Rômo 5 - Mbëtï Ndjapä: TÄFO MADƗ̈

Azə̈ wä la zɨtɨ su la Ndjapä

¹ Käko-ë, ndə̂ azə̈ wâtə̂ adjîrə̂ azü lə̂ köbosə̂ kə̂ za su azə̂ sə̈ Ndjapä, azə̈ wä la zɨtɨ su lə̂ gbâtə̂ azə̂ la Ndjapä lə̂ köbosə̂ Gbölö Gbïɛ̈ ndə̂ azə̂ Jezü Krîsiti.

² Lə̂ köbosə̂ Jezü lâme kä ndə̂ azə̈ zâ su azə̂ sə̈ Ndjapä ânyë Ndjapä mbô tchôtchô su tə̂ azə̂. Gbô azə̂ kä lə̂ köbosə̂ tchôtchô su ndə̂ yê angêta. Bëte rə̂ kä ndə̂ su azə̂ wâ la mômô bëte kə̂ wa gbölö ndə̂ Ndjapä ndə̂ azə̈ zâ su azə̂ ndə̂kə̂ krʉ bëte rə̂.

³ Âdə̂âbo kütû bëte rə lâme-a, azə̈ wä ndjë la mômô lə̂ arə nyonyo ndə̂ âgbo azə̂ bëte azə̈ wûnsə̂ nə̈ nə̂ pä nyonyo mbö rə̂ ânyë akrə rʉatə̂ su yê.

⁴ Kə̂ rʉatə̂ su mbö rə̂ ânyë azə̈ kpokpo tə̂ azə̂ lə̂ arə nyonyo. Kə̂ kpokpo tə̂ azə̂ lə̂ arə nyonyo lâme mbö rə̂ ânyë su azə̂ krʉ bëte arə ndə̂ Ndjapä nyïndə̂ kə̂ kʉ rə̂ sə̈ azə̂.

⁵ Rə ndə̂ su azə̂ krʉ̂ bëte rə̂ lâme, azə̂ krʉabô bëte rə̂ tʉrʉ tee-a, bëte Ndjapä nyisə̂ nə̈ lə̂ su azə̂ pä tche nyïndə̂ azə̂ tə̂ gbölösə̂nə̈. Tche nyïsə̂ nə̈ lə̂ köbosə̂ Kpɨ̂ki Yingö ndə̂ tche zâ tchë sə̈ azə̂.

⁶ Bëte, ndə̂ azə̂ wâbô wâ alême la gbôgbô, Krîsiti tchû bëte a-earə̂ ngbongbo rə, gundə̂sə̂ lo nə̈ ndə̂ Ndjapä nyïkrə rə̂.

⁷ Sə̂nə̈ kâkä ndə̂kə̂ pa ngâ akrə gamba rə̂ ndə̂kə̂ tchu bëte akrə ndə̂ tche wâ djîrə̂. Ngâ akrə gambadje rə̂ ndə̂kə̂ tchu bëte akrə ndə̂ tche mbô tchôtchô rə tə̂ azü? Më wûn-âbo sə̂nə̈-a.

⁸ Praâbalë Ndjapä nyïsə̂ köbo ndə̂ tche nyîndə̂ azə̂ kâkë: Ndə̂ gbô azə̂ ndə̂po tə̂ a-earə̂ ngbongbo rə, Jezü Krîsiti tchû bëte azə̂.

⁹ Angaâtə azə̈ wâ nə̂ djîrə̂ lə̂ la Ndjapä lə̂ köbosə̂ jï Krîsiti. Käko ngâ rə balë ndə̂ âwâ ndə̂kə̂ kitə̂ köbo tə̂ yê ndə̂kə̂ tcha azə̂ lə̂ mêrâ ndə̂ Ndjapä wâbo-a.

¹⁰ Ndə̂ azə̈ kôsə̂ Ndjapä alême, tche mbö rə̂ pä tchôtchô kə̂ sə kângbâ yê lə̂ gbâtə̂ azə̂ la Ndjapä lə̂ köbosə̂ kuzü Modô ndə̂ yê. Ndə̂ tchôtchô kə̂ sə kângbâ yê lə̂ gbâtə̂ azə̂ la tchë lâme, lə̂ köbosə̂ Modô ndə̂ yê ndə̂ tche wâ la tchîsûwu, ngâ rə balë wâbo ndə̂kə̂ kitə̂ köbo tə̂ yê ndə̂kə̂ tcha azə̂ lə̂ kuzü-a.

¹¹ Âdə̂âbo kütû bëte rə lâme-a, su azə̂ wä la mômô bëte Ndjapä lə̂ köbosə̂ Gbölö Gbïɛ̈ ndə̂ azə̂ Jezü Krîsiti, ndə̂ tche mbô rə̂ pä angaâtə kə̂ sə azə̂ la Ndjapä wâ lə̂ köbo nə̈.

Pö pâ Adâme la Krîsiti

¹² Kə̂ mbo ngbongbo rə nə̈ atə̂pâ cho âtə bëte akrə balë ndə̂ tche də̂ Adâme, ânyë lə̂ köbosə̂ kə̂ mbo ngbongbo rə kä ndə̂ kuzü wâ. Bëte rə̂ kä ndə̂ kuzü kʉ̂ azü pâ cho âtə gbɛ̂ bëte azü gbɛ̂ mbô ngbongbo rə nə̂.

