Rômo 8 - Mbëtï Ndjapä: TÄFO MADƗ̈

Kə̂ sə ndə̂ akrə ndə̂ tche wâ la Kpɨ̂ki Yingö

¹ Angaâtə, azü ndə̂ andjë wâ balë la Jezü Krîsiti, ngâ pö balë kä wâ bata lə̂ küma andjê-a.

² Bëte ndïɛ̈ ndə̂ Yingö zä tchîsûwu sə̈ akrə lə̂ köbosə̂ nə̈ ndə̂ akrə wâ balë la Jezü Krîsiti. Ndïɛ̈ ndə̂ Yingö nə̈ jî mê tchâtchâ ndïɛ̈ ndə̂ ngbongbo rə la andə̂ kuzü nə̂.

³ Ndïɛ̈ ndə̂ Möyîze wâbo ndə̂kə̂ mbo rə̂ alême-a, bëte gbôgbô ndə̂ azü wâbô wâ la rə̂ kä ndə̂ âkîtə̂ köbo tə̂ ndïɛ̈ ndə̂kə̂ mbo rə̂. Rə ndə̂ ndïɛ̈ wâbô wâ ndə̂kə̂ mbo rə̂, Ndjapä mbö rə̂: Tche mbö rə̂ käko kə̈ wân Modô ndə̂ yê la tə̂ yê ânyë tche zâ tə̂ akrə ndə̂ âwâ batə̂ tə̂ a-earə̂ ngbongbo rə. Tche jï azə̂ tchâtchâ ngbongbo rə. Käko Ndjapä wä ngbanga pâ ngbongbo rə ndə̂ âmbo rə lə̂ tə̂ azü.

⁴ Ndjapä mbö rə̂ käko ndə̂kə̂ pa azə̈ wa la gbôgbô ndə̂kə̂ mbo rə batə̂ rə̂ ndə̂ ndïɛ̈ yûkû nə̈ sə̈ azə̂. Käko azə̈ mbôâbo rə gundə̂sə̂ angbongbo gʉ su azə̂-a, praâbalë azə̈ mbö rə gundə̂sə̂ rə ndə̂ Yingö nyîndə̂ nə̈.

⁵ Azü ndə̂ andjë mbo rə gundə̂sə̂ angbongbo gʉ su andjê, su andjê gbɛ̂ wä kütû pânə̈. Praâbalë azü ndə̂ andjë mbo rə gundə̂sə̂ rə ndə̂ Yingö nyîndə̂ nə̈, su andjê gbɛ̂ wä kütû pâ arə ndə̂ Yingö.

⁶ Angbongbo gʉ su akrə ë la tchë pu kuzü. Akrə ndə̂ su yê wâ kütû pâ arə ndə̂ Yingö nyîndə̂ nə̈, tchê wadje la tchîsûwu ndjë la zɨtɨ su.

⁷ Azü ndə̂ su andjê wâ kütû pâ angbongbo gʉ su andjê, andjë kösə̂ Ndjapä. Andjë kösə̂ kə̂ mbo rə gundə̂sə̂ ndïɛ̈ ndə̂ Ndjapä. Andjë wâbo ndjë ndə̂kə̂ mbo rə̂-a.

⁸ Azü ndə̂ andjë mbo rə gundə̂sə̂ angbongbo gʉ su andjê, su Ndjapä wâbo ndə̂kə̂ fu la andjê-a.

⁹ Praâbalë âdə andə̂ nye nə̈, nyë kä mbôâbo rə gundə̂sə̂ angbongbo gʉ su nyê-a, ânyë kə̂ mbo rə gundə̂sə̂ rə ndə̂ Yingö nyîndə̂ nə̈, bëte Yingö ndə̂ Ndjapä sə̈ lə̂ su nyê. Âdə akrə âwabô wâ la Yingö ndə̂ Krîsiti-î, dëkë tche wâbo tə̂ akrə ndə̂ Krîsiti-a.

¹⁰ Âdə Krîsiti âwa lə̂ su nyê, Yingö ndə̂ yê âmbo rə̂ ânyë nyê wa la tchîsûwu, ndə̂ tə̂ nyê sə̂ kütû bëte kuzü bëte ngbongbo rə lâme, bëte lə̂ la Ndjapä, nyë wâtə̂ adjîrə̂ azü nə̂.

