ yê. Mo wûnsə̂ nə̈ nə̂ pä pö ndə̂ ârâ wätə̂ lëge pö.

Adɨ̂ kə̂ po ndə̂ azü

¹³ Më kä la pö tə̂ gbölösə̂nə̈ ndə̂kə̂ to rə̂ sə̈ mö, praâbalë më nyîâbo ndə̂kə̂ mbo rə̂ lə̂ mbëtï-a.

¹⁴ Mê wun-adje mö lə̂ angâ alö, ânyë azə̈ to pö lə̂ gbâtə̂ azə̂.

¹⁵ Äfü pä mö sə la zɨtɨ su. Arə̂mâ ndə̂ zə̈ bhâtə pô ndə̂ zə̈ nə̂. Amö po ndə̂ angâ ârâ bhâye balë balë gbɛ̂ sə̈ ârâ.