Tîte 2 - Mbëtï Ndjapä: TÄFO MADƗ̈

Djîrə̂ kə̂ nyisə̂ rə

¹ Âdə andə̂ zə nə̈, amö nyisə̂ rə ndə̂ âwâ gundə̂sə̂ djîrə̂ kə̂ nyisə̂ rə.

² Äwäpä akpôkpô aköchë zɨabô rə zɨ âro masə̂nə̈-ê, äwäpä andjë lusə̂tə̂ andjê, kə̂ to pö la köbo nə̈, kə̂ za su andjê tə̂ lëge nə̈ gbɛ̂ sə̈ Krîsiti, kə̂ nyində̂ angâ andjê, lakə̂ rʉatə̂ su andjê lə̂ arə gbɛ̂.

³ Äwä ndjë pä akpôkpô aɛ̈chë mbotə̂ andjê batə̂ azü ndə̂ andjë wâ ngbî bëte Ndjapä. Âwâbo pä andjë dɨ angbongbo apö-a, kə̂ zabô tə̂ andjê zâ gbɛ̂ ndə̂kə̂ ndjo pî âro masə̂nə̈-ê. Äwäpä andjë nyisə̂ rə ndə̂ âdâka sə̈ azü.

⁴ Äwä ndjë pä andjë nyisə̂ nə̈ sə̈ abechë-ɛ̈chë, köbo ndə̂kə̂ nyində̂ aköchë ndə̂ andjê, la abechë ndə̂ andjê,

⁵ kə̂ to pö la köbo nə̈, kə̂ bata tə̂ andjê tə̂ angbongbo arə, kə̂ mbo akua tchâalê ndə̂ andjê la su andjê balë, kə̂ watə̂ atchôtchô aɛ̈chë, kə̂ dje ma aköchë ndə̂ andjê, ânyë azü dɨabô angbongbo apö dɨ̂ tə̂ pö Ndjapä-ê.

⁶ Äwä ndjë pä mo za wängö sə̈ abechë-ɛ̈köchë ndə̂kə̂ pa andjë to pö la köbo nə̈

⁷ lə̂ arə gbɛ̂. Momö ndjë gbɛ̂, äwäpä mo nyisə̂ köbo sə̈ azü lə̂ köbosə̂ kə̂ mbo tchôtchô kua ndə̂ zə̈. Äwäpä kə̂ nyisə̂ rə ndə̂ zə̈ daka gbɛ̂, lakə̂ lusə̂tə̂ zə̈.

⁸ Äwäpä mo to pö ndə̂ âdâka, ndə̂ akrə gboabô köbo gbô ndə̂kə̂ zu tchə̂lə̂ nə̈-ê, käko ânyë, a-earə̂ kə̂ kosə̂ azə̂ toabô ngâ ngbongbo pö tô tə̂ azə̂-ê, tchâme andjê wa la ganô.

⁹ Äwäpä angbâa dje ma a-earə̂ andjê lə̂ arə gbɛ̂. Äwäpä andjë mbo rə ndə̂ âfû tə̂ a-earə̂ andjê, kə̂ gabô ma andjê gâ la andjê-ê.

¹⁰ Âwâbo pä andjë zɨ ngbä arə ndə̂ andjê-a, praâbalë äwäpä andjë nyisə̂ djîrə̂ kə̂ mbo rə ndə̂ andjê logbɛ̂, käko ânyë lə̂ arə gbɛ̂ ndə̂ andjë mbo rə̂, âza köbo sə̈ azü ndə̂kə̂ lusə̂ köbo rə ndə̂ ârâ nyisə̂ nə̈ pâ Ndjapä, Earə̂ kə̂ tcha azə̂.

¹¹ Bëte Ndjapä nyïsə̂ tchôtchô su yê sə̈ azü gbɛ̂ ndə̂kə̂ pa lə̂ köbosə̂ nə̈, azü gbɛ̂ gbo köbo ndə̂kə̂ tcha lə̂ kuzü.

¹² Tchôtchô su yê nə̈ lâme nyïsə̂ köbo sə̈ azə̂ ndə̂kə̂ pa azə̈ gbotə̂ kə̂ kosə̂ Ndjapä-ê, kə̂ gbotə̂ kə̂ mbo gʉ arə tchêbêche âtə-ê, ndə̂kə̂ pa, kə̂ sə ndə̂ azə̂ lə̂ alö ndə̂ azə̈ sə̂ lə̂nə̈ âtə âwa la köbo nə̈, kə̂ wa djîrə̂, ndjë ndə̂kə̂ pa azə̈ zatə̂ azə̂ gbɛ̂ sə̈ Ndjapä.

¹³ Azə̈ mbö tâ käko ndə̂kə̂ krʉ bëte tchôtchô lö ndə̂ su azə̂ wâ pânə̈ lâme. Sə̂nə̈ lâme kä ndə̂ azə̂ wun-adje golowäre ndə̂ Gbölö Ndjapä ndə̂ azə̂, la Jezü Krîsiti Earə̂ kə̂ tcha azə̂.

¹⁴ Tche zätə̂ yê la tə̂ yê sə̈ kuzü bëte azə̂, ndə̂kə̂ ji azə̂ lə̂ angbongbo rə gbɛ̂, kə̂ djutu azə̂ ânyë azə̈ gro ndə̂kə̂ watə̂ azü ndə̂ yê. Ndə̂kə̂ pa azə̈ watə̂ azü ndə̂ tchə̂lə̂ su andjê sɨ̂sɨ̈ la gʉ ndə̂kə̂ mbo atchôtchô kua.

¹⁵ Käko kä ndə̂ mo wâ ndə̂kə̂ to pö, kə̂ za wängö sə̈ azü, kə̂ gbɨtɨ tü azü la gbôgbô. Âwâbo pä ngâ akrə balë talusə̂ zə̈-a.