¹¹ Âdə Kpɨ̂ki Yingö ndə̂ tche jô Jezü lə̂ kuzü âsə lə̂ su nyê, käko Ndjapä ndə̂ tche jô Krîsiti lə̂ kuzü lâme, tchê zadje ndjë tchîsûwu sə̈ tə̂ nyê ndə̂ âwâ ndə̂kə̂ tchûtchü lâme, lə̂ köbosə̂ Yingö ndə̂ yê ndə̂ âsə̂ lə̂ su nyê.

¹² Bëte rə̂ kä arə̂mä, angâ arə kä tâ ndə̂ azə̈ wâ ndə̂kə̂ mbo rə̂, praâbalë angbongbo gʉ su azə̂ wâbo ndə̂kə̂ kʉ azə̂ la gbôgbô ndə̂kə̂ mbo rə gundə̂sə̂ nə̈-a.

¹³ Âdə nyê âmbo rə gundə̂sə̂ angbongbo gʉ su nyê, nyê tchuadje. Praâbalë lə̂ köbosə̂ Yingö, âdə nyê âji angbongbo kə̂ mbotə̂ nyê, nyê wadje la tchîsûwu.

¹⁴ Tə̂ lëge nə̈, azü ndə̂ Kpɨ̂ki Yingö nyisə̂ köbo sə̈ andjê, andjë wätə̂ abechë ndə̂ Ndjapä.

¹⁵ Yingö ndə̂ nyë gbô rə̂, wâbo tə̂ Yingö ndə̂kə̂ mbo nyê la ngbâa-a. Tche zâbo wa lə̂ nyê-a. Praâbalë tche wätə̂ Yingö ndə̂ âmbo rə̂ ânyë nyê watə̂ abechë ndə̂ Ndjapä. Lə̂ köbosə̂ yê, azə̈ tä wârə̂ sə̈ Ndjapä päkëdə̂: «Aba!» Ndə̂ ânyîndə̂ kə̂ tö rə̂ päkëdə̂: «Bha!»

¹⁶ Kpɨ̂ki Yingö la tə̂ yê tö rə̂ sə̈ yingö ndə̂ azə̂ pä azə̈ wätə̂ abechë ndə̂ Ndjapä.

¹⁷ Ndə̂ azə̈ wâtə̂ abechë ndə̂ Ndjapä, azə̂ gboadje ndjë atchôtchô rə ndə̂ yê ndə̂ tche nyîkrə rə̂ bëte azü ndə̂ yê. Azə̂ la Krîsiti kä ndə̂ âgbo atchôtchô rə nə̈. Ndə̂ azə̈ la Krîsiti wûn yûkü balë âtə, azə̈ la tchë âgboadje ndjë kə̂ lusə̂tə̂ ndə̂ yê.

Kə̂ wa gbölö ndə̂ Ndjapä ndə̂ ânəadje

¹⁸ Më wünsə̂ nə̈ pä yûkü ndə̂ azə̈ wun rə̂ angêta âtə, äwä batə̂ ngâ kpîɛ̂kpîɛ̂ rə. Âwâbo ndjë batə̂ kə̂ wa gbölö ndə̂ Ndjapä ndə̂ tchê nyiadje sə̂nə̈ sə̈ azə̂ tə̂ngâlo lâme-a.

¹⁹ Arə pâ cho âtə gbɛ̂ ndə̂ Ndjapä mbô rə̂ wä la gbölö gʉ ndə̂kə̂ sə bëte lo nə̈ ndə̂ Ndjapä nyiadje sə̂ abechë ndə̂ yê kraâ ësûwu.

²⁰ Arə pâ cho âtə wä tchâtchâ gbôgbô ndə̂ âwâbô wâtə̂ ngâ rə-ê. Âdə̂âbo arə nə̈ lâme kä ndə̂ ânyîndə̂ nə̈-a, Ndjapä kä ndə̂ âkʉ̂ rə̂ tchâtchâ gbôgbô nə̈ lâme. Praâbalë arə nə̈ gbɛ̂, gbô su andjê kä lakə̂ krʉ bëte ngâ rə,

²¹ bëte rə̂ ndə̂ a jiadje andjê tchâtchâ rə ndə̂ âmbo andjê tə̂ ngbâa ânyë kə̂ ndɨ andjê lâme. Andjê liadje lə̂kə̂ wa gbölö ndə̂ abechë ndə̂ Ndjapä, ndə̂ andjë wûtu tchâtchâ ngbâa.

