Rômo 6 - Mbëtï Ndjapä: TÄFO MADƗ̈

Azə̈ wä la tʉ̈rʉ̂ la lə̂ köbosə̂ Krîsiti

¹ Käko-ë, pö giamâ kä ndə̂ azə̈ to rə̂? Äwäpä azə̈ sə lə̂ ngbongbo rə etə̂ ânyë tchôtchô su ndə̂ Ndjapä ro masə̂nə̈?

² Âdə̂âbo käko-a! Ndə̂ azə̈ tchû, ânyë tchə̂lə̂ tə̂ azə̂ krʉ̂ la ngbongbo rə lâme, atöko kä ndə̂ azə̈ ndəpo lakə̂ mbo ngbongbo rə etə̂?

³ Nyë wûn-âbo sə̂nə̈? Azə̈ gbö batɛ̂me ndə̂kə̂ wa balë la Jezü Krîsiti bëte azə̈ gbö batɛ̂me nə̈ ndə̂kə̂ wa balë la tchë lə̂ köbosə̂ kuzü ndə̂ tche tchû rə̂.

⁴ Käko, lə̂ köbosə̂ batɛ̂me, a chï azə̂ balë la Krîsiti, ânyë azə̈ wâ balë la tchë lə̂ köbosə̂ kuzü ndə̂ tche tchû rə̂. Praâbalë Krîsiti jö lə̂ kuzü lə̂ köbosə̂ gbôgbô ndə̂ Bha ndə̂kə̂ pa azəzə̂ ndjë gbɛ̂, azə̈ sə la täfo tchîsûwu.

⁵ Ndə̂ azə̈ wâ balë tə̂ lëge nə̈ la Krîsiti lə̂ köbosə̂ kuzü ndə̂ azə̈ tchû rə̂ batə̂ tchë, azə̈ âwa ndjë balë la tchë lə̂ köbosə̂ kə̂ jo lə̂ kuzü batə̂ tchë.

⁶ Azə̈ wûnsə̂ nə̈ nə̂ pä dokʉ̈ kə̂ sə ndə̂ azə̂ tchû nə̂ balë la Krîsiti pâ yö ndə̂ gba. Käko angbongbo gʉ tə̂ su azə̂ tchû ndjë nə̂, ânyë azə̈ kä wâ bata tə̂ angbâa ndə̂ ngbongbo rə-a.

⁷ Bëte akrə ndə̂ tche tchû nə̂, tche wûtu tchâtchâ ngbâa ndə̂ ngbongbo rə nə̂.

⁸ Praâbalë ndə̂ azə̂ la Krîsiti tchû lâme, azə̈ gâmba rə̂ nə̂ pä azə̂ la tchë wadje la tchîsûwu.

⁹ Azə̈ wûn ndjë sə̂nə̈ nə̂ pä Krîsiti jô lə̂ kuzü nə̂. Tchê kä tchu bata tee-a, kuzü kä wâbo la gbôgbô pâ yê-a.

¹⁰ Kuzü ndə̂ Krîsiti tchû rə̂ lâme, tche tchü kütû sûsunə̈ balë bëte ngbongbo rə ndə̂ azü. Angaâtə tche kä la tʉ̈rʉ̂ la yê ânyë tchîsûwu ndə̂ yê wä bëte Ndjapä.

¹¹ Käko nyënyê ndjë gbɛ̂, äwäpä nyë wuntə̂ nyê batə̂ azü ndə̂ andjë tchû nə̂ ndə̂kə̂ sə tʉ̂rʉ tə̂ ngbongbo rə, ânyë lə̂ köbosə̂ kə̂ wa balë ndə̂ nyê la Jezü Krîsiti, nyê wa la tchîsûwu bëte Ndjapä.

¹² Bëte rə̂ kä ndə̂, äwäpä ngbongbo rə ka wâbô wâ la gbôgbô pâ tə̂ nyê ndə̂ âtchuadje lâme-ê. Käko ânyë nyê mboabô rə mbô gundə̂sə̂ angbongbo gʉ su nyê.

¹³ Nyë zäbô ngâ tchâme-tə̂ nyê zâ ndə̂kə̂ mbo ngbongbo rə batə̂ ngâ rə kʉ̈ʉ̈ ndə̂ ngbongbo rə-ê. Praâbalë äwäpä nyë zatə̂ nyê la tə̂ nyê bëte kua ndə̂ Ndjapä, batə̂ azü ndə̂ andjë jô lə̂ kuzü. Nyë zätə̂ nyê gbɛ̂ bëte kua ndə̂ Ndjapä, batə̂ ngâ rə kʉ̈ʉ̈ ndə̂kə̂ mbo rə ndə̂ âwâ djîrə̂.

