Rômo 4 - Mbëtï Ndjapä: TÄFO MADƗ̈

Köbo ndə̂ Abrahâmo wâtə̂ djîrə̂ akrə

¹ Käko azə̈ âto rə̂ atöko pâ Abrahâmo ndə̂ tche wâtə̂ âta azə̂? Giamâ kä ndə̂ tche gbô rə̂ lə̂ köbosə̂ kə̂ sə ndə̂ yê ndə̂ akrə?

² Âdə Abrahâmo âwa alême djîrə̂ lə̂ la Ndjapä bëte atchôtchô rə ndə̂ tche mbô rə̂, tche wä ndə̂kə̂ bhi gogo yê pânə̈. Praâbalë tche wâbo ndə̂kə̂ bhi gogo yê lə̂ la Ndjapä-a.

³ Tə̂ lëge nə̈, pö giamâ kä ndə̂ Mbëtï Ndjapä tô rə̂? Mbëtï nə̈ tö rə̂ päkëdə̂: «Abrahâmo zä su yê sə̈ Ndjapä ânyë Ndjapä wûn tchë batə̂ djîrə̂ akrə lə̂ köbosə̂ nə̈ ndə̂ tche zâ su yê sə̈ Ndjapä.»

⁴ Akrə ndə̂ tche mbô kua, tche gbö makətche ngbânə̈. Makətche ndə̂ tche gbô rə̂ lâme, a zâbo rə̂ sə̈ tchë ämbänə̈-a. Äwätə̂ arə ndə̂ a wâ ndə̂kə̂ za rə̂ sə̈ tchë.

⁵ Praâbalë âdə ngâ akrə âmboabô ngâ rə mbô, ânyë kə̈ zâ su yê sə̈ Ndjapä ndə̂ tche mbo rə̂ ânyë a-earə̂ kə̂ mbo ngbongbo rə wa djîrə̂, kə̂ za su yê nə̈ âmbo rə̂ ânyë Ndjapä wun tchë batə̂ djîrə̂ akrə.

⁶ Bëte rə̂ kä ndə̂ Davîdi tô pö pâ tchôtchô kə̂ sə ndə̂ akrə ndə̂ Ndjapä wûn tchë batə̂ djîrə̂ akrə dëkë akrə nə̈ mbôâbo ndjë tchôtchô rə-a. Davîdi tö rə̂ päkëdə̂:

⁷ «Nyê wä la mômô nyënyê ndə̂ kə̂ mbo rə ndə̂ nyê wâbô wâ lə̂ köbo nə̈, ânyë Ndjapä jî rə̂ lə̂ küma nyê, ânyë kə̈ gʉ̂â tchêpâ ngbongbo rə ndə̂ nyê!

⁸ Mômô wätə̂ akrə ndə̂ Gbölö Gbïɛ̈ gʉ̂â la yê pâ kə̂ mbo ngbongbo rə ndə̂ yê.»

⁹ Pö ndə̂ tchôtchô kə̂ sə nə̈ lâme wä kütû bëte ajuîfu? Azü ndə̂ andjë wâbô wâtə̂ ajuîfu lâme, tchôtchô kə̂ sə nə̈ wâbo ndjë bëte andjê? Tə̂ lëge nə̈, azə̈ tö rə̂ päkëdə̂: «Abrahâmo zä su yê sə̈ Ndjapä ânyë Ndjapä wûn tchë batə̂ djîrə̂ akrə bëte kə̂ za su yê sə̈ Ndjapä.»

¹⁰ Dalatchêbâ kä ndə̂ Ndjapä wûn tchë batə̂ djîrə̂ akrə? Ndjapä wün tchë batə̂ djîrə̂ akrə dokʉ̈tchê ânyë a wâ tchë la gasa, âdəndjë la tchêngbâ kə̂ wa gasa ndə̂ yê nə̈? Tche wâbo tə̂ djîrə̂ akrə la tchêngbâ kə̂ wa gasa ndə̂ yê-a, tche wä djîrə̂ dokʉ̈tchê.

¹¹ Dokʉ̈tchê ndə̂kə̂ pa tche wa gasa, Abrahâmo wä alême tə̂ djîrə̂ akrə bëte rə̂ ndə̂ tche zâ su yê sə̈ Ndjapä. Pânə̈ tche gbô ngâ nyîsɨ̂ rə ndə̂ âdə̂ gasa. Rə nə̈ lâme nyïsə̂ nə̈ pä Ndjapä wün tchë batə̂ djîrə̂ akrə bëte kə̂ za su yê sə̈ Ndjapä. Käko Abrahâmo wâ nə̂ tə̂ bha azü gbɛ̂ ndə̂ andjë zâ su andjê sə̈ Ndjapä âdəndjë rə̂ ndə̂ andjë wâbô gasa wâ-ê. Andjanə̈ lâme, Ndjapä wün andjê batə̂ adjîrə̂ azü.

¹² Tche wä ndjë tə̂ bha azü gbɛ̂ ndə̂ andjë wâ gasa, änyïndə̂ kə̂ to rə̂ pä andjë zâbo su andjê kütû pâ kə̂ wa gasa nə̈-a. Andjë mbö rə̂ lə̂ köbosə̂ kə̂ za su andjê sə̈ Ndjapä batə̂ bha azə̂ Abrahâmo: Tchetchë, tche zä su yê sə̈ Ndjapä dokʉ̈tchê ndə̂kə̂ pa tche wa gasa.