²² Tə̂ lëge nə̈, azə̈ wûnsə̂ nə̈ nə̂ pä arə gbɛ̂ ndə̂ Ndjapä mbô rə̂ wün yûkü ânyë kə̂ dɨ tchə̂lə̂ ma andjê angaâtə batə̂ ɛ̈chë ndə̂ tche sə̂ lakə̂ zɨ bechë.

²³ Âdə̂âbo kütû arə pâ cho âtə balë kä ndə̂ âdɨ tchə̂lə̂ ma andjê-a. Azəzə̂ ndə̂ azə̈ gbô Yingö batə̂ dokʉ̈ tchôtchô rə ndə̂ Ndjapä zâ rə̂ sə̈ azə̂, azə̈ dɨ̈ ndjë tchə̂lə̂ ma azə̂ lə̂ su azə̂. Azə̈ sə̈ bëte Ndjapä ndə̂kə̂ pa tche kʉ azə̈ ndə̂kə̂ watə̂ abechë ndə̂ yê ânyë kə̂ ji azə̂ tchâtchâ ngbâa, azə̂ la tə̂ azə̂ gbɛ̂.

²⁴ Ndjapä tchâ azə̂ lə̂ kuzü nə̂. Praâbalë tche tchä azə̂ kütû lə̂ köbosə̂ nə̈ ndə̂ azə̈ zâ su azə̂ ndə̂kə̂ krʉ bëte rə ndə̂ tche wâ ndə̂kə̂ kʉ rə̂ sə̈ azə̂. Rə ndə̂ akrə wun rə̂, tche zâbo su yê ndə̂kə̂ krʉ bëte rə̂-a. Âdə akrə âwun rə nə̈, tchê kä zadje su yê ndə̂kə̂ krʉ bëte rə̂?

²⁵ Âdə azə̂ âza su azə̂ ndə̂kə̂ sə bëte rə ndə̂ la azə̂ wûn-âbô rə̂ wûn, azə̂ rʉadje tə̂ su azə̂ ndə̂kə̂ krʉ bëte rə̂.

²⁶ Äwä ndjë käko, Kpɨ̂ki Yingö mbö ndjë rə̂ la azə̂, azə̂ ndə̂ azə̈ wâbô wâ la gbôgbô. Yingö la tə̂ yê kä ndə̂ âto pö sə̈ Ndjapä bëte azə̂, bëte rə̂ ndə̂ azə̈ wûn-âbo wûnsə̂ kə̂ to pö sə̈ Ndjapä lə̂ köbo nə̈-ê. Lə̂kə̂ to pö ndə̂ Yingö sə̈ Ndjapä, tche kä lakə̂ dɨ tchə̂lə̂ ma yê. Apö kə̂ dɨ tchə̂lə̂ ma nə̈ lâme, akrə wâbo ndə̂kə̂ to rə̂-a.

²⁷ Ndjapä ndə̂ tche wun tchə̂lə̂ su akrə, tche wünsə̂ rə ndə̂ Yingö nyîndə̂ nə̈. Yingö tö pö sə̈ Ndjapä bëte azü ndə̂ Ndjapä, lə̂ köbosə̂ nə̈ ndə̂ Ndjapä nyîndə̂ nə̈.

²⁸ Azə̈ wûnsə̂ nə̈ nə̂ pä, rə gbɛ̂ pälatə̂ yê ndə̂kə̂ mbo dâkâ tə̂ azü ndə̂ andjë nyîndə̂ Ndjapä. Azü ndə̂ tche ê andjê lə̂ köbosə̂ nə̈ ndə̂ su yê nyîndə̂ nə̈.

²⁹ Bëte azü ndə̂ Ndjapä ê andjê dokʉ̈tchê ndə̂kə̂ watə̂ azü ndə̂ yê, tche nyïkrə rə̂ tə̂ su yê dokʉ̈tchê ndə̂kə̂ mbo rə̂ ânyë andjë wa batə̂ nyîsɨ̂ Modô ndə̂ yê. Ndjapä mbö rə̂ käko ndə̂kə̂ pa Modô ndə̂ yê watə̂ âyä angbängbä azü.

³⁰ Azü ndə̂ Ndjapä nyîkrə rə̂ käko lə̂ su yê dokʉ̈tchê bëte andjê, tche ê ndjë andjê. Andjanə̈ ndə̂ tche ê andjê, tche mbô rə̂ ânyë andjë wâ ndjë adjîrə̂ azü lə̂ la yê. Ndə̂ andjë wâtə̂ adjîrə̂ azü lə̂ la yê, tche lüsə̂ andjê.

