Rômo 9 - Mbëtï Ndjapä: TÄFO MADƗ̈

Ndjapä dɨ̈ azü ndə̂ Isarayële

¹ Pö ndə̂ më nyîndə̂ kə̂ to rə̂ âtə, më tö lëge pö, më môâbo yepa-a, bëte më wä balë la Krîsiti. Kpɨ̂ki Yingö nyïsə̂ köbosə̂ kə̂ rɨ tchə̂lə̂ su mê, ânyë su mê nyîsə̂ nə̈ päkëdə̂, rə nə̈ wätə̂ lëge pö.

² Su mê wä la nyonyo tə̂ gbölösə̂nə̈, ânyë su mê kä mê logbɛ̂.

³ Bhâtə̂ su mê, më nyïndə̂ nə̈ pä Ndjapä dra ndə̂ mê, ânyë tchə̂lə̂ mê la Krîsiti krʉ bëte arə̂mâ ndə̂ mê ndə̂ ârâ wâ la andjê pâ mawo balë.

⁴ Arə̂mâ ndə̂ mê nə̈ də̈ azü ndə̂ Isarayële. Andjë wätə̂ azü ndə̂ Ndjapä kʉ̂ andjê ndə̂kə̂ pa andjë watə̂ abechë ndə̂ yê. Tche mätə̂ yê sə̈ andjê. Tche drö amadɨ̈ la andjê, tche zä ndïɛ̈ sə̈ andjê, tche nyïsə̂ köbo kə̂ voga Ndjapä sə̈ andjê, tche zä bâlâ tə̂ andjê.

⁵ Arə̂mâ ndə̂ mê nə̈ lâme wütu lə̂ araâta mê ndə̂ rə̈ andjê kɨ̂ tə̂ gbölösə̂nə̈. Pâ mawo ndə̂ andjê kä ndə̂ a zɨ̂ Krîsiti batə̂ azü gbɛ̂, tchetchë ndə̂ tche wâ pâ arə gbɛ̂. Äwäpä a voga Ndjapä tə̂ logbɛ̂ logbɛ̂! Amin.

⁶ Änyïndə̂ kə̂ to rə̂ päkëdə̂ tchêngbâ pö ma Ndjapä wä ämbänə̈? Âdə̂âbo käko-a. Azü gbɛ̂ ndə̂ andjë wâ pâ mawo ndə̂ Isarayële, âdə̂âbo andjê kä ndə̂ âwâtə̂ alëge azü ndə̂ Isarayële nə̈-a.

⁷ Azü gbɛ̂ ndə̂ andjë wâ pâ mawo ndə̂ Abrahâmo, âdə̂âbo andjê gbɛ̂ kä ndə̂ âwâtə̂ abechë ndə̂ yê-a. Praâbalë Ndjapä tö rə̂ sə̈ Abrahâmo päkëdə̂: «Lə̂ köbosə̂ Izâke kä ndə̂ mo gbo azü pâ mawo ndə̂ zə̈ ndə̂ më zâ bâlâ ndə̂kə̂ kʉ andjê sə̈ mö.»

⁸ Änyïndə̂ kə̂ tö rə̂ päkëdə̂ âdə̂âbo abechë ndə̂ Abrahâmo zɨ̂ andjê batə̂ rə̂ ndə̂ azü gbɛ̂ zɨ̂ andjê kä ndə̂ âwâtə̂ abechë ndə̂ Ndjapä-a. Kütû andjanə̈ ndə̂ a zɨ̂ andjê gundə̂sə̂ bâlâ ndə̂ Ndjapä kä ndə̂ âwâtə̂ alëge abechë ndə̂ yê.

⁹ Ndjapä zä bâlâ alême päkëdə̂: «Lə̂ ngû ngbânə̈ batə̂ anə̈ âtə, mê kadje ngbâ mê ânyë Sarä zɨadje bechë tə̂ köchë.»

¹⁰ Âdə̂âbo kütû rə lâme balë-a, pö ndə̂ Rebekä kä ndjë tâ: Tche zɨ̈ abechë tə̂ aköchë bïchuû sə̈ Izâke agü azə̂.