¹³ Dokʉ̈tchê ndə̂kə̂ pa Ndjapä za ndïɛ̈ sə̈ Möyîze, ngbongbo rə kä alême tâ pâ cho âtə. Praâbalë ndə̂ ndïɛ̈ wâbô wâ, Ndjapä zâbo su yê pâ kə̂ mbo ngbongbo rə ndə̂ azü-a.

¹⁴ Ndə̂ âtô tə̂ Adâme ndjoa ëtə̂ Möyîze, kuzü wä la kümändëmä pâ azü gbɛ̂ ndjë pâ andjanə̈ ndə̂ andjë mbôâbô ngbongbo rə mbô batə̂ Adâme ndə̂ tche kôsə̂ ndïɛ̈ ndə̂ Ndjapä. Adâme də̈ nyîsɨ̂ akrə ndə̂ tchê nəadje.

¹⁵ Praâbalë rə ndə̂ Ndjapä za rə̂ sə̈ akrə ämbämbänə̈ wä ngbî tə̂ ngbongbo rə ndə̂ Adâme mbô rə̂. Tə̂ lëge nə̈, angbängbä azü tchü bëte kə̂ mbo ngbongbo rə ndə̂ akrə balë. Praâbalë rə ndə̂ âwâ gbölö ânyë kə̈ rô sə̂nə̈ də̈ anə̈ ndə̂ Ndjapä mbô tchôtchô su tə̂ gbölösə̂nə̈ tə̂ angbängbä azü. Tche zä rə̂ sə̈ andjê ämbänə̈ lə̂ köbosə̂ akrə balë, Jezü Krîsiti.

¹⁶ Rə ndə̂ Ndjapä zâ rə̂ sə̈ azü ämbänə̈ wä ndjë ngbî tə̂ rə ndə̂ âwutu la tchêngbâ kə̂ mbo ngbongbo rə ndə̂ akrə balë. La tchêngbâ kə̂ mbo ngbongbo rə ndə̂ akrə balë, Ndjapä wä ngbanga ânyë ngbanga nə̈ tê lə̂ küma azü gbɛ̂. Praâbalë la tchêngbâ kə̂ mbo angbongbo rə tə̂ gbölösə̂nə̈ ndə̂ azü, Ndjapä mbô tchôtchô su ânyë kə̈ zâ köbo sə̈ azü ndə̂kə̂ wa djîrə̂ lə̂ la yê.

¹⁷ Tə̂ lëge nə̈, lə̂ köbosə̂ akrə balë, bëte kə̂ mbo ngbongbo rə ndə̂ akrə balë, kuzü wâ la kümändëmä pâ azü gbɛ̂. Praâbalë lə̂ köbosə̂ akrə balë ndə̂ tche də̂ Jezü Krîsiti, azü gbö arə tə̂ gbölösə̂nə̈. Käko ndjë, ngâ rə balë wâbo ndə̂ âkitə̂ köbo tə̂ andjanə̈ ndə̂ andjë gbô arə lə̂ köbosə̂ tchôtchô su ndə̂ Ndjapä, la andjanə̈ ndə̂ andjë wâ djîrə̂ lə̂ la yê ndə̂kə̂ wa la tchîsûwu-a, ndjë ndə̂kə̂ mbo kümändëmä la tchë-a.

¹⁸ Käko lə̂ köbosə̂ ngbongbo rə ndə̂ akrə balë, ngbanga tê lə̂ küma azü gbɛ̂. Käko ndjë, kə̂ mbo tchôtchô rə ndə̂ akrə balë mbö rə̂ ânyë azü gbɛ̂ wâ djîrə̂ lə̂ la Ndjapä, kə̈ wâ la tchîsûwu.

¹⁹ Lə̂ köbosə̂ kə̂ kosə̂ pö ndə̂ akrə balë kä ndə̂ angbängbä azü wâtə̂ a-earə̂ ngbongbo rə. Ndjë, lə̂ köbosə̂ kə̂ dje pö ndə̂ akrə balë kä ndə̂ angbängbä azü wâ djîrə̂ lə̂ la Ndjapä.

²⁰ Ndïɛ̈ nə̈ ndə̂kə̂ mbo rə̂ pä ngbongbo rə ndə̂ azü ro masə̂nə̈. Praâbalë sə̂ tchô ndə̂ ngbongbo rə ro masə̂nə̈, tchôtchô su ndə̂ Ndjapä rö masə̂nə̈ tə̂ gbölösə̂nə̈.

²¹ Dokʉ̈tchê alême, ngbongbo rə wä la kümändëmä ndə̂kə̂ won azü. Käko ndjë, tchôtchô su ndə̂ Ndjapä wä angaâtə la kümändëmä ndə̂kə̂ mbo rə̂ ânyë azü wa djîrə̂. Käko azə̈ wä la tchîsûwu ndə̂ logbɛ̂ logbɛ̂ lə̂ köbosə̂ Jezü Krîsiti, Gbölö Gbïɛ̈ ndə̂ azə̂.