Abrahâmo zä su yê sə̈ Ndjapä

¹³ Ndjapä zä bâlâ alême tə̂ Abrahâmo ndjë la azü pâ mawo ndə̂ yê pä tchêbêche wadje tə̂ andə̂ andjë nə̈. Ndjapä mbôâbo rə̂ tə̂ pö ndə̂nə̈ ndə̂ Abrahâmo mbô rə gundə̂sə̂ ndïɛ̈-a. Tche mbö rə̂ bëte tche wün Abrahâmo batə̂ djîrə̂ akrə lə̂ köbosə̂ kə̂ za su yê sə̈ Ndjapä.

¹⁴ Âdə kütû azü ndə̂ andjë mbo rə gundə̂sə̂ ndïɛ̈ kä ndə̂ âgboadje arə ndə̂ Ndjapä zâ bâlâ nə̈ alême, dëkë kə̂ za su sə̈ Ndjapä wä ämbänə̈, ânyë rə ndə̂ Ndjapä zâ bâlâ tə̂ pö ndə̂nə̈ alême wadje ndjë tə̂ mbämbä rə.

¹⁵ Bëte kə̂ kosə̂ ndïɛ̈ mbö rə̂ pä su yê kʉ̈ tchë. Praâbalë âdə ndïɛ̈ âwabô wâ, kə̂ kosə̂ kə̂ dje ndïɛ̈ wâbo-a.

¹⁶ Bëte Ndjapä zä bâlâ alême ndə̂kə̂ kʉ rə sə̈ azü kütû lə̂ köbosə̂ kə̂ za su andjê sə̈ tchë. Tche kʉ̈ arə nə̈ sə̈ azü pâ mawo ndə̂ Abrahâmo kütû ämbämbänə̈. Käko bâlâ ndə̂ Ndjapä nə̈ lâme wä bëte azü gbɛ̂ pâ mawo ndə̂ Abrahâmo. Âwâbo kütû bëte andjanə̈ ndə̂ andjë zâ su andjê pâ ndïɛ̈-a, praâbalë äwä ndjë bëte azü gbɛ̂ ndə̂ andjë zâ su andjê sə̈ Ndjapä batə̂ rə̂ ndə̂ tche zâ su yê sə̈ Ndjapä. Abrahâmo nə̈ wätə̂ bha azü gbɛ̂.

¹⁷ Tə̂ lëge nə̈, Mbëtï Ndjapä tö rə̂ päkëdə̂: «Më zä mö ndə̂kə̂ pa mo watə̂ bha angbängbä azü.» Abrahâmo zä su yê sə̈ Ndjapä ndə̂ tche za tʉ̈rʉ̂ la sə̈ azü ndə̂ andjë tchû ânyë kütû lə̂ köbosə̂ pö ma yê, rə ndə̂ âwâbô wâ, tche mbö rə̂ ânyë rə nə̈ wâ. Lə̂ la yê, Abrahâmo wätə̂ bha azə̈.

¹⁸ Abrahâmo zä su yê gbɛ̂ ndə̂kə̂ krʉ bëte rə̂. Ndə̂ ngâ rə ndə̂kə̂ pa tche za su yê ndə̂kə̂ sə bëte rə̂ wâbô wâ, tche zä su yê sə̈ Ndjapä ânyë kə̈ wätə̂ «bha angbängbä azü gö.» Rə nə̈ mbö gundə̂sə̂ pö ndə̂ Mbëtï Ndjapä tô rə̂ päkëdə̂: «Azü pâ mawo ndə̂ zə̈ ângbadje tə̂ gbölösə̂nə̈.»

¹⁹ Ngû ndə̂ Abrahâmo ndö la ngû ngbangbo balë, tche wûn rə̂ ndə̂ tche ndô tə̂kə̂ tchu nə̂, ânyë Sarä wâbô ndjë wâ ndə̂kə̂ zɨ bechë-ê. Lə̂ rə lâme gbɛ̂, su yê ndə̂ tche zâ rə̂ sə̈ Ndjapä lâme zôgoabô-a.

²⁰ Tche zä su yê pâ bâlâ ndə̂ Ndjapä zâ rə̂ tə̂ yê alême. Tche tôâbo rə̂ bhâtə̂ su yê pä yepa kä me-a, tche kpokpo tə̂ yê lə̂ köbosə̂ kə̂ za su yê sə̈ Ndjapä ânyë kə̂ voga Ndjapä.

²¹ Tche wûnsə̂ nə̈ nə̂ tə̂ lëge nə̈ bhâtə̂ su yê pä rə ndə̂ Ndjapä zâ bâlâ nə̈, tche kä la gbôgbô ndə̂kə̂ mbo rə̂.

²² Bëte rə̂ kä ndə̂ Ndjapä wûn tchë batə̂ djîrə̂ akrə.

²³ Ndə̂ Mbëtï Ndjapä tô rə̂ päkëdə̂: «Ndjapä wün Abrahâmo batə̂ djîrə̂ akrə», apö nə̈ lâme wâbo kütû bëte tchetchë balë-a,

²⁴ äwä ndjë bëte azə̂ ndə̂ Ndjapä wûn azə̂ batə̂ adjîrə̂ azü lə̂ köbosə̂ kə̂ za su azə̂ sə̈ tchë. Tə̂ lëge nə̈, azə̈ zä su azə̂ sə̈ tchetchë ndə̂ tche jô Jezü, Gbölö Gbïɛ̈ ndə̂ azə̂ lə̂ kuzü.

²⁵ Bëte ngbongbo rə ndə̂ azə̂ kä ndə̂ Ndjapä gbôtə̂ yê tchânə̂ azü ânyë andjë wôn tchë. Tche jö lə̂ kuzü ndə̂kə̂ mbo rə̂ ânyë azə̈ watə̂ adjîrə̂ azü lə̂ la Ndjapä.