Tîte 3 - Mbëtï Ndjapä: TÄFO MADƗ̈

Kə̂ sə ndə̂ azü ndə̂ Krîsiti

¹ Amö ka tô rə̂ sə̈ azü gbɛ̂ päkëdə̂, äwäpä andjë dje ma azü ndə̂ andjë wâ la kümändëmä, la agbölö azü gö. Äwäpä andjë mbo rə gundə̂sə̂ pö ma agbölö azü nə̈ lâme, kə̂ sə tchêtchêtchê ndə̂kə̂ mbo tchôtchô kua gbɛ̂.

² Âwâbo pä andjë dro ngâ akrə balë-a, äwäpä andjë kpe tə̂kə̂ po lə̂ gbâtə̂ andjê, äwäpä andjë nyisə̂ dâkâ ndə̂ andjê, kə̂ mbo rə tə̂ nyima nə̈ logbɛ̂ tə̂ azü gbɛ̂.

³ Bëte azəzə̂ gbɛ̂, azə̈ wä ndjë alême tə̂ angbɨ̈lə̈, azü ndə̂ andjë kôsə̂ Ndjapä, azü ndə̂ köbo yû tə̂ andjê, azü ndə̂ andjë wâ alême tə̂ angbâa ndə̂ agʉ arə ngbî ngbî gbɛ̂, la arə tchêbêche ndə̂ âtcho tə̂ azü, azü ndə̂ andjë sə̂ lə̂ ngbongbo su lakə̂ mbo gʉ arə ndə̂ angâ andjê, azü kösə̂ azə̂, azə̈ kô ndjë sə̂ angâ azə̂ lə̂ gbâtə̂ azə̂.

⁴ Praâbalë sə̂nə̈ ndə̂ Ndjapä, Earə̂ kə̂ tcha azə̂ nyîsə̂ dâkâ ndə̂ yê, la rə̂ ndə̂ tche nyində̂ azü,

⁵ tche tchâ azə̂ lə̂ kuzü. Tche tchâbo azə̂ bëte adjîrə̂ akua ndə̂ azə̂ la tə̂ azə̂ mbô rə̂-a, praâbalë tche tchä azə̂ bëte tche wün nyonyo azə̂, ndjë la rə̂ ndə̂ Kpɨ̂ki Yingö djûtu azə̂ ânyë azə̈ wâtə̂ atäfo azü, kə̈ zâ täfo kə̂ sə sə̈ azə̂.

⁶ Kpɨ̂ki Yingö nə̈ lâme, Ndjapä mbö rə̂ ânyë tche jrê pâ azə̂ tə̂ gbölösə̂nə̈ lə̂ köbosə̂ Jezü Krîsiti Earə̂ kə̂ tcha azə̂.

⁷ Tche mbö tâ käko ânyë lə̂ köbosə̂ tchôtchô su yê, tche dɨ̂ azə̂ tə̂ adjîrə̂ azü lə̂ la yê, ndə̂kə̂ pa azə̈ watə̂ a-earə̂ kə̂ gbo tchîsûwu ndə̂ logbɛ̂ logbɛ̂, ndə̂ su azə̂ wâ pânə̈ lâme.

⁸ Pö lâme wätə̂ lëge pö. Käko më nyïndə̂ nə̈ pä mo chi pânə̈ djîrə̂, ânyë azü gbɛ̂ ndə̂ andjë zâ su andjê sə̈ Krîsiti, andjë zatə̂ andjê gbɛ̂ ndə̂kə̂ mbo tchôtchô kua. Rə ndə̂ âdâka ânyë kə̈ kʉ̂sə̂ kə̂ za könô sə̈ azü kä lâme.

⁹ Praâbalë amö kpe tə̂kə̂ pu dju arə ndə̂ âwâtə̂ wünwün nə̈, lakə̂ dɨ rə̈ araâta, lakə̂ po, lakə̂ gama pâ apö ndə̂ ndïɛ̈, bëte ngâ rə balë wâbo lə̂ arə lâme-a, kütû awünwün apö kä.

¹⁰ Akrə ndə̂ tche wâ ndə̂kə̂ krʉ tchə̂lə̂ azü lə̂ Egilîze, äwäpä mo gbɨtɨ tü yê sûsunə̈ balë, âdə tche âkä kpa rə̂ tə̂ bïchuû nə̈, mo gro tchë-ê.

¹¹ Mo wûnsə̂ nə̈ nə̂ pä akrə käko lâme, tche tchâ köbo nə̂. Ndə̂ gbô tchë ndə̂po lakə̂ mbo ngbongbo rə lâme, dëkë tche wâ ngbanga lə̂ küma yê la tə̂ yê nə̂.

Adɨ̂ kə̂ zama lakə̂ po ndə̂ azü

¹² Âdə më âwan Ärtëmâse âdəndjë Tïchîke sə̈ mö, äwäpä mo mbo rə̂ gbɛ̂ kə̂ nə kə̂ gbo mê bhâ Nïköpölîse. Bëte bhâye kä ndə̂ më nyîndə̂ kə̂ sə lə̂ alö ndə̂ zɨ ndə̂ âmbo tə̂ gbölösə̂nə̈ lâme.

¹³ Amö mbo rə̂ gbɛ̂ ndə̂kə̂ nyikrə wrʉ̂ ndə̂ Zënâse earə̂ kə̂ za kokô lâme, tchetchë la Äpölôse, ânyë tchânə̂ andjê wabô wâ kênê ämbänə̈-ê.

¹⁴ Äwäpä andjandə̂ azə̈ nə̈ manda ndjë ndə̂kə̂ zatə̂ andjê gbɛ̂ ndə̂kə̂ mbo atchôtchô arə, ndə̂kə̂ pa âdə ngâ rə âwa ndə̂kə̂ pa a za könô tâ gasa-ê, andjë mbo rə̂, käko andjê səabô tee bhuu la tə̂ andjê-a.

¹⁵ Andjanə̈ gbɛ̂ ndə̂ më sə̂ la andjê bhâtə, andjë pô ndə̂ zə̈ nə̂. Azü ndə̂ andjë nyîndə̂ ârâ lə̂ köbosə̂ kə̂ za su andjê sə̈ Krîsiti lâme, amö po ndə̂ andjê sə̈ ârâ. Äfü pä Ndjapä mbo tchôtchô su tə̂ nyê gbɛ̂.