^11-12 Dëkë Ndjapä la tə̂ yê kä ndə̂ ânyikrə rə̂ tə̂ su yê ndə̂kə̂ dɨ azü. Tche dɨ̂âbo azü bëte kə̂ mbo rə ndə̂ andjê-a, praâbalë tche dɨ̈ azü nə̈ batə̂ rə̂ ndə̂ su yê nyîndə̂ nə̈. Tchetchë kä ndə̂ âdɨ azü. Ndə̂kə̂ nyisə̂ nə̈ pä Ndjapä mbö rə gundə̂sə̂ pö ma yê, tche tö rə̂ sə̈ Rebekä päkëdə̂: «Dokʉ̈ bechë ndə̂ zə̈ mboadje kua tchâtchâ angɨ nə̈.» Ndjapä tö pö nə̈ dokʉ̈tchê ndə̂kə̂ pa Rebekä zɨ abechë nə̈. Dëkë abechë nə̈ lâme wûn-abo sə̂kə̂ mbo tchôtchô rə âdəndjë ngbongbo rə-a.

¹³ Ârə̂ kä ndə̂ Mbëtï Ndjapä tô rə̂ päkëdə̂: «Më nyïndə̂ Jakôbo ânyë su mê kôsə̂ Ezawü.»

¹⁴ Änyïndə̂ kə̂ tö rə̂ atöko? Ndjapä wâbo tə̂ djîrə̂ akrə? Âdə̂âbo käko balë-a!

¹⁵ Käko tche tö rə̂ sə̈ Möyîze päkëdə̂: «Më wün nyonyo akrə ndə̂ më nyïndə̂ kə̂ wun nyonyo yê, ânyë kə̂ mbo dâkâ tə̂ akrə ndə̂ më nyîndə̂ kə̂ mbo dâkâ tə̂ yê.»

¹⁶ Bëte rə ndə̂ akrə nyîndə̂ nə̈ âdəndjë bëte gbôgbô ndə̂ tche mbô rə̂ ânyë Ndjapä mbô dâkâ tə̂ yê? Âdə̂âbo käko balë-a. Ndjapä mbö dâkâ tə̂ yê bëte rə̂ ndə̂ tche wûn nyonyo yê.

¹⁷ Ädə̈ käko ânyë lə̂ Mbëtï Ndjapä, Ndjapä tö ndjë rə̂ sə̈ Faraön päkëdə̂: «Më zä mö Gbïɛ̈ ndə̂kə̂ pa lə̂ köbosə̂ zə̈, mê nyisə̂ gbôgbô ndə̂ mê lakə̂ mbo rə̂ ânyë rə̈ mê za tchô gbɛ̂ pâ cho âtə.»

¹⁸ Käko Ndjapä wün nyonyo akrə ndə̂ tche nyîndə̂ kə̂ wun nyonyo yê, ânyë akrə ndə̂ Ndjapä nyïndə̂ kə̂ mbo rə̂ pä su yê kpo, tche âmbo rə̂ pä su yê kpo.

Mêrâ lakə̂ wun nyonyo ndə̂ Ndjapä

¹⁹ Mô yuadje mê päkëdə̂: «Ndə̂ rə nə̈ wâ käko-ë, bëte giamâ ânyë Ndjapä ka yi pö lə̂ küma azü? Tchabâ âwâ ndə̂kə̂ kosə̂ rə ndə̂ Ndjapä nyîndə̂ nə̈?»

²⁰ Momö ndə̂ akrə, mo də̈ andə̂ zə̈ nə̈ tchabâ ânyë kə̂ gama zə̈ la Ndjapä? Lüsû ndə̂ akrə sôâ rə̂ la könô yê wä ndə̂kə̂ yu akrə ndə̂ tche sôâ rə̂ päkëdə̂: «Bëte giamâ ka ndə̂ mo sôâ mê kâkë?»

²¹ Earə̂ kə̂ soa lüsû wä ndə̂kə̂ soa lüsû batə̂ rə̂ ndə̂ su yê nyïndə̂ nə̈. Kütû la tô nə̈ lâme balë, tche söä alüsû bïchuû: Ngânə̈ wätə̂ lüsû ndə̂ kpülü, ngânə̈ wâtə̂ anə̈ ndə̂ a mbo rə lə̂nə̈ logbɛ̂ logbɛ̂.

²² Ndjapä nyïndə̂ kə̂ nyisə̂ mêrâ ndə̂ yê sə̈ azü, ânyë kə̈ nyîndə̂ kə̂ mbo rə̂ pä andjë wunsə̂ gbôgbô ndə̂ yê. Tche rʉ̈ätə̂ su yê tə̂ gbölösə̂nə̈ la azü ndə̂ andjë wâ ndə̂kə̂ gbo mêrâ ndə̂ yê, ânyë kə̈ wâ ndə̂kə̂ gbo kə̂ wa ngbanga ndə̂ yê.

²³ Tche mbö rə̂ bëte tche nyïndə̂ kə̂ nyisə̂ kə̂ wa gbölö ndə̂ yê sə̈ azü ndə̂ tche wûn nyonyo andjê. Azü nə̈ wätə̂ azü ndə̂ tche nyikrə andjê dokʉ̈tchê ndə̂kə̂ sə lə̂ golowäre ndə̂ yê.