Ndjapä nyïndə̂ azə̂ tə̂ gbölösə̂nə̈

³¹ Azə̈ âka to rə̂ atöko? Âdə Ndjapä âwa la azə̂, tchabâ kä ndə̂ âkosə̂ azə̂?

³² Ndjapä kîâbo tə̂ Modô ndə̂ yê bëte tchetchë la tə̂ yê-a, praâbalë tche zä tchë sə̈ kuzü bëte azə̂ gbɛ̂. Ndə̂ tche zâ Modô ndə̂ yê sə̈ azə̂ lâme, atöko kä ndə̂ tchê kʉabô arə gbɛ̂ kʉ̂ sə̈ azə̂ la Modô ndə̂ yê?

³³ Azü ndə̂ Ndjapä dɨ̂ andjê lâme, tchabâ kä ndə̂ âwâ ndə̂kə̂ za pö lə̂ küma andjê? Akrə balë sə̂âbo-a, bëte rə̂ ndə̂ Ndjapä mbô rə̂ ânyë andjë wâtə̂ adjîrə̂ azü lə̂ la yê.

³⁴ Tchabâ kä ndə̂ âwâ ndə̂kə̂ wa ngbanga lə̂ küma andjê? Akrə balë sə̂âbo-a, bëte rə̂ ndə̂ Jezü Krîsiti tchû ânyë kə̈ jô lə̂ kuzü. Tche sə̈ ndrotə̂ Ndjapä də ndôkö könô yê ânyë kə̂ to pö sə̈ Ndjapä bëte azə̂.

³⁵ Tchabâ kä ndə̂ âwâ ndə̂kə̂ krʉ tchə̂lə̂ azə̂ lakə̂ nyində̂ azə̂ ndə̂ Krîsiti nyîndə̂ azə̂ lâme? Arə batə̂: Yûkü, wawa, agbôgbô arə ndə̂ azü mbo rə̂ tə̂ azə̂, gʉ, kə̂ wabô wâ la rə, angbongbo rə ndə̂ âgbo azə̂ âdəndjë kuzü?

³⁶ Batə̂ rə̂ ndə̂ Mbëtï Ndjapä tô rə̂ päkëdə̂: «Logbɛ̂, la mbatchâ ndjoa ëtə̂ tchêndə̂gölo, azü kä lakə̂ pu azə̂ ndə̂kə̂ won azə̂ bëte mö. Azü wün azə̂ batə̂ aɛ̈bro-ngbaga ndə̂ a e la andjê ndə̂kə̂ wa gɨ̈ andjê.»

³⁷ Praâbalë lə̂ arə lâme gbɛ̂, azə̈ wätə̂ azü ndə̂ andjë rô la gbôgbô lə̂ köbosə̂ gbôgbô ndə̂ Jezü ndə̂ tche nyîndə̂ azə̂.

³⁸ Tə̂ lëge nə̈, më wûnsə̂ nə̈ nə̂ pä ngâ rə ndə̂kə̂ krʉ tchə̂lə̂ azə̂ la Krîsiti wâbo-a: Âdə̂âbo kuzü-a, âdə̂âbo rə̂ ndə̂ azə̈ wâ la tʉ̈rʉ̂ la azə̂-a, âdə̂âbo aânje-a, âdə̂âbo agbôgbô yingö ndə̂ andjë wâ la gbôgbô lə̂ yi-a, âdə̂âbo arə ndə̂ tchô angêta âdəndjë arə ndə̂ tchô lâmbo-a,

³⁹ âdə̂âbo agbôgbô ndə̂ tchêlafô âdəndjë agbôgbô ndə̂ âwâ lə̂ dju cho-a, âdə̂âbo ngâ rə ndə̂ Ndjapä mbô rə̂-a. Ngâ rə balë ndə̂ âwâ ndə̂kə̂ krʉ tchə̂lə̂ azə̂ lakə̂ nyində̂ ngâ ndə̂ Ndjapä wâbo-a. Tche nyïsə̂ köbo ndə̂ tche nyîndə̂ azə̂ lâme lə̂ köbosə̂ Jezü Krîsiti, Gbölö Gbïɛ̈ ndə̂ azə̂.