¹⁴ Tə̂ lëge nə̈, ngbongbo rə ka wabô la kümändëmä pâ nyê tee-a, bëte rə̂ ndə̂ nyë kä wâbo tchâtchâ ndïɛ̈-a, praâbalë nyë wä tchâtchâ tchôtchô su ndə̂ Ndjapä.

Azü ndə̂ andjë mbo djîrə̂ rə

¹⁵ Pö lâme nyïndə̂ kə̂ to rə̂ atöko? Ndə̂ azə̈ wûtu tchâtchâ ndïɛ̈ ânyë kə̈ wâ tchâtchâ tchôtchô su ndə̂ Ndjapä lâme, ârə̂ kä ndə̂ âzâ köbo sə̈ azə̂ ndə̂kə̂ mbo ngbongbo rə? Âdə̂âbo käko-a!

¹⁶ Nyë wûn-âbo sə̂nə̈? Âdə nyê âzatə̂ nyê la ngbâa tchâtchâ ngâ akrə ndə̂kə̂ dje pö ma yê, dëkë nyë wâ nə̂ tə̂ ngbâa ndə̂ akrə nə̈ lâme. Änyïndə̂ kə̂ to rə̂ päkëdə̂, âdə nyê âzatə̂ nyê sə̈ ngbongbo rə, nyë wâ nə̂ tə̂ angbâa ndə̂ ngbongbo rə ânyë ngbongbo rə nə̈ âe la nyê pu kuzü. Âdə nyê âzatə̂ nyê batə̂ angbâa ndə̂kə̂ dje pö ma Ndjapä, Ndjapä nə̈ âmbo rə̂ pä nyê watə̂ adjîrə̂ azü lə̂ la yê.

¹⁷ Azə̈ zä ayîabâ sə̈ Ndjapä bëte dokʉ̈tchê alême, nyë wätə̂ angbâa ndə̂ ngbongbo rə. Angaâtə, nyë gâmba rə̂ nə̂ la su nyê gbɛ̂ la lëge pö ndə̂ a nyîsə̂ nə̈ sə̈ azü gbɛ̂ ânyë nyë djê rə̂ lâme.

¹⁸ Ndjapä jî nyê tchâtchâ ngbongbo rə nə̂ ânyë nyë wätə̂ angbâa ndə̂ yê ndə̂kə̂ mbo djîrə̂ rə.

¹⁹ Pö ndə̂ mê to rə̂ âtə, më tö rə̂ batə̂ rə̂ ndə̂ azü to rə̂ bëte kə̂ dje tchə̂lə̂ pö ndə̂ nyê kâkä. Dokʉ̈tchê alême, nyë zätə̂ nyê la ngbâa ndə̂kə̂ mbo arə ganô la arə ndə̂ âwâbô wâ lə̂ köbo nə̈-ê. Arə nə̈ lâme mbö rə̂ pä nyë kôsə̂ pö ma Ndjapä. Angaâtə, äwäpä nyë za ndjë tə̂ nyê la ngbâa ndə̂kə̂ mbo adjîrə̂ rə ndə̂ âmbo rə̂ pä kə̂ sə ndə̂ nyê wa ngbî bëte Ndjapä.

²⁰ Ndə̂ nyë wâ alême tə̂ angbâa ndə̂ ngbongbo rə, kə̂ mbo adjîrə̂ rə fûâbo tə̂ nyê-a.

²¹ Arə ganô ndə̂ nyê mbo rə̂ alême, tchôtchô rə giamâ kä ndə̂ nyë gbô rə̂ ngbânə̈? Rə ndə̂ nyë gbô rə̂ ngbânə̈ wä kütû tə̂ kuzü.

²² Praâbalë angaâtə, Ndjapä jî nyê tchâtchâ ngbâa ndə̂ ngbongbo rə nə̂ ânyë nyë wätə̂ a-earə̂ kua ndə̂ yê. Käko ndə̂ nyê mbo rə ndə̂ âdâka lə̂ la Ndjapä lâme, rə ndə̂ nyê gbo rə̂ ngbânə̈ wätə̂ tchîsûwu ndə̂ logbɛ̂ logbɛ̂.

²³ Tə̂ lëge nə̈, rə ndə̂ akrə gbo rə̂ ngbâ ngbongbo rə ndə̂ tchê mbo rə̂ wätə̂ kuzü. Praâbalë rə ndə̂ Ndjapä za rə̂ sə̈ azü ämbänə̈ də̈ tchîsûwu ndə̂ logbɛ̂ logbɛ̂, lə̂ köbosə̂ nə̈ ndə̂ azə̈ wâ balë la Jezü Krîsiti, Gbölö Gbïɛ̈ ndə̂ azə̈.