²⁴ Azü nə̈ lâme də̈ azə̂. Âdə̂âbô kütû lə̂ gbâtə̂ ajuîfu kä ndə̂ tche ê azə̂-a, praâbalë tche ë ndjë azə̂ lə̂ gbâtə̂ andjanə̈ ndə̂ andjë wâbô wâtə̂ ajuîfu-î.

²⁵ Ndjapä tö pö nə̈ lâme lə̂ mbëtï ndə̂ earə̂ ndə̂ma Ndjapä Ozë päkëdə̂: «Azü ndə̂ andjë wâbô wâ alême tə̂ azü ndə̂ mê, mê eadje andjê batə̂ azü ndə̂ mê. Azü gö ndə̂ më nyîâbô nyîndə̂ andjê, mê eadje rə̂ tə̂ andjê pä azü gö ndə̂ më nyîndə̂ andjê tə̂ gbölösə̂nə̈.

²⁶ Sə̂ tchô ndə̂ a tô rə̂ sə̈ andjê päkëdə̂: Nyë wâbo tə̂ azü ndə̂ mê, kütû tchâme kä ndə̂ azü eadje rə̂ tə̂ nyê pä abechë ndə̂ Ndjapä, tchetchë ndə̂ tche za tchîsûwu sə̈ azü.»

²⁷ Âdə andə̂ azü gö ndə̂ Isarayële, Ezayï mü pö pâ andjê alême päkëdə̂: «Âdə rə̂ ndə̂ azü ndə̂ Isarayële ângba ndjë batə̂ mïndü tə̂ maga gbölö ngû ngbro, kütû angânə̈ lə̂ gbâtə̂ andjê kä ndə̂ âtcha lə̂ kuzü.

²⁸ Tə̂ lëge nə̈, pö ndə̂ Gbölö Gbïɛ̈ tô rə̂, tchê mboadje rə nə̈ gbɛ̂, wândâ wändä pâ cho âtə.»

²⁹ Ezayï tö ndjë rə̂ alême päkëdə̂: «Âdə Gbölö Gbïɛ̈ ndə̂ tche sə̂ pâ arə gbɛ̂ âtə, tche âkʉabô abechë kʉ̂ sə̈ azə̂ nyɛ̂-ɛn, dëkë andə̂ azə̈ nə̈ kâ nə̂, batə̂ andə̂ azü gö ndə̂ Sodômo la Gomôro.»

Ajuîfu wûn-âbo sə̂ Tchôtchô Pö-a

³⁰ Käko azə̈ âto rə̂ atöko? Angaâtə, azü ndə̂ andjë wâbô wâtə̂ ajuîfu wâ djîrə̂ lə̂ la Ndjapä nə̂, bëte rə̂ ndə̂ andjë zâ su andjê sə̈ Ndjapä. Dëkë andjë pûâbo köbo nə̈ alême ndə̂kə̂ wa djîrə̂ lə̂ la Ndjapä-a.

³¹ Azü gö ndə̂ Isarayële pü köbo alême ndə̂kə̂ wa djîrə̂ lə̂ la Ndjapä lə̂ köbosə̂ ndïɛ̈, praâbalë köbo ndə̂ ndïɛ̈ nə̈ nyîsə̂ nə̈ sə̈ andjê lâme, âyû tə̂ andjê nə̂.

³² Sə̂ köbo nə̈ yü tə̂ andjê bëte giamâ? Bëte rə̂ ndə̂ andjë nyîndə̂ kə̂ wa djîrə̂ lə̂ la Ndjapä lə̂ köbosə̂ atchôtchô rə ndə̂ andjë mbo rə̂. Andjë pûâbo köbo ndə̂kə̂ wa djîrə̂ lə̂ la Ndjapä lə̂ köbosə̂ su andjê ndə̂ andjë zâ rə̂ sə̈ Ndjapä-a. Andjë gʉ̈te da andjê tə̂ täme ndə̂ âmbo rə̂ pä azü te tâ,

³³ ndə̂ Mbëtï Ndjapä tô pö ndə̂nə̈ alême päkëdə̂: «Nyë wünsa rə̂, më nyikrə ngâ täme lə̂ gö ndə̂ Siyön ndə̂ âmbo rə̂ pä akrə te tâ. Gbölö täme lâme göä azü göä. Praâbalë akrə ndə̂ tche zâ su yê sə̈ tchë, ganô mboabô ndjë tchë tee-a.»